ရန်ကုန်တိုင်း၊ ကမာရွတ်မြို့နယ်၊ အမှတ် ၄ ရပ်ကွက်၊ ဘုရင့်နောင်လမ်းမကြီး အင်းဝဘဏ်ရှေ့မှာ ဧပြီ ၂၇ ရက် ည ၇ နာရီလောက်က အငှားယာဉ်မောင်းတဦး ဓားထိုးခံရပြီး သေဆုံးခဲ့တယ်လို့ ဒေသခံတွေက ပြောပါတယ်။

ကားငှားတဲ့ပုံစံနဲ့ လူ ၃ ယောက်က ကားကိုရပ်ခိုင်းပြီး ကားရပ်ပေးတဲ့အချိန် အငှားယာဉ်မောင်းဆီကနေ လုယက်ခဲ့တာလို့ ပြောပါတယ်။

“ကားငှားသလိုနဲ့ လူ ၃ ယောက်က ကားကိုတားတာ။ ကားရပ်တဲ့အချိန် ယာဉ်မောင်းကို ဓားထောက်ပြီး ပိုက်ဆံအိတ်၊ ဖုန်းတွေကို ဝင်လုလို့ အငှားယာဉ်မောင်းက ပြန်ခုခံတဲ့အတွက် လုယက်သူတွေက ဓားနဲ့ အချက်ပေါင်းများစွာထိုးပြီး ထွက်ပြေးသွားကြတာ” လို့ ဒေသခံတွေက ပြောပါတယ်။

ဓားထိုးခံရတဲ့ အငှားယာဉ်မောင်းကို နီးစပ်ရာ လူမှုကူညီရေးအသင်းကားနဲ့ ဆေးရုံကို ပို့ဆောင်ပေးခဲ့ရာ လမ်းမှာတင် သေဆုံးခဲ့တယ်လို့ ဒေသခံ လူမှုကူညီရေးအသင်းဆီက သိရပါတယ်။

အခင်းဖြစ်ပွားခဲ့တဲ့နေရာကို ည ၁၀ နာရီလောက်မှာ စစ်ကောင်စီတပ်နဲ့ လုံခြုံရေး လှည့်ကင်းအဖွဲ့တွေ‌ ရောက်ရှိလာပြီး ဗဟိုလမ်း အောက်ပိုင်းမှာရှိတဲ့ လက်ဘက်ရည်ဆိုင်တွေ အပါအဝင် တခြား မသင်္ကာတဲ့ဆိုင်တွေကို စစ်ဆေးမေးမြန်းတာတွေ လုပ်ဆောင်သွားတယ်လို့ အနီးအနားမှာ နေထိုင်သူတွေက ပြောပါတယ်။

ကမာရွတ်မြို့နယ်အတွင်း ရပ်ကွက်တိုက်ခန်းနဲ့ လမ်းတွေပေါ်မှာ ခိုးဆိုးလုယက်မှုတွေ ပိုမိုများပြားလာပြီး စစ်ကောင်စီလက်အောက်ခံ မြို့နယ်ရဲတပ်ဖွဲ့က ပြစ်မှုကျူးလွန်သူတွေကို မဖမ်းဆီးနိုင်တဲ့အတွက် တရားဥပဒေစိုးမိုးမှု မရှိတော့တဲ့အပြင် ပြည်သူတွေအနေနဲ့ လုံခြုံမှုမရှိတော့ဘူးလို့ ရပ်ကွက်နေပြည်သူတွေဆီက သိရပါတယ်။

ရန်ကုန်တိုင်း၊  ဒဂုံမြို့သစ်(တောင်ပိုင်း) မြို့နယ်မှာ ပျောက်ဆုံးနေတဲ့  အငှားယာဉ်မောင်း အမျိုးသားတယောက်ကို  ဇန်နဝါရီ ၅ ရက်က တွံတေးမြို့နယ်အတွင်း နောက်ပြန်ကြိုးတုပ် ဒဏ်ရာတွေနဲ့  သေဆုံးလျက် တွေ့ရှိခဲ့တယ်လို့ ပရဟိတအဖွဲ့ထံက သိရပါတယ်။

အငှားယာဉ်မောင်း ကိုကျော်ဝင်းထွန်းဟာ  ဇန်နဝါရီ ၄ ရက်က အငှားယာဥ်နဲ့ ပစ္စည်းလိုက်ပို့သူ ဖြစ်ပြီး ညပိုင်းမှာ မိသားစုနဲ့အဆက်အသွယ်​ပြတ်ကာ ပျောက်ဆုံးသွားခဲ့တာပါ။

သူ့ကို  ဇန်နဝါရီ ၅ ရက် ည ၉ နာရီမှာ တွံတေးမြို့နယ် မမျိုးစုရွာနဲ့ကင်းရွာကြား မလက်တို-ခတ္တိယ လမ်းပိုင်းမှာ လက်ကို နောက်ပြန်ကြိုးတုပ် မျက်နှာဖူးရောင်ဒဏ်ရာတွေနဲ့ သေဆုံးလျက် ပြန်တွေ့ရှိခဲ့ပါတယ်။

သွားရောက်ကူညီပေးခဲ့တဲ့ ပရဟိတ အဖွဲ့တာဝန်ရှိသူ တဦးက "ကိုယ်တုံးလုံးချွတ် အနေအထားနဲ့ သူဝတ်ထားတဲ့ ပုဆိုးနဲ့ လက်ကို နောက်ပြန်တုပ်ထားတယ်။ ပါးစပ်နဲ့ မျက်နှာကိုလည်း အဝတ်နဲ့စည်းထားတယ်။ ထိုးသွင်းဒဏ်ရာတော့ မရှိဘူး။ မျက်နှာမှာတော့ ဖူးရောင်ဒဏ်ရာ တွေ့တယ်။ အသက်ရှူကြပ်ပြီး သေသွားတာ ဖြစ်နိုင်တယ်။ လမ်းဘေးမှာ စွန့်ပစ်ထားတဲ့အနေအထားပါ”လို့ ပြောပါတယ်။

ကိုကျော်ဝင်းထွန်းဟာ အငှားယာဥ်နဲ့ ပစ္စည်းလိုက်ပို့တာ တလဝန်းကျင်ပဲ ရှိသေးတယ်လို့ သူနဲ့ နီးစပ်သူတွေက ပြောပါတယ်။

တွံတေးမြို့နယ်မှာတွေ့ရတဲ့ ကိုကျော်ဝင်းထွန်းရဲ့ ရုပ်အလောင်းကို ပရဟိတအဖွဲ့က လှိုင်သာယာဆေးရုံကြီးကို ပို့ဆောင်ပေးခဲ့ပါတယ်။ 

၂၀၂၂ ခုနှစ် ဒီဇင်ဘာ ၁ ရက်ကလည်း ထောက်ကြန့်မြို့နယ်မှာ အငှားယာဥ်မောင်း တယောက် အသတ်ခံရပြီး ကားလုခံရမှု ဖြစ်ပွားခဲ့ပါတယ်။