တူရကီနိုင်ငံ အစ္စတန်ဘူလ်မြို့မှာ နိုဝင်ဘာ ၂၉ ရက်က လေပြင်းမုန်တိုင်းတိုက်ခတ်လို့ လူ ၄ ယောက် သေဆုံးပြီး ၁၉ ယောက် ဒဏ်ရာရပါတယ်။
သေဆုံးသူ ၄ ယောက်ထဲက တယောက်ဟာ နိုင်ငံခြားသားဖြစ်ပြီး ဒဏ်ရာရသူ ၃ ယောက်က အသည်းအသန်အခြေအနေမှာ ရှိနေတယ်လို့ အစ္စတန်ဘူလ်အုပ်ချုပ်ရေးမှူးရုံးက ပြောပါတယ်။
လေပြင်းဟာ မြို့ကို ၁ နာရီ ၈၁ မိုင်နှုန်းနဲ့ တိုက်ခတ်ခဲ့တာလို့ တူရကီ မိုးလေဝသအထွေထွေ ညွှန်ကြားရေးရုံးက ပြောပါတယ်။
လေပြင်းကြောင့် အိမ်အမိုးတွေ လွင့်ထွက်ခဲ့သလို ဆိုင်းဘုတ်တွေလည်း ပြုတ်ကျခဲ့ပါတယ်။ မုန်တိုင်းဒီရေလည်း တက်လာခဲ့လို့ လမ်းတွေပေါ်မှာ ပင်လယ်ရေတွေ ရောက်လာခဲ့ပြီး ဘော့စ်ဖိုးရပ်စ် ကမ်းရိုးတန်းတလျှောက် လှိုင်းတွေ ရိုက်ခတ်ခဲ့တယ်လို့ ရိုက်တာသတင်းမှာ ဖော်ပြထားပါတယ်။
တူရကီအလံလွှင့်ထားတဲ့ တားကစ်ရှ်လေကြောင်းလိုင်းဟာလည်း ခရီးစဉ်တွေ အနှောင့်အယှက်ဖြစ်ခဲ့ပြီး ဘော့စ်ဖိုးရပ်စ်ဆိပ်ကမ်းကိုလည်း သင်္ဘောအတင်အချ မလုပ်ဖို့ ပိတ်ထားရပါတယ်။
