၂၀၂၂-၂၀၂၃ ခုနှစ်၊ ပညာသင်နှစ်အတွက်  မြန်မာနိုင်ငံတဝန်းရှိ  အခြေခံပညာစာသင်ကျောင်းတွေမှာ ဇွန် ၂ ရက်မနက်က စတင်ဖွင့်လှစ် သင်ကြားနေပါတယ်။

စစ်ကောင်စီက ဖွင့်လှစ်တဲ့အခြေခံပညာကျောင်းတွေကို ကျောင်းလာတက်တဲ့ကျောင်းသား ကျောင်းသူတွေကို  မိဘတွေက လိုက်ပါပို့ဆောင်ခဲ့ပါတယ်။

အခုနှစ်ပညာသင်နှစ်ရဲ့ အခြေခံပညာကျောင်းအပ်နှံရေးသီတင်းပတ်ကို မေလ ၂၆ ရက်မှ  ဇွန်လ ၂  ရက်နေ့အထိ ပြုလုပ်ခဲ့ရာ ကျောင်းအပ်သူဦးရေမှာ တစ်နိုင်ငံလုံးအတိုင်းအတာနဲ့ ၅ ဒသမ ၂ သန်းကျော်ရှိတယ်လို့ စစ်ကောင်စီပြောရေးဆိုခွင့်ရှိသူကပြောဆိုခဲ့ပါတယ်။

အဲဒီအထဲ ဧရာဝတီတိုင်းက ၉ သိန်းကျော်နဲ့ အများဆုံးကျောင်းအပ်နှံထားပြီး ရန်ကုန်တိုင်းကတော့ ၇ သိန်းနီးပါး ကျောင်းအပ်ထားကာ ချင်းပြည်နယ်ကတော့ ၂၂၀၀၀ ကျော်နဲ့ အနည်းဆုံး ဖြစ်ပါတယ်။

စစ်ကောင်စီက ထိုးစစ်ဆင်ပြီး မီးရှို့ခံနေရတဲ့ ချင်းပြည်နယ်၊ ကယားပြည်နယ်၊ စစ်ကိုင်းတိုင်းဟာ အရင်နှစ်တွေကထက် ကျောင်းအပ်နှံမှု လျော့ကျခဲ့ပြီး တချို့နေရာတွေမှာ ကျောင်းအပ်သူ လုံးဝမရှိသလောက်ပါပဲ။

ကျောင်းသားသမဂ္ဂတွေကတော့ စစ်ကောင်စီလက်အောက်ခံ ကျောင်းတွေမှာ ကျောင်းမတက်ကြဖို့နဲ့ စစ်ကျွန်ပညာရေး ဆန့်ကျင်ကန့်ကွက် သပိတ်မှောက်ကြဖို့ တိုက်တွန်းဆော်ဩနေကြပါတယ်။ 

စစ်တပ်အာဏာမသိမ်းခင် ပုံမှန်စာသင်နှစ်တွေမှာ နိုင်ငံတဝန်း ကျောင်းသား ကျောင်းသူ ၁၀ သန်း လောက် ကျောင်းတက်ရောက်ခဲ့ပြီး ဒီနှစ်မှာတော့ ထက်ဝက်လောက်ကို ကျောင်းပြန်တက်နေကြတာလည်း ဖြစ်ပါတယ်။ 

အမျိုးသားညီညွတ်ရေးအစိုးရကလည်း ကြားကာလ ပညာရေးအစီအစဉ်အဖြစ် ကျောင်းတွေ ဖွင့်လှစ် သင်ကြားပေးနေပြီး စစ်ကောင်စီလုပ်ဆောင်နေတဲ့ ပညာရေးလုပ်ဆောင်မှုတွေကို အသိအမှတ်မပြုဘူးလို့ ကြေညာထားပါတယ်။

အာဏာသိမ်း စစ်ကောင်စီက အခြေခံပညာကျောင်းတွေ ပြန်ဖွင့်ဖို့အတွက် ဒီကနေ့ မေလ ၂၄ ရက်ကစလို့  မြန်မာနိုင်ငံ ဒေသအနှံ့ရှိ စာသင်ကျောင်းတွေမှာ ကျောင်းသားတွေကို စတင်ကျောင်းအပ်လက်ခံနေပါတယ်။

ဒါပေမဲ့ လက်ရှိပျံ့နှံ့ဖြစ်ပွားနေတဲ့ ကိုဗစ်-၁၉ တတိယလှိုင်းအန္တရာယ်နဲ့ လုံခြုံရေး အခြေအနေတွေအကြောင့် သားသမီးတွေကို ကျောင်းဖွင့်ရင် ကျောင်းမအပ်ဖို့ ဆုံးဖြတ်ထားတဲ့ မိဘတွေ အများအပြားရှိနေပါတယ်။

လက်ရှိမှာဆိုရင်တော့ မြန်မာနိုင်ငံမှာ ကိုဗစ်-၁၉ ရောဂါဖြစ်ပွားမှု ဆက်ဖြစ်ပွားနေပြီး အိမ်နီးချင်းနိုင်ငံတွေမှာလည်း ကိုဗစ်ကူးစက်မှုကလည်း မြင့်မားနေပါတယ်။ ဒီအခြေအနေတွေအပြင် ပြည်တွင်းမှာလည်း အာဏာသိမ်းစစ်ကောင်စီရဲ့ အကြမ်းဖက်မှုတွေနဲ့ ကျောင်းတွေအနီး ဗုံးပေါက်ကွဲမှုတွေကြောင့် ပြည်သူတွေရဲ့ နေ့စဉ်ဘဝမှာ လုံခြုံမှုမရှိတော့ဘူးလို့ ကျောင်းသားမိဘတွေက ပြောဆိုပါတယ်။

ဒါကြောင့် ကလေးတွေကို ကျောင်းပို့ဖို့ဆိုတာကတော့ ဘယ်လိုမှမဖြစ်နိုင်ဘူးလို့ ကျောင်းသားမိဘတစ်ဦးက ပြောပါတယ်။

ရန်ကုန်၊ တာမွေမြို့နယ်က မူလတန်းကျောင်း တစ်ကျောင်းမှာတော့ ကျောင်းဆရာ ဆရာမ အများစုက CDM လှုပ်ရှားမှုမှာ ပါဝင်တဲ့အတွက် ကျောင်းမလာကြသလို ဒီကနေ့မနက် ကျောင်းလာတဲ့ ဆရာမ ၁ ဦးနဲ့ ကျောင်းလာအပ်တဲ့  ကျောင်းသား ၁ ဦးပဲ ရှိခဲ့ပါတယ်။ 

စစ်ကောင်စီဘက်ကတော့ ကျောင်းတွေလုံခြုံရေး ပြင်ဆင်ဆောင်ရွက်သွားမယ်လို့ ပြောဆိုပေမယ့် ပြည်သူအများစုက အယုံအကြည်မရှိသလို စစ်ကောင်စီလက်အောက်မှာ ကျောင်းမထားဘူးလို့ ကျောင်းသားမိဘတစ်ဦးက ပြောဆိုပါတယ်။ မိဘတွေကတော့ သားသမီးတွေကို နေအိမ်တွေမှာပဲ စာသင်ကြားဖို့ ပြင်ဆင်နေပါတယ်။

တော်လှန်ရေးကာလ ဘယ်လောက်ကြာမြင့်မယ်ဆိုတာ မသိသေးသလို ကလေးတွေ ရေရှည်ပညာသင်ကြားနိုင်ရေး စဉ်းစားထားတာမရှိသေးပေမယ့် စစ်ကောင်စီအောက်မှာ ကျောင်းမထားဖို့ ဆုံးဖြတ်ချက်ကိုတော့ ပြန်ပြင်မှာမဟုတ်ဘူးလို့ ကျောင်းသားမိဘတွေက ပြောဆိုကြပါတယ်။

လက်ရှိမြန်မာနိုင်ငံမှာ ကိုဗစ်ကာကွယ်ဆေး ပြည်သူအားလုံး အလုံးစုံထိုးနိုင်သေးတာ မဟုတ်တဲ့အပြင် ဘယ်လိုပုံစံနဲ့ ကျောင်းတွေပြန်ဖွင့်မယ်ဆိုတာကို မပြင်ဆင်ရသေးဘဲ ကျောင်းပြန်ဖွင့်ဖို့ ကြိုးစားတာဟာ မဖြစ်သင့်ဘူးလို့ ဆရာဝန်တစ်ဦးကလည်း ပြောဆိုပါတယ်။

ဒီလိုအခြေအနေမှာ ကျောင်းတွေပြန်ဖွင့်မယ်ဆိုရင် ကျောင်းတွေဟာ ကိုဗစ်ပြန့်ပွားတဲ့နေရာတွေ ဖြစ်လာမှာစိုးရိမ်မိတယ်လို့ ဒေါက်တာစိမ့်စမ်းဖြူက ပြောပါတယ်။

စစ်ကောင်စီဟာ အဆင့်မြင့်ပညာကျောင်းတွေကိုလည်း ပြန်ဖွင့်ခဲ့ပေမယ့် တက္ကသိုလ်ဆရာ၊ ဆရာမတွေရဲ့ အာဏာဖီဆန်ရေးလှုပ်ရှားမှု အားကောင်းနေတဲ့အပြင် ကျောင်းသား ၉၀ ရာခိုင်နှုန်းကျော်ကလည်း ကျောင်းမတက်ဘဲ အာဏာဖီဆန်ခဲ့တာကြောင့် ကြိုးစားမှုဟာ အရာမထင်ဖြစ်ခဲ့ရပါတယ်။

မြန်မာနိုင်ငံတဝန်း CDM မှာပါဝင်တဲ့ ဆရာ ဆရာမ  ၁၂၅,၀၀၀  ယောက် အလုပ်ကနေ ယာယီရပ်ဆိုင်းခံရတယ်လို့  ကျောင်းဆရာများသမဂ္ဂက ထုတ်ပြန်ထားပါတယ်။