စစ်ကိုင်းတိုင်း၊ အရာတော်မြို့ပေါ်မှာ ဒီနေ့ ဩဂုတ် ၂ ရက်၊ မနက်ခင်းပိုင်းက စတင်ပြီး စစ်ကောင်စီတပ်က အစစ်ဆေးတွေ တင်းတင်းကျပ်ကျပ် ပြုလုပ်နေတယ်လို့ အရာတော်မြို့ ဒေသခံတွေက ပြောပါတယ်။

အခုလိုစစ်ဆေးရင်း အမျိုးသမီးတွေကို ရုန့်ရင်းကြမ်းတမ်းစကားတွေနဲ့ ဆဲဆိုတာ‌တွေ ပြုလုပ်တယ်လို့လည်း ဆိုပါတယ်။

လုံခြုံရေးအရ အမည်မဖော်လိုတဲ့ ဒေသခံတဦးက “ကျမက အရာတော်တောင်ပိုင်းက ကျေးရွာတရွာကပါရှင့်။ ဒီနေ့မနက်ခင်း အရာတော်မြို့ပေါ်ကို ဈေးသွားဝယ်တာ သူတို့စစ်ဆေးတာ ခံခဲ့ရတယ်။ သူတို့ ဘာတွေ စစ်ဆေးတာလဲဆိုတော့ ဘယ်ကလာတာလဲ၊ ဘာဝယ်မှာလဲ ပထမက အဲလိုမေးတယ်။ နောက်ပြီး ပါတဲ့ ခြင်းတွေ၊ အိတ်တွေ အကုန်စစ်တယ်။ နောက်ပြီး ဆဲဆိုတာတွေလုပ်တယ်။ မြန်မြန်လုပ်၊ နင်တို့နယ်က နင်တို့လင်တွေ လက်နက်ကိုင်ပြီး ငါတို့ကို တော်လှန်နေလို့ ငါတို့ အခုလို အလုပ်ရှုပ်နေရတယ်။ အဲဒီလိုတွေ ဆဲတာတွေ လုပ်တယ်” လို့ ပြောပါတယ်။

စစ်ကောင်စီတပ်ကတော့ စစ်ဆေးတာတွေကို အရာတော်မြို့အနောက်ထွက်က ကမ္ဘောဇ စာသင်ကျောင်းရှေ့မှာ တဖွဲ့နဲ့ အရာတော်မြို့ တောင်အထွက်မှာ တဖွဲ့ စုစုပေါင်းနှစ်ဖွဲ့နဲ့ စစ်ဆေးတာတွေ လုပ်ဆောင်နေတယ်လို့ ဒေသခံတွေ ပြောပါတယ်။

အခုလို စစ်ကောင်စီတပ်က ပြုလုပ်နေတာကြောင့် အရာတော်မြို့နယ်အတွင်းက ကျေးရွာသားတွေဟာ အရာတော်မြို့ပေါ် ဈေးသွားဝယ်ရတာကို ကြောက်ရွံ့လာကြပြီး ဆေးဝါးတွေနဲ့ မီးဖိုချောင်သုံး ဆား၊ ဟင်းချိုမှုန့်၊ ငါးပိ၊ ငါးခြောက် စတာတွေပါ ပြတ်လပ်နေပြီလို့လည်း ဒေသခံတွေက ပြောပါတယ်။

စစ်ကိုင်းတိုင်း၊ ကလေးမြို့ အောင်မြေမာန်ရပ်ကွက် ရွှေဘုံသာဘုရားကြီးအနီး လျှပ်စစ်ရုံးဝင်းအတွင်းနားမှာ ဇူလိုင် ၁၉ ရက် အာဇာနည်နေ့က ဗုံးပေါက်ကွဲမှု နှစ်ကြိမ်ဖြစ်ပွားခဲ့တယ်လို့ ဒေသခံတွေက ဒီဗွီဘီကိုပြောပါတယ်။

မနက်ပိုင်းက ဗုံးပေါက်ကွဲမှု ဖြစ်ပွားခဲ့တာဖြစ်ပြီး အဆိုပါ ဗုံးပေါက်ကွဲတဲ့ ပတ်ဝန်းကျင်တလျှောက်မှာ စစ်ကောင်စီတပ်သားတွေကေ ဒေသခံလမ်းသွားလမ်းလာတွေကို တင်းကျပ်စွာ‌ စစ်ဆေးနေတယ်လို့ စစ်ဆေးခံခဲ့ရသူတဦးက ပြောပါတယ်။

“ရွှေဘုံသာဘုရားကြီးနားက လျှပ်စစ်ရုံးအတွင်းမှာ ဗုံးပေါက်ကွဲသံ နှစ်ကြိမ်ကြားလိုက်ရတာ၊ လျှပ်စစ်ရုံးထဲမှာ စစ်သားတွေရှိတယ်။ အဲ့ဒီ‌ ရွှေဘုံသာနားမှာလည်း စစ်သားတွေက အမြဲလိုလို ကင်းပုန်းဝပ်လေ့ရှိတယ်၊ လမ်းသွားလမ်းလာတွေကို ဆိုင်ကယ်ရပ်ခိုင်းပြီး တူးဘောက်တွေ လှန်ပြရတယ်၊ ပါလာတဲ့အထုပ်တွေ အိတ်တွေကို ဖြေပြရတယ်” လို့ ပြောပါတယ်။

ဗုံးပေါက်ကွဲမှုကြောင့် ထိခိုက်ပျက်စီးတာတွေ ကြီးကြီးမားမားမရှိခဲ့ဘူးလို့ သိရပြီး အနီးနားပတ်ဝန်းကျင်က ဒေသခံတွေ ထိတ်လန့်ကြောက်ရွံ့မှုတွေ ဖြစ်ပွားခဲ့တယ်လို့ ပြောပါတယ်။

ဇူလိုင် ၁၉ ရက် ကျရောက်တဲ့ ၇၅ နှစ်မြောက် အာဇာနည်နေ့မှာ စစ်ကောင်စီတပ်တွေက မြို့တွင်းနေရာအများအပြားမှာ လုံခြုံရေးရယူထားပြီး ဒေသခံလမ်းသွားလမ်းလာတွေ စစ်ဆေးမှုတွေ ပြုလုပ်‌နေပါတယ်။