မွန်ပြည်နယ်မှာ အမှုရင်ဆိုင်နေရတဲ့ အချုပ်သား ၁၉၅ ဦးကို အောက်တိုဘာ ၁ ရက် ညပိုင်းက ပြန်လွှတ်ပေးခဲ့တယ်လို့ ပြည်နယ်အကျဉ်းစီးဌာနတာဝန်ရှိသူက ဒီဗွီဘီကို ပြောပါတယ်။
ပြန်လွှတ်ပေးခဲ့တဲ့ အချုပ်သား ၁၉၅ ဦးဟာ လူသတ်မှု၊ မုဒိမ်းမှု၊ ခိုးမှု အပါအဝင် ရဲအရေးပိုင်တဲ့အမှုတွေနဲ့ အမှုရင်ဆိုင်နေတဲ့ အချုပ်သားတွေ ဖြစ်တယ်လို့ ဆိုပါတယ်။
ပြန်လွှတ်ပေးခဲ့တဲ့ အချုပ်သားတွေဟာ မွန်ပြည်နယ်အတွင်းက မော်လမြိုင် အချုပ်ထောင်၊ ကျိုက်မရော ဗဟိုအကျဉ်းထောင်၊ သထုံအကျဉ်းထောင်တို့မှာ ဖမ်းဆီးချုပ်နှောင်ထားပြီး အမှုရင်ဆိုင်နေရတဲ့သူတွေ ဖြစ်ပါတယ်။
အချုုပ်သားတွေ ပြန်လွှတ်ပေးရတာဟာ ကိုဗစ်ကပ်ရောဂါ အမြန်ဆုံးထိန်ချုပ်နိုင်ဖို့အတွက် ရည်ရွယ်လုပ်ဆောင်တာလို့ စစ်ကောင်စီဘက်ကတော့ ကြေညာထားတာပါ။
ဒါပေမဲ့ ရာဇသတ်ကြီး ဥပဒေ ပုဒ်မ ၅၀၅(က)နဲ့ အမှုရင်ဆိုင်နေတဲ့ ပြည်သူတွေတော့ ပါဝင်လာခြင်း မရှိသေးပါဘူး။
မွန်ပြည်နယ်မှာတော့ စစ်တပ် အာဏာသိမ်းပြီးနောက် ယနေ့အချိန်ထိ အချုပ်သား ၈၀၀ နီးပါး ပြန်လွှတ်ပေးထားတာ ဖြစ်ပါတယ်။
မွန်ပြည်နယ်မှာ အမှုရင်ဆိုင်နေတဲ့ အချုပ်သား ၃၀၀ နီးပါးကို ဇူလိုင် ၂၂ ရက်မှ ၂၇ ရက်အထိ ၆ ရက်အတွင်း ပြန်လွှတ်ပေးခဲ့တယ်လို့ ပြည်နယ်အကျဉ်းဦးစီးဌာန တာဝန်ရှိသူတဦးက ဒီဗွီဘီကို ပြောပါတယ်။
ပြန်လွှတ်ပေးခဲ့တဲ့ အချုပ်သားတွေထဲမှာ စစ်တပ်အာဏာမသိမ်းခင်က ခိုးမှု၊ လောင်းကစားမှုနဲ့ အမှုရင်ဆိုင်နေရတဲ့သူတွေ ဖြစ်ပြီး အများစုမှာ မူးယစ်ဆေးဝါးမှုနဲ့ အမှုရင်ဆိုင်နေတဲ့သူတွေ ဖြစ်ပါတယ်။
ပြန်လွှတ်ပေးခဲ့တဲ့ အချုပ်သားတွေကို အကျဉ်းဦးစီးဌာနက စိစစ်တာ မဟုတ်ဘဲ တရားရုံးနဲ့ ရဲတပ်ဖွဲ့ လွှတ်အမိန့်ပေးတဲ့သူတွေကို ပြန်လွှတ်ပေးနေတာ ဖြစ်တယ်လို့ ဆိုပါတယ်။
မွန်ပြည်နယ်မှာတော့ မော်လမြိုင်အချုပ်ထောင်၊ ကျိုက်မရောဗဟိုအကျဉ်းထောင်နဲ့ သထုံအကျဉ်းထောင်တွေမှာ ချုပ်နှောင်ခံထားရတဲ့ အချုပ်သားတွေကို ပြန်လွှတ်ပေးခဲ့တာ ဖြစ်ပါတယ်။
မွန်ပြည်နယ်မှာတော့ ပြီးခဲ့တဲ့ ဇွန်လကတည်း အကျဉ်းသား ၃၀ ကျော်ကို အာဏာသိမ်းစစ်ကောင်စီအမိန့်နဲ့ ပြန်လွှတ်ပေးခဲ့ပါတယ်။
ဇူလိုင် ၂၀ ရက် စစ်ကောင်စီအမိန့်အရ အမှုပိတ်သိမ်းပြီး နိုင်ငံတဝန်း အကျဉ်းထောင်တွေကနေ ပြန်လွှတ်ပေးတဲ့ အချုပ်သားပေါင်း ၄၃၀၀ နီးပါး ရှိပါတယ်။
