စစ်ကိုင်းတိုင်း၊ မုံရွာမြို့ပေါ် ရပ်ကွက်တွေက စား၀တ်နေရေး ခက်ခဲနေတဲ့ အိမ်ထောင်စု ၂၀၀ လောက်ကို  မီးဘေးစစ်ဘေးပညာရေးကူညီစောင့်ရှောက်ရေးအဖွဲ့ S&C က ဩဂုတ် ၂၇ ရက်မှာ ဆန်နဲ့ ကြက်ဥတွေ ပေးဝေခဲ့ပါတယ်။

ဒီနေ့ မနက် ၆ နာရီခွဲမှာ တအိမ်ထောင်ကို ဆန် ၁ ပြည်နဲ့ ကြက်ဥ ၁၀ လုံးစီ မျှဝေ လှူဒါန်းပေးခဲ့တယ်လို့ မီးဘေးစစ်ဘေးပညာရေးကူညီစောင့်ရှောက်ရေးအဖွဲ့ S&C မှ ကိုစိုးမိုးအောင်က ပြောပါတယ်။ 

"ပြည်သူတွေက အရမ်းခက်ခဲနေကြတာ။  ငွေရေးကြေးရေး အခြေအနေအရ တတ်နိုင်သလောက် လုပ်ပေးတာပါ။ ဝေမဲ့အချိန်က ၈ နာရီမှ အစောကြီးလာကြတော့ ၆ နာရီခွဲလောက်မှာ ဝေပေးလိုက်တယ်။”

ကုန်စည်စျေးနှုန်း အဆမတန် မြင့်မားလာမှုကြောင့် အခြေခံလူတန်းစားတွေရဲ့ အကျပ်အတည်း အတွက် အနည်းငယ် ​အဆင်ပြေနိုင်ဖို့ ရည်ရွယ် လှူဒါန်းပေးခဲ့တာဖြစ်ပြီး ဆက်လက်လှူဒါန်းသွား ဖို့ရှိတယ်လို့ S&C ကဆိုပါတယ်။

စစ်တပ်က အာဏာသိမ်းပြီး ၁ နှစ်ကျော်ကာလအတွင်း မွန်ပြည်နယ် ရေးမြို့နယ်မှာ အခြေခံ စားသောက်ကုန်တွေ အဆမတန် ဈေးတက်လာလို့ သာမန် လက်လုပ်လက်စားတွေ စားဝတ်နေရေး ပိုပြီး ခက်ခဲလာနေကြတယ်လို့ ဒေသခံတွေက ပြောပါတယ်။

"အခု ဆန်ဈေးတွေလည်း ၁ အိတ်ကို ကျပ် ၆,၀၀၀ လောက်အထိ တက်တယ်၊ စားဆီလည်း ၁ ပိသာကို အရင်က ပြည်တွင်းထုတ် ကျပ် ၃,၀၀၀ ကနေ အခု ကျပ် ၈,၀၀၀ နီးပါးအထိ ဖြစ်တယ်။ ကြက်သား ၁ ပိသာလည်း အရင်က ကျပ် ၄,၀၀၀ က အခု ကျပ် ၇,၀၀၀ နီးပါး မြင့်လာတယ်။ ဟင်းသီးဟင်းရွက်ကအစ ဈေးတွေ အားလုံးနီးပါး ထက်ဝက်လောက် ဈေးတက်တယ်။" လို့ အိမ်ရှင်မတွေက ပြောပါတယ်။

စစ်အာဏာသိမ်းပြီးကတည်းက အရင်လို ကုန်ပစ္စည်းတွေ မှာလို့မရသလို ပစ္စည်းပြတ်တာ၊ သယ်ယူစရိတ် ကြီးတာတွေကြောင့် အရောင်းအဝယ် မကောင်းတဲ့အကြောင်း ဈေးသည်တဦးက ပြောပါတယ်။

"အခုလို ကုန်ဈေးနှုန်းတွေ နေ့ချင်းညချင်း တက်နေတာ ကိုဗစ်ကာလကတည်းက၊ အလုပ်ကလည်း အဆင်မပြေ၊ အခု စစ်တပ်က အာဏာယူထားပြန် ဆိုတော့ ကုန်ပစ္စည်းတွေလည်း အရင်လို မှာယူလို့လည်းမရ၊ ကုန်ကလည်း ပစ္စည်းတွေပြတ်လပ်၊ သယ်ယူစရိတ်တွေပါ ကြီးမြင့်လာတော့ အရောင်းအဝယ်လည်း မရှိဘူး။"

သယ်ယူစရိတ်တွေက ၂ ဆလောက် တက်တဲ့အတွက် ဆန်အမျိုးအစားပေါ် မူတည်ပြီး ဆန်ဈေး တအိတ်ကို ကျပ် ၄,၀၀၀ ကနေ ၆,၀၀၀ နီးပါးအထိ မြင့်တက်လာပါတယ်။

ရေးမြို့နယ်မှာ ပြည်တွင်းထုတ် စားသောက်ကုန်တွေအပြင် တရုတ်နဲ့ ထိုင်းက ပစ္စည်းတွေကိုပါ ဝယ်ယူသုံးစွဲကြလို့ မြန်မာငွေဈေး တန်ဖိုးကျပြီးကတည်းက ပြည်ပထုတ်ကုန်တွေပါ ပုံမှန်ဈေးထက် ထက်ဝက်နီးပါးအထိ ဈေးမြင့်တက်လာခဲ့ပါတယ်။

လက်လုပ်လက်စား အိမ်ရှင်မတဦးက "အရင်က တနေ့ရတဲ့ လုပ်အားခ ကျပ် ၅,၀၀၀ နဲ့ မိသားစု စားဝတ်နေရေး လုံလောက်ပေမဲ့ အခုက ကုန်ကျစရိတ် ၂ ဆလောက်တက်တော့ ဘယ်လိုမှ မလုံလောက်ကြဘူး။ ဒီအတိုင်းဆို ထမင်းနပ်မှန်ဖို့တောင် မနည်းကြိုးစားရမယ်။" လို့  ပြောပါတယ်။

အခုလို ဆန်ဈေးတွေ၊ အခြေခံ စားသောက်ကုန်ဈေးနှုန်းတွေ အဆမတန် ကြီးမြင့်လာတဲ့အပေါ် စစ်ကောင်စီဘက်က ဒီနေ့အထိ တာဝန်ယူ ဖြေရှင်းနိုင်ခြင်း မရှိသေးပါဘူး။

အခြေခံစားသောက်ကုန်ဈေးနှုန်းတွေ စံချိန်တင် မြင့်တက်လာသလို အလုပ်အကိုင်လည်း ရှားပါးလာတဲ့အတွက် ပုံမှန်ဝင်ငွေမရှိတဲ့ လက်လုပ်လက်စားတွေ တနေ့တခြား ပိုခက်ခဲ ကျပ်တည်းလာနေပါတယ်။