နေပြည်တော်၊ တပ်ကုန်းမြို့နယ်၊ ရန်ကုန်-မန္တလေးလမ်းဟောင်းပေါ်မှာ အချုပ်ကားပေါ်က ရဲကိုသေနတ်နဲ့ပစ်ခတ်ပြီး ထွက်ပြေးသွားတဲ့ အချုပ်သားတွေထဲက သုံးဦးကို စစ်တပ်ကပစ်ခတ်ဖမ်းဆီးခဲ့ရာ တစ်ဦးသေဆုံး နှစ်ဦးအရှင်ဖမ်းမိခဲ့တယ်လို့ နေပြည်တော် ရဲတပ်ဖွဲ့အသိုက်အဝန်းက သိရပါတယ်။
မတ်လ ၁ ရက်က နေပြည်တော်ကောင်စီနယ်မြေအတွင်းရှိ ပျဥ်းမနားခရိုင်၊ ပုပ္ပသီရီခရိုင်၊ ဇေယျာသီရီခရိုင်စတဲ့ တရားရုံးတွေမှ အချုပ်သား အယောက် ၂၀ ကိုရမည်းသင်းထောင်ကို ပြန်အပို့ တပ်ကုန်းမြို့နယ်အရောက်မှာ အချုပ်ကားပေါ်ကနေ အချုပ်သားကိုးဦးထွက်ပြေးခဲ့တာဖြစ်ပြီး အခုအထိ ခြောက်ဦးမှာ ထွက်ပြေးလွတ်မြောက်နေဆဲပဲလို့ ရဲအရာရှိနဲ့ နီးစပ်သူက ပြောပါတယ်။
"ထွက်ပြေးတာ ကိုးယောက်ပါ။ သုံးဦးပြန်မိတယ်။ တစ်ဦးကအသေ။ နှစ်ဦးက အရှင်မိတာပါ ခြောက်ဦးက မမိသေးဘူး"လို့ ပြောပါတယ်။
အဆိုပါအချုပ်သားတွေကို ရမည်းသင်းထောင်ကိုသွားပို့ရာ တပ်ကုန်းမြိုနယ် မိုင်တိုင်၂၄၆ အရောက်မှာ အချုပ်ကားအနောက်ခန်းမှ ဖုန်းဆက်လို့ ဒုရဲအုပ်ဝေလင်းဖြိုး၊ ဒုရဲအုပ်ကျော်မင်းနိုင်နဲ့ ရဲတပ်သားဖြိုးဝေအောင်တို့က တံခါးဖွင့်ပေးရာ အချုပ်သားတွေက ထွက်ပြေးလို့ သေနတ်နဲ့ချိန်ရာ အချုပ်သားတွေက သေနတ်ကိုလုပစ်ခတ်ခဲ့လို့ ရဲတပ်သားတဦးထိမှန်ခဲ့ပါတယ်။
"ကားအနောက်ခန်းက ရဲကိုထိုးကြိတ်ပြီး အဲ့ဒီရဲဆီက ဖုန်းနဲ့ ကားခေါင်းခန်းက ဒုရဲအုပ်ကို ဖုန်းဆက်ပြီး တံခါးလာဖွင့်ခိုင်းတာ လာဖွင့်တဲ့အချိန် ကိုးယောက်က ရဲတွေကို တိုက်ခိုက်ပြီး ထွက်ပြေးတာ” လို့ ပြောပါတယ်။
အချုပ်သားတွေထွက်ပြေးပြီးနောက် စစ်ကောင်စီတပ်က ရောက်လာကာ ကားပေါ်မှာ ကျန်နေတဲ့ အချုပ်သား အမျိုးသား ၉ ဦးနဲ့ အမျိုးသမီး ၂ ဦးကို တပ်ကုန်းမြို့မရဲစခန်းမှာ ချုပ်နှောင်ထားကာ ထွက်ပြေးသွားတဲ့ အချုပ်သားတွေကို လိုက်လံရှာဖွေနေတာဖြစ်ပါတယ်။
စစ်ကောင်စီတပ်နဲ့နီးစပ်သူ တဦးက "သဲဖြူရွာနဲ့ ရွှေစုရွာကြားက ပြောင်းခင်းထဲမှာ ၃ ယောက် မိတာ ခြောက်ဦးကတော့ မမိသေးဘူး မနေညကပဲမိတာ"လို့ ရှင်းပြပါတယ်။
လွတ်မြောက်နေသူခြောက်ဦးဟာ ပျဥ်းမနားခရိုင်၊ ပုပ္ပသီရီခရိုင်၊ ဇေယျာသီရီခရိုင် စတဲ့တရားရုံးတွေမှာ ပုဒ်မ ၃၇၉၊ ပုဒ်မ ၃၀၇ ၊ ပုဒ်မ ၃၉၂ ၊ ၃၂၆ စတဲ့ ပုဒ်မတွေနဲ့ အမှုရင်ဆိုင်နေရသူတွေဖြစ်ပါတယ်။
နေပြည်တော်၊ တပ်ကုန်းမြို့နယ်မှာ မတ်လ ၁ ရက် မနေ့ညနေ ၄ နာရီခွဲလောက်က တရားရုံးကနေ ရုံးထုတ်ပြီးပြန်လာတဲ့ အချုပ်ကားတစ်စီးနဲ့လိုက်ပါလာတဲ့ အချုပ်သားတွေက ရဲတွေကို ရိုက်နှက်သေနတ်နဲ့ပစ်ခတ်ပြီး ၁၀ ယောက်လောက် ထွက်ပြေးသွားတယ်လို့ ဒေသခံ အုပ်ချုပ်ရေးနဲ့ နီးစပ်သူတွေဆီ သိရပါတယ်။
ပျဥ်းမနားမြို့နယ်တရားရုံးကနေ ရုံးထုတ်ပြီး ရမည်းသင်းအကျဥ်းထောင်ကို အချုပ်သား ၂၁ ဦးပြန့်ပို့ရာ တပ်ကုန်းမြို့နယ် သူဌေးကုန်းကျေးရွာအနီးမှာ ဒုရဲအုပ်နဲ့ရဲတပ်သားတစ်ဦးကို အချုပ်သားတွေက ရိုက်နှက်ကာ သေနတ်နဲ့ပစ်ခတ်ပြီး ထွက်ပြေး လွတ်မြောက်သွားတာပါ။
အုပ်ချုပ်ရေးနဲ့ နီးစပ်သူတစ်ဦးက "၂၄၆ မိုင်နားမှာဖြစ်တာ အချုပ်ကားနှစ်စီးလာတာ နောက်ကားကို စောင့်တဲ့အချိန် အချုပ်ကားအနောက်မှာ အချုပ်သားအချင်းချင်း ရုန်းရင်းဆန်ခတ်ဖြစ်လို့ ဒုရဲအုပ်နဲ့ ရဲတပ်သားဆင်းလာတာ။ တံခါးဖွင့်ကြည့်တော့ ဒုရဲအုပ်ကို အရင်ထိုးကြိတ် ရဲတပ်သားက သေနတ်နဲ့ ပစ်မယ်လုပ်တော့ သေနတ်ကိုလုပြီးသူ့ကိုပစ်သွားတာ။ သေနတ်ဒင်နဲ့ ဒုရဲအုပ်ကိုရိုက်သွားတယ်။ သေနတ်တော့မယူသွားဘူး"လို့ ပြောပါတယ်။
အချုပ်ကားပေါ်မှာ အချုပ်သား အမျိုးသား ၁၉ ဦးနဲ့ အမျိုးသမီး ၂ ဦးလိုက်ပါပြီး အဲ့ဒီထဲက ၁၀ ဦးလွတ်သွားတာဖြစ်ပြီး ပစ်ခတ်မှုကြောင့် ရဲတပ်သားဖြိုးဝေအောင်ရဲ့ ရင်ဘတ်နဲ့ခါးမှာ သေနတ်ဒဏ်ရာရရှိပြီး ဆေးရုံတင်ထားရတယ်လို့ ရဲအရာရှိတစ်ဦးက ပြောပါတယ်။
"ရဲတပ်သားလေးက စိုးရိမ်ရတယ်။ တပ်ကုန်းခုတင် ၁၀၀ ဆေးရုံမှာ။ ဒုရဲအုပ်က ခေါင်းပဲကွဲသွားတာ ထွက်ပြေးသွားတဲ့ အချုပ်သားတွေကို လိုက်ရှာနေပါတယ်။”
ထွက်ပြေးလွတ်မြောက်သွားတဲ့ အချုပ်သားတွေကို စစ်ကောင်စီတပ်နဲ့ ရဲတွေဟာ တပ်ကုန်းမြို့နယ်အတွင်း ပိတ်ဆို့ရှာဖွေနေပေမဲ့ ပြန်လည်ဖမ်းဆီးရမိခြင်းမရှိသေးဘူးလို့ ရဲအသိုင်းအဝိုင်းက သိရပါတယ်။
