ဧရာဝတီတိုင်း၊ အင်္ဂပူမြို့နယ်မှာ မေလ ၄ ရက်နေ့က လေပြင်းတိုက်ခတ်ခဲ့တာကြောင့် လူနေအိမ် ၆၄ လုံး ပျက်စီးတာတွေဖြစ်ပေါ်ခဲ့တယ်လို့ ဒေသခံတွေဆီက သိရပါတယ်။

ကုန်းပြင်ကျေးရွာအုပ်စုအတွင်းက ကျီးပင်ကျေးရွာ၊ ကုန်းပြင်ကျေးရွာ၊ ထုံးပေါ်ကျေးရွာ၊ ကျောက်တလုံး ကျေးရွာနဲ့ ကမ်းနားစုကျေးရွာတွေမှာ ရုတ်တရက် လေပြင်းတိုက်ခတ်ပြီး လူနေအိမ်တွေ ပျက်စီးခဲ့ပေမယ့် သေဆုံး ဒဏ်ရာရတာမျိုးတော့ မရှိဘူးလို့ မီးသတ်တပ်ဖွဲ့ကနေ သိရပါတယ်။

“ ရုတ်တရက်တိုက်တော့ အကုန်လုံး အမိုးလန်ကုန်တာ၊ သတင်းရတော့ ချက်ချင်းထွက်ပြီး ရှာဖွေ ကယ်ဆယ်ရေးတွေလုပ်ပေးခဲ့ပါတယ်၊ လူသေဆုံးတာမျိုးတော့ မရှိပါဘူး”လို့ တိုင်းမီးသတ်တပ်ဖွဲ့ဝင် တစ်ဦးက ပြောပါတယ်။

ရုတ်တရက် လေပြင်းတိုက်ခတ်မှုကြောင့် ကျီးပင်ကျေးရွာမှာ ၄၇ လုံး၊ ကုန်းပြင်ကျေးရွာမှာ ၄ လုံး၊ ထုံးပေါ်ကျေးရွာ ၆ လုံး၊ ကျောက်တလုံး ကျေးရွာမှာ ၂ လုံးနဲ့ ကမ်းနားစုကျေးရွာမှာ ၅ လုံး အမိုးလန် ပြိုကျ ပျက်စီးတာတွေ ဖြစ်ပေါ်ခဲ့တာလို့ ဆိုပါတယ်။

သီးခြားလွတ်လပ်တဲ့ မိုးလေဝသပညာရှင်တွေကတော့ ဧရာဝတီတိုင်းနဲ့ ရခိုင်ပြည်နယ်ကို မေလ ဒုတိယပတ်အတွင်း မုန်တိုင်း ဝင်ရောက်လာနိုင်တာကြောင့် သတိထားနေထိုင်ဖို့အတွက်လည်း ကြိုတင်အသိပေးထားပါတယ်။

ဧရာဝတီတိုင်း၊ အင်္ဂပူမြို့နယ်မှာ အောက်တိုဘာ ၁၆ ရက်နေ့ မနက်အစောပိုင်းက အမှတ် ၁ အခြေခံပညာ အထက်တန်းကျောင်းမီးလောင်းကျွမ်းခဲ့တယ်လို့ ဒေသခံတွေက ပြောပါတယ်။

အမှတ် ၁ ရပ်ကွက်မှာရှိတဲ့ အမှတ် ၁ အခြေခံပညာအထက်တန်းကျောင်းဟာ မနက် ၂ နာရီလောက်မှာ မီးစတင်လောင်ကျွမ်းခဲ့တာဖြစ်ပြီး အချိန် ၁ နာရီခွဲကြာ မီးလောင်ကျွမ်းခဲ့တာကြောင့် ၁ ကျောင်းလုံးနီးပါး မီးထဲပါသွားတယ်လို့ ဒေသခံတွေက ပြောပါတယ်။

“လူတွေအိပ်မောကျနေချိန်မှာဖြစ်တာ နှာမြောတာပေါ့ဗျာ၊ ကလေးတွေရဲ့ အနာဂတ်လေ စာသင်ကျောင်းဆိုတာ။ ပြီးတော့ ဒီကျောင်းက ရှေ့ဟောင်းကျောင်းကြီး၊ မီးမနိုင်တော့ အကုန်နီးပါ ပါသွားတာ” လို့ ဒေသခံတဦးက ပြောပါတယ်။

မီးလောင်ကျွမ်းခဲ့တဲ့ အထက ၁ စာသင်ကျောင်းဟာ လူအများအိပ်နေချိန် ဝါယာလျော့ဖြစ်ပြီး လောင်းကျွမ်းတာ ဖြစ်ပေမယ့် ရဲစခန်းနဲ့ နီးတာကြောင့် ကင်းတာဝန်ကျရဲကတော့ သိသင့်တယ်လို့ ဆိုပါတယ်။

မီးလောင်ကျွမ်းမှုနဲ့ ပတ်သက်ပြီး ကျောင်းက တာဝန်ရှိသူတွေကို စစ်ကောင်စီ လက်အောက်ခံရဲတပ်ဖွဲ့က စစ်ဆေးမေးမြန်းနေတယ်လို့ ဒေသခံတွေက ပြောပါတယ်။

မီးလောင်ကျွမ်းချိန်မှာ မီးသတ်ယာဉ် ၉ စီး၊ ရေသယ်ယာဉ် ၅ စီးနဲ့ မီးသတ်စက်ယာဉ် ၁ စီးအသုံးပြုကာ မီးငြှိမ်းသတ်ခဲ့တယ်လို့ မြန်မာနိုင်ငံမီးသတ်တပ်ဖွဲ့က သတင်းထုတ်ပြန်ထားပါတယ်။