အင်းစိန်အကျဥ်းထောင်မှာ မေလ ၃ ရက် မနက်က ဦးနှောက်ထဲပိုးဝင်ပြီး သေဆုံးခဲ့တဲ့ ရန်ကုန်တိုင်းအစိုးရအဖွဲ့မှ စီးပွားရေးရာဝန်ကြီးဟောင်း ဦးအောင်သန်းဦးကို မေ ၅ ရက် ဒီနေ့ နေ့လယ် ၁ နာရီက ရေဝေးသုသာန်မှာ သင်္ဂြိုဟ်ခဲ့ပါတယ်။
အင်းစိန်အကျဥ်းထောင်မှာ အဂတိအမှုနဲ့ ထောင်ဒဏ်နှစ် ၂၀ ကျခံနေရတဲ့ စီးပွားရေးရာ ဝန်ကြီးဟောင်း ဦးအောင်သန်းဦးဟာ မေ ၃ ရက် မနက် ၆ နာရီမှာ ဦးနှောက်ထဲပိုးဝင်ပြီး သေဆုံးခဲ့တာပါ။
ဒလမြို့နယ်ရှိ သမ္မတကမ်းခြေ မြေယာချထားမှုနဲ့ ပတ်သက်ပြီး ၂၀၂၂ ခုနှစ် မတ်လ ၂၃ ရက်မှာ ရန်ကုန်တိုင်းဝန်ကြီးချုပ်၊ မြို့တော်ဝန်၊ စီးပွားရေးရာဝန်ကြီးနဲ့ အတွင်းရေးမှူးတို့ကို စစ်ကောင်စီက ဖမ်းဆီးခဲ့ပြီး မြို့တော်ဝန် ဦးဗိုလ်ဌေးကိုတော့ ပြန်လွှတ်ကာ ကျန်သုံးဦးကို အဂတိပုဒ်မတွေနဲ့ အမှုဖွင့်ခဲ့တာ ဖြစ်ပါတယ်။
ရန်ကုန်တိုင်းဝန်ကြီးချုပ် ဦးလှစိုး၊ ဝန်ကြီးဟောင်း ဦးအောင်သန်းဦးနဲ့ အတွင်းရေးမှူး ဦးစိုးစိုးဇော်တို့ကို ၂၀၂၂ ခုနှစ် ဒီဇင်ဘာလ ၈ ရက်မှာ စစ်ကောင်စီက နှစ်ရှည်ထောင်ဒဏ်တွေ ချခဲ့ပါတယ်။
ကွယ်လွန်ချိန်မှာ အသက် ၅၇ နှစ်ရှိပြီဖြစ်တဲ့ ဦးအောင်သန်းဦးဟာ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီဝင်တဦး ဖြစ်သလို မြန်မာနိုင်ငံ ဆန်ကုန်သည်ကြီးများအသင်းရဲ့ ဥက္ကဋ္ဌတဦးလည်း ဖြစ်ပါတယ်။
၂၀၁၀ ရွေးကောက်ပွဲမှာ သန်လျင်မြို့နယ်ကနေ ကြံ့ခိုင်ရေးပါတီဘက်က ဝင်ရောက်ယှဥ်ပြိုင် အနိုင်ရခဲ့ပေမဲ့ ၂၀၁၅ ခုနှစ်နဲ့ ၂၀၂၀ ရွေးကောက်ပွဲတွေမှာတော့ သန်လျင်မြို့နယ်ကနေပဲ ထပ်မံ ဝင်ရောက်ယှဥ်ပြိုင်ခဲ့ရာ ရှုံးနိမ့်ခဲ့ပါတယ်။
ကဆုန်လပြည့်နေ့၊ ဗုဒ္ဓနေ့အထိမ်းအမှတ် စစ်ကောင်စီက နိုင်ငံတဝန်း နိုင်ငံရေးအကျဥ်းသား ၂၀၀၀ ကျော်ကို ပြစ်ဒဏ်လွတ်ငြိမ်းခွင့်ပေးတဲ့အထဲမှာ မေ ၃ ရက် ဒီကနေ့မနက် အင်းစိန်အကျဥ်းထောင်ကနေ ၅၀၅ - က အမှုတမှုတည်းနဲ့ ပြစ်ဒဏ်ကျခံနေရတဲ့ နိုင်ငံရေးအကျဥ်းသမား ၃၁၆ ဦး ပြန်လွတ်မြောက်လာပါတယ်။
ဒီကနေ့မနက် ၁၁ နာရီ ၁၅ မိနစ်မှာ ပြန်လည်လွတ်မြောက်လာသူတွေထဲမှာ အမျိုးသမီးအကျဥ်းသားတယောက်မှ မပါဝင်ဘဲ လွတ်ရက်စေ့ခါနီး အမျိုးသားအကျဥ်းသားတွေကိုပဲ ပုဒ်မ ၄၀၁ ခံဝန်ကတိနဲ့ ပြန်လွှတ်ပေးခဲ့တာ ဖြစ်ပါတယ်။
မနက်ဖန်မှာ လွတ်ရက်စေ့မှာဖြစ်ပြီး ဒီကနေ့မှာ ခံဝန်နဲ့ ပြန်လွှတ်ပေးတဲ့အပေါ် နိုင်ငံရေးအကျဉ်းသားတဦးကတော့ “လုံးဝကိုမကျေနပ်ပါဘူး” လို့ ပြောပါတယ်။
ကဆုန်လပြည့်နေ့၊ ဗုဒ္ဓနေ့အထိမ်းအမှတ်အနေနဲ့ ပြည်သူတွေ စိတ်နှလုံးချမ်းသာအောင်၊ လူသားအချင်းချင်းစာနာမှုတွေနဲ့ အကျဥ်းထောင်အသီးသီး၊ အချုပ်ထောင်အသီးသီး၊ စခန်းအသီးသီးကနေ ရာဇဝတ်ကျင့်ထုံး ပုဒ်မ ၅၀၅(က) နဲ့ ပြစ်ဒဏ်ကျခံနေရသူ ၂,၁၅၃ ယောက်ကို မတ်လ ၃ ရက် နေ့စွဲနဲ့ လွှတ်ပေးလိုက်တယ်လို့ စစ်ကောင်စီက ကြေညာထားပါတယ်။
လွတ်မြောက်ခဲ့သူတွေက ပုဒ်မ ၄၀၁၊ အပိုဒ် ၁ အရ နောက်ထပ် တစုံတရာ ပြစ်မှုကျူးလွန်ရင် ပထမလက်ကျန်နှစ်ကို ပြန်ခံရမယ်လို့ ထုတ်ပြန်ထားပါတယ်။
