ပါကစ္စတန်နိုင်ငံတောင်ပိုင်း ကရာချီမြို့မှာ အစားအစာထောက်ပံ့ရေး ဖြန့်ဝေမှုအတွင်း လူအုပ်တက် နင်းခံရမှုကြောင့် မတ် ၃၁ ရက်မှာ လူ ၁၁ ဦး သေဆုံးခဲ့ရတယ်လို့ ကျန်းမားရေးဆိုင်ရာ တာဝန်ရှိသူတဦးက ပြောပါတယ်။ 

ဒါဟာ ပြီးခဲ့တဲ့ရက်သတ္တပတ်တွေအတွင်း နိုင်ငံရဲ့ စီးပွားရေးအကျပ်အတည်းဆိုင်ရာ နောက်ဆက်တွဲ ဆိုးကျိုးဖြစ်ရပ်တွေထဲကတခုလည်းဖြစ်ပါတယ်။ 

ဒီဖြစ်ရပ်အတွင်း သေဆုံးသူတွေထဲမှာ အမျိုးသမီး ၅ ဦး နဲ့ ကလေးငယ် ၃ ဦး ပါဝင်ပြီး စက်ရုံ တခုက ပရဟိတဖြန့်ချိရေးနေရာမှာလည်း အလုအယက် ပြေးလွှားမှုတွေကြောင့် ဒဏ်ရာရသူ ၅ ဦးကို ဆေးရုံတင်ထားရတယ်လို့ ရဲတပ်ဖွဲ့က ပြောကြားပါတယ်။

အစိုးရ ကျောထောက်နောက်ခံပြု ငွေကြေးဖောင်းပွမှုဆိုင်ရာ သက်ရောက်မှုဖြေလျှော့ရေး အစီအစဉ် တစိတ်တပိုင်းအဖြစ် နိုင်ငံတဝန်းက ဂျုံဖြန့်ချိပေးရေးစင်တာတွေမှာ လူထောင် ပေါင်းများစွာ စုဝေးခဲ့ကြတာပါ။ 

ငွေကြေးဖောင်းပွမှုကလည်း ရာခိုင်နှုန်း ၃၀ ကျော်အထိ နှစ်ပေါင်း ၅ဝ ကြာ မြင့်တက်နေပါတယ်။

ပါကစ္စတန်နိုင်ငံရှိ အခြားပြည်နယ်တွေက အများပြည်သူဖြန့်ချိပေးရေး နေရာတွေမှာလည်း ပြီးခဲ့တဲ့ ရက်သတ္တပတ်တွေအတွင်း အနည်းဆုံး လူ ၅ ဦးသေဆုံးကာ လူအများအပြား ထိခိုက်ဒဏ်ရာ ရရှိခဲ့ပါသေးတယ်။ 

ဒီလိုဖြန့်ချိပေးရေးနေရာတွေနဲ့ ထရပ်ကားတွေပေါ်က ဂျုံအိတ် ထောင်ပေါင်းများစွာလည်း လုယက်ခံခဲ့ရတယ်လို့ တရားဝင်မှတ်တမ်းတွေအရ သိရပါတယ်။ 

ပါကစ္စတန်ရဲ့ ငွေကြေးတန်ဖိုး ကျဆင်းမှုအပြင် နိုင်ငံတကာငွေကြေး ရန်ပုံငွေအဖွဲ့နဲ့ သဘောတူညီ ထားတဲ့ ထောက်ပံ့ကြေးတွေ ဖယ်ရှားလိုက်တာကြောင့် မြင့်တက်လာတဲ့ ကုန်ကျစရိတ်တွေနဲ့ ရင်ဆိုင်နေရတဲ့ ပြည်သူတွေရဲ့ အကျပ်အတည်းကို ဒီဖြစ်ရပ်တွေက ထင်ရှားစေခဲ့ပါတယ်။

နိုင်ငံတကာငွေကြေးရန်ပုံငွေအဖွဲ့အနေနဲ့လည်း ပါကစ္စတန်နိုင်ငံအတွက် ဘဏ္ဍာရေးဆိုင်ရာ အထောက်အပံ့ပေးရေး အစီအစဉ်အပေါ် ခွင့်ပြုပေးဖို့ရှိပါတယ်။ 

ပြီးခဲ့တဲ့နှစ်အတွင်း ပါကစ္စတန်နိုင်ငံမှာ ဂျုံဈေးနှုန်း ၄၅ ရာခိုင်နှုန်းအထိ မြင့်တက်လာခဲ့သလို အခြေခံကုန်ပစ္စည်းတွေလည်း ဈေးတက်လာပါတယ်။ 

ဒါကြောင့် ပါကစ္စတန်အစိုးရက အစ္စလာဘာသာဝင်တွေရဲ့  ဥပုသ်လဖြစ်တဲ့ ရာမဒန်ကာလအတွင်း အကူအညီ လိုအပ်နေတဲ့ သန်းပေါင်းများစွာသော မိသားစုတွေအတွက် ဂျုံဖြန့်ချီပေးရေး အစီအစဉ်ကို ပြီးခဲ့တဲ့အပတ်က စတင်လုပ်ဆောင်ခဲ့တာပါ။။

ရှမ်းနဲ့ကရင်နီ(ကယား) ပြည်နယ်စပ်မှာ မေ ၁၂ ရက်က စတင်ဖြစ်ပွားခဲ့တဲ့ တိုက်ပွဲတွေကြောင့် ဒေသခံထောင်ချီ ထွက်ပြေး တိမ်းရှောင်နေကြရပြီး အရေးပေါ်အကူအညီတွေ လိုအပ်နေပါတယ်။

ဖယ်ခုံမြို့နယ် အရှေ့ဘက်ခြမ်း ကျေးရွာတွေဖြစ်တဲ့ ဟိုပန်၊ လင်လန်၊ တောင်ပို့ကွဲ၊ တောင်ပို့ကြီး၊ နားဟီး၊ နားကုံး၊ နမ့်တုတ်၊ မတ်ဆုမ့်ခွန်၊ လွိုင်နွဲ့၊ လဟယ် အစရှိတဲ့ ကျေးရွာ ၂၀ ကျော်က  ဒေသခံတွေက ထွက်ပြေးတိမ်းရှောင်နေကြရတာပါ။

စစ်ရှောင်တွေဟာ ဖယ်ခုံမြို့နယ် အနောက်ဘက်ခြမ်း ကျေးရွာတွေ၊ လွိုင်ကော်မြို့နယ် ပိန်းချစ် ကျေးရွာအုပ်စုတွေနဲ၊ ရှမ်းပြည်နယ် ဆီဆိုင်မြို့နယ်တွေကို ထွက်ပြေးတိမ်းရှောင်နေကြရတာပါ။

ဖယ်ခုံမြို့နယ် အနောက်ဘက်ခြမ်းက  ခေါင်အိ၊ ရေလုံရေကန်၊ ယဉ်နွှဲ အစရှိတဲ့ ကျေးရွာအုပ်စုတွေမှာ သွားရောက်ခိုလှုံနေသူတွေအတွက် နေရာထိုင်ခင်းနဲ့ အစားသောက်တွေ လိုအပ်နေတယ်လို့ စစ်ရှောင်တွေကို ကူညီနေတဲ့ ခွန်းရာဇာမောင်က ပြောပါတယ်။

“အခုက သူတို့နေရာထိုင်ခင်းတွေ မလုံလောက်တော့ဘူးပေါ့နော်။ ဒီဘက်မှာ အစကတည်းက ဒီးမော့ဆို စစ်ရှောင်တို့ ဘာတို့က နဂိုကတည်းက ရှိနေပြီးသား၊ သူတို့ ထပ်ရောက်လာတော့ အမိုးအကာ၊ စောင်၊ ခြင်ထောင်တို့ အဲလို မိုးလည်းရွာတော့ ဆေးဝါး၊ နေရာထိုင်ခင်း အစားသောက်ပေါ့။ အစားသောက်ကတော့ ကျနော်တို့ နိုင်သလောက်တော့ ကူနေတာပေါ့နော်၊ ဒါပေမယ့် အခုက ပြတ်နေပြီပေါ့နော်။ နဂို သူတို့မလာခင်ကတည်းက စစ်ဘေးရှောင်အများအပြား  ရှိနေတယ်၊ သူတို့ ထပ်ရောက်လာတော့ အဲဒီလို ဖြစ်တာပေါ့။”

အလားတူ လွိုင်ကော်မြို့နဲ့ ၁၈ မိုင်လောက်ဝေးတဲ့ ရှမ်းနယ်စပ် ပိန်းချစ်ကျေးရွာမှာလည်း ဖယ်ခုံအရှေ့ခြမ်းက စစ်ရှောင် ၁၀၀၀ ကျော် ရောက်ရှိ ခိုလှုံနေတယ်လို့ ပိန်းချစ်ကျေးရွာ သီရိမင်္ဂလာကျောင်းက ဆရာတော် ဦးကောဝိဒ က မိန့်ပါတယ်။

“စစ်ရှောင်တွေက ၁၂ ရက်နေ့ကတည်းက ရောက်လာတာ၊ ပိန်းချစ်ကျောင်းနဲ့ ပိန်းချစ်ရွာထဲက စာသင်ကျောင်းထဲမှာကော၊ ဆေးခန်းမှာကော ထားပေးတယ်။ နောက်တော်တော်များများ အိမ်တွေမှာလည်း ထားပေးတယ်။ အုလောလောဆယ်တော့ ၉၀၀ ကျော်ရှိသွားပြီ။ မနေ့က စာရင်းက ၉၇၆ ဦး၊ ဒီနေ့က စာရင်းထပ်ကောက်ရမယ်။ ဦးဇင်းကတော့ ကျောင်းအောက်မှာရော၊ ကျောင်းပေါ်မှာကောထားတယ်။ သူတို့မိသားစုနဲ့ သူတို့ ချက်စားကြတာပေါ့နော်။ ဦးဇင်းတို့က အလှူရှင်တွေဆီကနေ လှူလာတဲ့ ဆန်တွေရော၊ ဟင်းသီးဟင်းရွက်တွေကော ထုတ်ပြီးတော့ ဝေပေးနေတယ်။”

ပိန်းချစ်ရွာမှာ လူဦးရေများတဲ့အတွက် လတ်တလောက်မှာတော့ သောက်သုံးရေနဲ့ စားစရာ လိုအပ်နေတယ်လို့ ဆိုပါတယ်။

ဖယ်ခုံမြို့နယ်အရှေ့ခြမ်း လဟယ်ကျေးရွာကနေ ထွက်ပြေးတိမ်းရှောင်လာတဲ့ စစ်ရှောင် အမျိုးသမီးလူငယ်တဦးက “သေနတ်သံတွေကြားရလို့ ကြောက်လို့ပြေးလာရတာရှင့်။”  လို့ ပြောပါတယ်။

လဟယ်ကျေးရွာမှာ အိမ်ခြေ ၉၀ လောက်ရှိပြီး လက်ရှိအမျိုးသမီးနဲ့ကလေးငယ်တွေက ထွက်ပြေး တိမ်းရှောင်နေကြရပြီး တချို့ကတော့ အိမ်စောင့်အနေအနဲ့ ကျန်ခဲ့ကြပါတယ်။

မေ ၁၂ ရက်က ဖယ်ခုံ၊ ညောင်ရွှေနယ်စပ်က ထီရိရွာက  စစ်ကောင်စီကင်းစခန်းကို ပြည်သူ့ကာကွယ်ရေးပူးပေါင်းတပ်ဖွဲ့တွေ သိမ်းပိုက်နိုင်ခဲ့ပြီး စစ်ကောင်စီ ဗိုလ်မှူးတယောက် အပါအဝင် ၁၅ ယောက် သေဆုံးခဲ့ပါတယ်။

အဲဒီနေ့ နောက်ပိုင်းကပြီး အဆိုပါ ဖယ်ခုံအရှေ့ဘက်ခြမ်းမှာ နေ့စဉ် တိုက်ပွဲဖြစ်ပွားနေပြီး မေ ၁၆ ရက်ကလည်း ဆောင်နန်းခဲကျေးရွာ မီးရှို့ဖျက်ဆီးခံလိုက်ရပါတယ်။

နေ့စဉ်နဲ့အမျှ ဖြစ်ပွားနေတဲ့ တိုက်ပွဲတွေအတွင်း စစ်ကောင်စီဘက်ကရော၊ ပြည်သူ့ကာကွယ်ရေး တပ်ဘက်ကပါ ထိခိုက်ကျဆုံးမှုတွေ ရှိနေပါတယ်။