မကွေးတိုင်း၊ ပခုက္ကူဒေသမှာ အခြေခံပညာကျောင်းသားများသမဂ္ဂတခုကို အောက်တိုဘာ ၂၆ ရက်က ကျောင်းသားထုအစည်းအဝေးတရပ်နဲ့ ဗကသက ဦးဆောင်ပြီး ထပ်မံဖွဲ့စည်းခဲ့ပါတယ်။
ဗကသများအဖွဲ့ချုပ်ရဲ့ စည်းရုံးရေးတာဝန်ခံတွေက မျိုးဆက်သစ် အခြေခံပညာကျောင်းသားတွေကို သမိုင်းအစဉ်အလာတွေနဲ့အတူ သမဂ္ဂစည်းရုံးရေး ပြုလုပ်ခဲ့ကြပြီး ကျောင်းသားထုရဲ့ တောင်းဆိုချက်အရ ကျောင်းသားထုအစည်းအဝေး တရပ်ကို ဦးဆောင်ခေါ်ယူပေးကာ အမှုဆောင်အဖွဲ့ကို ကျောင်းသားထုက ဒီမိုကရေစီနည်းကျ ရွေးကောက်တင်မြှောက်ခဲ့တာပါ။
ဗကသအဖွဲ့ချုပ်ရဲ့ ပြန်ကြားရေးတာဝန်ရှိသူက “ဒီကာလ လက်နက်ကိုင်အင်အားစုတွေ စိုးမိုးနယ်မြေမှာ အခုလို ကျောင်းသားထုအစည်းဝေး ခေါ်ယူကျင်းပပြီး ဖွဲ့စည်းတာကတော့ ပခုက္ကူဒေသရဲ့ ဒုတိယအဖွဲ့မြောက်ကျောင်းလို့ ပြောလို့ရတယ်” လို့ ပြောပါတယ်။
ဒီလို အခြေခံပညာကျောင်းသားများသမဂ္ဂတွေ လိုက်လံဖွဲ့စည်းပေးတာဟာ နိုင်ငံရေးရည်ရွယ်ချက်နဲ့ ပညာရေးရည်ရွယ်ချက် ဆိုတဲ့ ရည်ရွယ်ချက် ၂ ခုနဲ့ ဖွဲ့စည်းခဲ့တာလို့ သိရပါတယ်။
အခြေခံပညာကျောင်းသားသမဂ္ဂများ ပေါ်ထွန်းလာရေးအတွက် ဆောင်ရွက်နေတဲ့ ဗကသများအဖွဲ့ချုပ်ရဲ့ ဒေသစည်းရုံးရေးတာဝန်ခံတယောက်က “ကျောင်းသားရဲ့တာဝန်ဟာ စာသင်ကြားရေးသက်သက် မဟုတ်ဘဲ ပြည်သူ့အရေးကိစ္စများပါ ထမ်းဆောင်ဖို့ဖြစ်လာတယ်။ ဒါဟာ ဗကသများအဖွဲ့ချုပ်ထားရှိတဲ့ နိုင်ငံရေးရည်ရွယ်ချက်ဖြစ်တယ်။ နောက်ပြီး ဒီကျောင်းသားမဂ္ဂတွေဟာ တော်လှန်ရေးကာလ ကျောင်းတွင်းပညာရေးမှာ ပါဝင်ဖို့ လိုပါတယ်။ အခြေခံပညာကျောင်းသားများ လက်တွေ့သင်ကြားနေရတဲ့ ပညာရေးဟာ တော်လှန်ရေးကို ပြန်ပြီး အထောက်အကူပြုမှုရှိမရှိ ဆန်းစစ်ရပါမယ်။ မရှိရင် တော်လှန်ရေးကို အထောက်အကူပြုမယ့် ပညာရေးဖြစ်အောင် ဘယ်လိုတည်ဆောက်ရမလဲ ဆိုတာကို ဗကသများအဖွဲ့ချုပ်က အခြေခံပညာကျောင်းသားထုနဲ့အတူ လက်တွဲဆောင်ရွက်သွားဖို့ ဖြစ်ပါတယ်” လို့ ပြောပါတယ်။
အောက်တိုဘာ ၂၄ ရက်ကလည်း ဗကသများအဖွဲ့ချုပ်က ဦးဆောင်ပြီး ပခုက္ကူဒေသမှာပဲ အခြေခံပညာကျောင်းသားများသမဂ္ဂတခု ဖွဲ့စည်းခဲ့ပါတယ်။
ဗမာနိုင်ငံလုံးဆိုင်ရာကျောင်းသားသမဂ္ဂများအဖွဲ့ချုပ် (ဗကသ) က ဦးဆောင်ပြီး ပခုက္ကူဒေသအတွင်းရှိ အခြေခံပညာကျောင်းတကျောင်းမှာ အောက်တိုဘာ ၂၀ ရက်က အခြေခံပညာကျောင်းသားများသမဂ္ဂကို ဖွဲ့စည်းပေးခဲ့ပါတယ်။
ကျောင်းသားတွေရဲ့ တောင်းဆိုချက်အရ ကျောင်းသားထုအစည်းအဝေးတရပ်ကို ဦးဆောင်ခေါ်ယူပေးပြီး အမှုဆောင်အဖွဲ့ကို ကျောင်းသားထုက ဒီမိုကရေစီနည်းကျ ရွေးကောက်တင်မြှောက်ခဲ့တာလို့ ဗကသများအဖွဲ့ချုပ်က ထုတ်ပြန်ထားပါတယ်။
သမဂ္ဂဖွဲ့ဖို့ အရင်ကတည်းက ဆက်တိုက်ဆိုသလို စည်းရုံးခဲ့တာဖြစ်ပြီး မနေ့က ကျောင်းသားအစည်းအဝေးလုပ်ပြီး စတင်ဖွဲ့စည်းခဲ့တာလို့ ဗကသများအဖွဲ့ချုပ် ဗဟိုအလုပ်အမှုဆောင်တဦးက ပြောပါတယ်။
“လက်နက်ကိုင်တော်လှန်ရေးအင်အားစုတွေ စိုးမိုးနယ်မြေက အခြေခံပညာကျောင်းတွေမှာ ရပ်ရွာကာကွယ်ရေး၊ ရပ်ရွာအုပ်ချုပ်ရေး၊ ကျောင်းအုပ်ချုပ်ရေးတွေကို တိုင်ပင်နှီးနှော အသိပေးပြီး ကျောင်းသားထုကို အကြိမ်ကြိမ် စည်းရုံးရေးဆင်းပြီးမှ အခုလို သမဂ္ဂအဖွဲ့တွေကို အခိုင်အမာ ဖွဲ့စည်းခဲ့ကြရတာ။”
ဗကသများအဖွဲ့ချုပ်ရဲ့ ဒေသဆိုင်ရာ စည်းရုံးရေးကော်မတီတွေက ဒေသအလိုက် လက်နက်ကိုင်တော်လှန်ရေး ဒီလှိုင်းအခြေအနေအပေါ် အကဲဖြတ်ပြီး ကျောင်းသားထုကို ဒီမိုကရေစီဝါဒနဲ့ မိတ်ဆက်ပေးတာတွေ ပြုလုပ်နေပါတယ်။
ဒါ့အပြင် အခြေခံပညာ ကျောင်းသားများသမဂ္ဂတွေ ဆက်လက်ပေါ်ထွန်းလာရေး အတွက်လည်း ဗကသများအဖွဲ့ချုပ်က ကြိုးပမ်းနေတယ်လို့ သိရပါတယ်။
