အီရန်နိုင်ငံတောင်ပိုင်းမှာ ဇူလိုင် ၂ ရက်အစောပိုင်းက အင်အားပြင်းငလျင်ကြီး နှစ်ခုနဲ့ နောက်ဆက်တွဲ လှုပ်ခတ်မှုတွေကြောင့် အနည်းဆုံး လူငါးယောက် သေဆုံးပြီး ၄၉ ယောက် ဒဏ်ရာရရှိခဲ့ကြောင်း နိုင်ငံပိုင်မီဒီယာက ဖော်ပြပါတယ်။
ဟော်ရ်မို့ဇ်ဂန်ပြည်နယ်က အီရန်ပင်လယ်ကွေ့ကမ်းရိုးတန်းအနီးရှိ ဆာယက်ခို့ရှ်ရွာမှာ ဒေသစံတော်ချိန် မနက် ၂ နာရီလောက်က ပြင်းအား ၆ ဒသမ ၃ နဲ့ ပြင်းအား ၆ ဒသမ ၁ အဆင့်ရှိတဲ့ အင်အားပြင်းငလျင် နှစ်ခု အပါအဝင် တုန်ခါမှုပေါင်း ၂၄ ကြိမ် ကြုံလိုက်ရပြီး ရွာလည်း ပြိုကျသွားခဲ့ရတယ် လို့ တာဝန်ရှိသူတွေက နိုင်ငံပိုင်ရုပ်သံကို ပြောကြားခဲ့ပါတယ်။
နောက်ဆုံး လှုပ်သွားတာကတော့ မနက် ၈ နာရီ လောက်က လို့ ဆိုပါတယ်။
ပထမငလျင်မှာ ဘေးသင့်ရသူတွေ အားလုံးသေဆုံးကုန်ပြီး နောက်ထပ်ပြင်းထန်တဲ့ ငလျင်နှစ်ခုမှာ တော့လူတွေကသူတို့ရဲ့အိမ်အပြင်ဘက်မှာ ရှိနေကြတဲ့အတွက် ထိခိုက်ဒဏ်ရာရသူတွေ မရှိပါဘူးလို့ ဘန်ဒါ-လန်ဂေကောင်တီရဲ့ အုပ်ချုပ်ရေးမှူး ဖိုအဒ်မိုရဒ်ဇာဒက်ရဲ့ ပြောဆိုချက်ကိုကိုးကားပြီး နိုင်ငံပိုင်သတင်းအေဂျင်စီ IRNA မှာဖော်ပြပါတယ်။
ဒဏ်ရာရသူ ၄၉ ယောက်ထဲက တဝက်လောက်ဟာ ဆေးရုံကနေ ဆင်းသွားပြီလို့ အရေးပေါ်ဌာန ပြောရေးဆိုခွင့်ရှိသူ မိုဂျ်တာဘာ ခါလက်ဒီက နိုင်ငံပိုင် TV ကို ပြောကြားခဲ့ပါတယ်။
ရှာဖွေကယ်ဆယ်ရေးလုပ်ငန်းတွေလည်း ပြီးဆုံးသွားပြီဖြစ်ကြောင်း တာဝန်ရှိသူတွေက ပြောပါတယ်။
ငလျင်လှုပ်ခတ်မှုကြောင့် ပင်လယ်ကွေ့ရေကြောင်းပို့ဆောင်ရေးနဲ့ လေယာဉ်ခရီးစဉ်တွေ ထိခိုက်မှုမရှိခဲ့ကြောင်း ကိစ်ရှ်ကျွန်း ဘေးအန္တရာယ်ကာကွယ်ရေးအဖွဲ့မှ ဆေအိဒ် ပိုရ်ဇာဒက်က ပြောပါတယ်။
ပြီးခဲ့တဲ့လတုန်းက ဟော်ရ်မို့ဇ်ဂန် ပြည်နယ်အနောက်ဘက်မှာ ငလျင်နဲ့ လှုပ်ခတ်မှုပေါင်း ၁၅၀ ရှိခဲ့ကြောင်း နိုင်ငံပိုင်ရုပ်သံက ထုတ်လွှင့်သွားပါတယ်။
