မကွေးတိုင်း ဂန့်ဂေါမြို့နယ်မှာ ဖေဖော်ဝါရီ ၆ ရက်က အခက်ခဲတွေကြားထဲကနေ PDF-ဂန့်ဂေါ အခြေခံစစ်ပညာသင်တန်း အမှတ်စဥ် ၃ ရဲ့ သင်တန်းဆင်းပွဲ ပြုလုပ်ခဲ့တယ်လို့ ဂန့်ဂေါမြို့နယ်ပြည်သူ့ကာကွယ်ရေးတပ်ဖွဲ့ကနေ သိရပါတယ်။
ဖေဖော်ဝါရီ ၆ ရက်မှာ အမျိုးသား ၈၅ ယောက်၊ အမျိုးသမီး ၄၀ ကို အခက်ခဲတွေကြားထဲကနေ သင်တန်းဆင်းပွဲ ပြုလုပ်ပေးခဲ့တာလို့ PDF-ဂန်ဂေါရဲ့ပြန်ကြားရေးတာဝန်ခံက ပြောပါတယ်။
ယောဒေသအတွင်းကို စစ်ကောင်စီတပ်တွေက အဆက်မပြတ် စစ်ကြောင်းထိုးနေတဲ့ကြားကနေ သင်တန်းပို့ချရတာဖြစ်ပြီး သင်တန်းဆင်းပွဲမှာ အမျိုးသားညီညွတ်ရေးအစိုးရ ကာကွယ်ရေးဝန်ကြီး ဦးရည်မွန်က ပေးပို့တဲ့ သဝဏ်လွှာကို ဖတ်ကြားခဲ့တယ်လို့ ဆိုပါတယ်။
“လူငယ်တွေက စစ်ပညာသင်ရတာကို အရင်ကထက်ပိုပြီး စိတ်ဝင်စားမှု ရှိလာတယ်။ လစာယူဖို့ သင်တန်းလာတက်တာမဟုတ်ဘဲ စစ်အာဏာရှင်ကို အမြစ်ပြတ်တော်လှန်မယ်ဆိုတဲ့ စိတ်ဓာတ်နဲ့ လာတက်ကြတာ” လို့ PDF-ဂန်ဂေါရဲ့ပြန်ကြားရေးတာဝန်ခံက ပြောပါတယ်။
ယောဒေသဆိုတာကလည်း ချင်းပြည်နယ်ရဲ့ ခြံစည်းရိုးဖြစ်သလို ချင်းပြည်နယ်ကို စစ်ကြောင်း ထိုးမယ်ဆိုရင် ယောဒေသကို ဖြတ်ပြီးသွားလို့ ရမှာဖြစ်တာကြောင့် စစ်ကောင်စီတပ်က ယောဒေသအတွင်းက ကျေးရွာတွေကို ဝင်ရောက်ပြီး ပြည်သူတွေကို အကြမ်းဖက် ဖမ်းဆီသတ်ဖြတ်ပြီး ကျေးရွာတွေကို မီးရှို့ ဖျက်ဆီးခဲ့ကြတယ်လို့ဆိုပါတယ်။
စစ်ကောင်စီတပ်တွေက အကြမ်းဖက်မီးရှို့တာဟာ သူတို့ အာဏာတည်မြဲဖို့ ပြည်သူတွေ အကြောက်တရားဖြစ်အောင်လုပ်တာဖြစ်သလို ပြည်သူလူထုအနေနဲ့ PDF တွေဘက်ကို မရပ်တည်ရဲအောင် သတင်းမပေးရဲအောင် လုပ်တဲ့သဘောပဲလို့ ပြောပါတယ်။
မြန်မာနိုင်ငံအတွင်းက မြို့နယ်အသီးသီးမှာ အာဏာသိမ်းစစ်ကောင်စီကို အမြစ်ပြတ်တော်လှန်တိုက်ထုတ်မယ်ဆိုတဲ့ ရည်ရွယ်ချက်တွေနဲ့ လူငယ်အများစုဟာ PDF တပ်ဖွဲ့တွေထဲကို ဝင်ရောက်သင်တန်းတက်ရောက်ကြပြီး နောက်ထပ်လည်း သင်တန်းတက်ရောက်ဖို့ စာရင်းသွင်းထားတဲ့ လူငယ်တွေ အများအပြားရှိနေတယ်လို့ သိရပါတယ်။
