အခုနှစ် ကျရောက်မယ့် မန္တလေးသင်္ကြန်ကို ကျင်းပဖို့  အာဏာသိမ်းစစ်ကောင်စီက ကျုံးအတွင်းမှာ ပြင်ဆင်နေပါတယ်။

ကျုံးပတ်လည် တလျှောက်က လမ်းတချို့မှာလည်း အခုကတည်းက ပိတ်ဆို့ထားပြီး လုံခြုံရေး အင်မတန်တင်းကျပ်နေတယ်လို့ သိရပါတယ်။ ဧပြီ ၁၀ ရက်နေ့ကလည်း ကျုံးမြောက်ဘက် လူနေရပ်ကွက်တချို့မှာ စစ်ကောင်စီတပ်ဖွဲ့ဝင်တွေက ရှာဖွေစစ်ဆေးမှုတွေ တင်းတင်းကျပ်ကျပ် ပြုလုပ်ခဲ့ပါတယ်။

သင်္ကြန်ပွဲကို လောင်းလှေတွေ၊ လှည်းယာဉ်တွေနဲ့ ကျင်းပဖို့ ပြင်ဆင်နေပြီး ဧပြီ ၁၁ ရက်နေ့မှာတော့ ဖွင့်ပွဲအတွက် အစမ်းလေ့ကျင့်မှုကို ကျုံးရေပြင်နဲ့ နန်းမြို့ရိုးအကြား ပတ်လမ်းတလျှောက် လုပ်ဆောင်နေတယ်လို့ သိရပါတယ်။

သင်္ကြန်အကြိုနေ့မှာတော့ မန္တလေးစည်ပင်ရှေ့က ဗဟိုမဏ္ဍပ်မှာ ဖွင့်ပွဲကျင်းပမှာဖြစ်ပြီး ပြင်ပလူ ဝင်ရောက်ခွင့်မပြုဘူးလို့ သိရပါတယ်။ သင်္ကြန်ဖွင့်ပွဲနဲ့အတူ ကျုံးရေပြင်အတွင်း တည်ဆောက်ထားတဲ့ ရတနာပုံ အပန်းဖြေဥယျာဉ်ကိုလည်း ဖွင့်လှစ်မယ်လို့ သိရပါတယ်။

တော်လှန်ရေးကာလအတွင်း စစ်အုပ်စုကကျင်းပတဲ့ သင်္ကြန်ပွဲတော်မှာ ပါဝင်ဆင်နွှဲခြင်းမပြုကြဖို့နဲ့ သင်္ကြန်ကာလအတွင်း စစ်ရေးလှုပ်ရှားမှုတွေ အရှိန်မြှင့်လုပ်ဆောင်သွားမယ်လို့ မန္တလေးတိုင်း ပြည်သူ့ကာကွယ်ရေးတပ်မတော်က ကြေညာချက်ထုတ်ပြန်ထားပါတယ်။

ဒီကနေ့ မနက်ပိုင်း သင်္ကြန်ဖွင့်ပွဲအတွက် အစမ်းလေ့ကျင့်နေစဉ် ၆၂ လမ်းနဲ့ လမ်း ၃၀ ထောင့်က ဒုက္ခစရိယ ဘုရားဝင်းအတွင်း ပေါက်ကွဲမှုဖြစ်ပြီး မော်တော်ယာဉ် ၁ စီး ပျက်စီးကာ ၄ ဦး ဒဏ်ရာရရှိခဲ့ပြီး ဘယ်အဖွဲ့က ဖောက်ခွဲတယ်ဆိုတာ မသိရသေးပါဘူး။

အင်ဒိုနီးရှားနိုင်ငံ၊ ဘာလီကျွန်းကလေဆိပ်ဟာ နိုင်ငံတကာ ခရီးသွားဧည့်သည်တွေကို ကြိုဆိုဖို့ လုပ်ငန်းစဉ်တွေ အသင့်ဖြစ်ရေး အောက်တိုဘာ ၉ ရက်က အစမ်းလေ့ကျင့်ခဲ့ပါတယ်။

ကိုရိုနာဗိုင်းရပ်စ် ကူးစက်ကပ်ဘေးကြောင့် လုံးဝနီးပါး ပိတ်ထားရတဲ့ ဘာလီလေဆိပ်ကို အောက်တိုဘာ ၁၄ ရက်က စပြီး ပြန်ဖွင့်ဖို့ အစိုးရက ဆုံးဖြတ်အပြီး ခုလို လေ့ကျင့်တာပါ။

ရာချီတဲ့ လေဆိပ်ဝန်ထမ်းတွေက နိုင်ငံခြားသားခရီးသည်တွေကို ဝန်ဆောင်မှုပေးရမှာ ဖြစ်လို့ ပထမဆုံး နိုင်ငံတကာ လေကြောင်းခရီးစဉ်တွေကို ကြိုဆိုမယ့် လုပ်ငန်းစဉ်တွေအကြောင်း လေဆိပ် အရာရှိတွေက သတင်းထောက်တွေကို လိုက်လံ ပြသရှင်းပြခဲ့ပါတယ်။

ခရီးသည်တွေဟာ ကိုဗစ်-၁၉ ကပ်ရောဂါ ကူးစက်ခံ ဟုတ်မဟုတ် စမ်းသပ်ခံအပြီး ရောဂါခြေချုပ်နဲ့ ၈ ရက် နေရမှာပါ။

ဘာလီကျွန်းအတွက် ခရီးသွားလုပ်ငန်းဟာ အဓိက ဝင်ငွေရင်းမြစ် ဖြစ်လို့ ပြန်ဖွင့်ပေးတာကို ဒေသခံတွေက စိတ်လှုပ်ရှားနေခဲ့ပါတယ်။

အရှေ့တောင်အာရှရဲ့ အကြီးဆုံး စီးပွားရေးနိုင်ငံ အင်ဒိုနီးရှားမှာ ကိုဗစ်-၁၉  ကပ်ရောဂါ ပြန်ကူးစက်နေပြီး လူမှုရေးကန့်သတ်ချက်တွေက တိုင်းပြည်ရဲ့ စီးပွားရေး နာလန်ပြန်ထဖို့ အရေး အဟန့်အတား ဖြစ်နေပါတယ်။