ဧရာဝတီတိုင်း၊ အင်္ဂပူမြို့ အမှတ် ၁ အခြေခံပညာ အထက်တန်းကျောင်းမှာ အောက်တိုဘာ ၁၆ ရက် မနက်အစောပိုင်းက မီးလောင်ကျွမ်းခဲ့တာနဲ့ ပတ်သက်ပြီး စစ်ကောင်စီတပ်သားတွေနဲ့ ရဲတွေက ကျောင်းမှာစာသင်တဲ့ ဆရာ ဆရာမတွေကို ခေါ်ယူစစ်ဆေးနေပါတယ်။
စာသင်ကျောင်းမီးလောင်မှုနဲ့ပတ်သက်ပြီး ကျောင်းအုပ်အပါဝင် ဆရာ ဆရာမ ၄၀ ကျော်ကို အလှည့်ကျစနစ်နဲ့ ခေါ်ယူစစ်ဆေးနေတာလို့ ဒေသခံကျောင်းသားမိဘတွေက ပြောပါတယ်။
“ဆရာ ဆရာမအားလုံး ၄၀ ကျော်လောက်ရှိမယ်ထင်တယ် အဲ့တာအကုန်အစစ်ခံရမယ်ပြောတယ်။ ခုလည်း သူတို့အလှည့်ကျအစစ်ခံနေရတာ အဖမ်းခံရတာမျိုးတော့ မရှိသေးဘူး”လို့ ကျောင်းသားမိဘတဦးက ပြောပါတယ်။
စာသင်ကျောင်းမီးလောင်မှုကိစ္စ စစ်ကောင်စီလက်အောက်ခံတပ်သားတွေနဲ့ ရဲတွေက စစ်ကောင်စီခန့် တိုင်းအစိုးရအဖွဲ့ကိုတင်ပြခဲ့လို့ ခုလိုမျိုး ဆရာ ဆရာမတွေကို ကြိမ်းမောင်း စစ်ဆေးနေတာဖြစ်နိုင်တယ်လို့ ဆိုပါတယ်။
စာသင်ကျောင်းမီးလောင်မှုဟာ လျှစ်မီးဝါယာရှော့ဖြစ်ပြီးလောင်ကျွမ်းတာမျိုးဖြစ်နိုင်တယ်လို့ အင်္ဂပူမြို့မှာ မီးသတ်တာဝန်ထမ်းဆောင်နေတဲ့ လုံခြုံရေးအရ အမည်မဖော်လိုတဲ့ မီးသတ်တပ်ဖွဲ့အရာရှိတဦးက ခန့်မှန်းပြောပါတယ်။
ဧရာဝတီတိုင်း၊ အင်္ဂပူမြို့မှာ မတ် ၁၁ ရက်နေ့က ပျူစောထီးခေါင်းဆောင် လှိုင်ဝင်းအောင်ဆိုသူ အသတ်ခံရပြီးနောက်ပိုင်း ဒေသခံပြည်သူ ၅ ဦးကို စစ်ကောင်စီက စွပ်စွဲဖမ်းဆီးခဲ့တယ်လို့ သိရပါတယ်။
ပျူစောထီးခေါင်းဆောင် လှိုင်ဝင်းအောင် နေထိုင်တဲ့ ထန်းပင်ကုန်းကျေးရွာကို တော်လှန်ရေးတပ်ဖွဲ့တွေက သေနတ်နဲ့လာပစ်သွားပြီးနောက်ပိုင်း စစ်ကောင်စီတပ်သားတွေ ရောက်လာကာ မတ်လ ၁၁ ရက်နေ့မှာ အမျိုးသား ၂ ဦးကို ဖမ်းဆီးသွားတာလို့ ဒေသခံတွေက ပြောပါတယ်။
“ဖြစ်တဲ့နေ့က ၂ ယောက်ကို ဖမ်းသွားတာ၊ နောက်နေ့မှ ဈေးလာရောင်းတဲ့ကလေး ၃ ယောက်ကို ထပ်ဖမ်းသွားတာ။ အဓိက စစ်တာက မှတ်ပုံတင်နဲ့ သန်းခေါင်စာရင်းစစ်တာ” လို့ ဒေသခံတဦးက ပြောပါတယ်။
ပျူစောထီးခေါင်းဆောင်အသတ်ခံရတဲ့နေ့မှာ စစ်ကောင်စီတပ်သားတွေ မနက်ပိုင်းရောက်လာပြီး ရွာထဲဝင်စီးကာ ဆဲဆိုကြိမ်းမောင်းပြီး သူတို့စိတ်ထဲရှိတဲ့သူတွေကို ဖမ်းဆီးသွားတာလို့ ဆိုပါတယ်။
ပျူစောထီးခေါင်းဆောင်ကို သုတ်သင်ရှင်းလင်းတာဟာ စွန်ရဲနီ PDF တပ်ဖွဲ့က လုပ်တာလို့ ထုတ်ပြန်ခဲ့ပေမယ့် စစ်ကောင်စီတပ်သားတွေက ဒေသခံပြည်သူတွေကို စွပ်စွဲဖမ်းဆီးနေတာလို့ သိရပါတယ်။
