ကရင်ပြည်နယ်၊ မြဝတီမြို့နယ်ထဲမှာ ၄ လကျော်ကြာတဲ့အထိ လျှပ်စစ်မီးမရရှိတဲ့အပြင် ဒေသခံပြည်သူတွေ ထမင်းဟင်းချက်ပြုတ်ရာမှာ မီးသွေးနဲ့ ဂက်စ်တွေကို အသုံးပြုနေကြရပြီး မီးသွေးနဲ့ ဂက်စ်ကလည်း ဈေးတွေ အဆမတန်မြင့်တက်လာတယ်လို့ မြဝတီမြို့နေ ဒေသခံတွေထံက သိရပါတယ်။
၂၀၂၂ ခုနှစ် ဒီဇင်ဘာ ၁၆ ရက်ကနေ ဧပြီ ၂၀ ရက်နေ့ ၄ လကျော် ကြာတဲ့အထိ လျှပ်စစ်မီးလိုင်းတွေ ပြတ်တောက်နေတာကြောင့် မီးပျက်တဲ့အချိန်ကစပြီး မီးဖိုချောင်သုံး မီးသွေးနဲ့ ဂက်စ်ဓာတ်ငွေ့ရည် ဝယ်ယူရာမှာ ဈေးတွေမြင့်တက်လာတာလည်း ဖြစ်ပါတယ်။
အိမ်သုံး မီးသွေးအိတ်ကြီးတအိတ်ကို အရင် မီးမပျက်ခင်က ၃,၀၀၀ ပေးဝယ်ခဲ့ပြီး မီးပျက်ပြီး နောက်ပိုင်းမှာတော့ ၈,၀၀၀ ကနေ ၁၂,၀၀၀ ထိ ပေးဝယ်နေရတဲ့အပြင် အိတ်အပြည့်မရတော့ဘဲ တဝက်သာရတော့တယ်လို့ ရွှေတိဂုံပုံတူဘုရားအနီးက ရပ်ကွက်တွင်း နေထိုင်သူတဦးက ပြောပါတယ်။
“မီးသွေးကတော့ မီးပျက်တဲ့အချိန်ကစပြီးတော့ကို ဈေးတွေတက်တက်ကုန်တာ။ မီးသွေးက ၈,၀၀၀ ဆိုရင် အပေါစားပဲရတယ်။ ပြာငုံတယ်လေ၊ ထည့်ပြီးတာနဲ့ သုံးမကောင်းတော့ဘူး၊ မီးသေသွားတယ်။ ၁၂,၀၀၀ လောက်မှ ကောင်းကောင်းသုံးရတာ။ ပြီးရင်လည်း မီးသွေးက ဆန် ၂၄ ပြည် အိတ်အကြီးနဲ့ကို အပြည့်ကမရဘူး၊ တဝက်လောက်ပဲ ရတော့တယ်လေ၊ အရင်က အပြည့်နီးပါးရတယ်။”
မြဝတီမြို့အတွင်း ဂက်စ်အိုးဖြည့်တဲ့အခါမှာ အရင်က 4Kg ဂက်စ်အိုး ၁ လုံးကို ၆,၀၀၀ ကျပ်ပေးရပြီး အခုချိန်မှာ ၁၅,၀၀၀ ကျပ်ပေးပြီး ဓာတ်ငွေ့ရည်ဖြည့်ရတယ်လို့ ဆိုပါတယ်။ ဒါ့အပြင် ဂက်စ်ဖြည့်တဲ့အခါမှာ အရင်လို ရက်ကြာကြာအသုံးမခံတော့ဘဲ အရည်အသွေးညံ့တဲ့ ဂက်စ်ဓာတ်ငွေ့ရည်တွေ ဖြည့်မိရင် တခါတလေမှာ အကုန်မြန်တယ်လို့ မြဝတီမြို့ အမှတ် ၄ ရပ်ကွက်နေ အိမ်ရှင်မတဦးက ပြောပါတယ်။
“မီးပျက်တဲ့အတွင်းမှာပဲ အစကဆိုရင် ဂက်စ်တအိုးထည့် အပြည့်ရသေးတယ်၊ တလလောက်ကို သုံးရတယ်။ တခါတလေလည်း ဂက်စ်မပြည့်တာတွေ အရည်အသွေးညံ့တာတွေ ဖြစ်လာတယ်။ အဲ့ချိန်ကျရင်တော့ ဂက်စ်တအိုးကို ၁၀ ရက်လောက်ပဲ သုံးရတော့တယ်။ မီးမပျက်တုန်းက ဂက်စ်ရည်ဖြည့်ရင် ခဏစောင့်ပြီးရင် ယူလို့ရပြီး အခုတော့ အိုးသွားအပ်ထားပြီးတော့ တရက်လောက်စောင့်ရတယ်။”
မြဝတီမြို့တွင်းမှာသာမက ကော့ကရိတ်၊ ကျုံဒိုး၊ ကြာအင်းဆိပ်ကြီး ဒေသဘက်တွေမှာလည်း လျှပ်စစ်မီး တဆက်တည်း ပြတ်တောက်နေတာကြောင့် မီးသွေးနဲ့ ဂက်စ်ဈေးနှုန်း မြင့်တက်နေတာတွေအပြင် ကျေးရွာတွေဘက်အထိ ဈေးနှုန်းသုံးဆ လေးဆ မြင့်တက်ပြီး ဝယ်ယူသုံးစွဲနေရတယ်လို့ သိရပါတယ်။
ကချင်ပြည်နယ်၊ ဖားကန့်မြို့နယ်မှာ ဖေဖော်ဝါရီလ တတိယပတ်ကစလို့ ဆန်နဲ့ စက်သုံးဆီဈေး အဆမတန် မြင့်တက်လာပြီး ဝယ်မရတဲ့အထိ ပြတ်လပ်နေတယ်လို့ ဒေသခံတွေက ပြောပါတယ်။
ဖားကန့်မြို့နယ်ကို ဆန်နဲ့ စက်သုံးဆီတင်ပို့တဲ့ ကုန်တင်ကားတွေကို ဖေဖော်ဝါရီလ ၉ ရက်နေ့က စတင်ပြီး နန့်ယားစစ်ဆေးရေးဂိတ်မှာ ဖြတ်သန်းခွင့်မပေးတော့တာကြောင့် ခုလိုမျိုး ဈေးတွေမြင့်တက်လာပြီး ပစ္စည်းပြတ်လပ်သလိုဖြစ်လာတာလို့ ဒေသခံတွေက ပြောပါတယ်။
ဒေသခံတစ်ဦးက“အဓိက ပစ္စည်းမဝင်တော့ ဆိုင်တွေကလည်း အခံရှိတာတွေကို ဈေးတင်ပြီး ချွေရောင်းနေတဲ့ သဘောဖြစ်နေတာ၊ လမ်းမှာအပိတ်ခံထားရတာ ကားတွေလမ်းမှာရောက်နေတာကြာပြီ၊ ဘာလို့တင်ပို့ခွင့်မပေးတာလဲ မသိသေးဘူး၊ လောလောဆယ်တော့ ပေါ်ဆန်း ၁ အိတ်ကို ၁ သိန်းနီးပါတက်နေပြီ”လို့ ပြောပါတယ်။
ဖားကန့်မြို့နယ်ကို ဆန်နဲ့ စက်သုံးဆီတင်ပို့ခွင့်ကို စစ်ကောင်စီခန့် နယ်စပ်ရေးရာဝန်ကြီး အမိန့်နဲ့တားမြစ်ထားတာလို့ စစ်ကောင်စီတပ်နဲ့နီးစပ်သူတွေက ပြောပါတယ်။
ဆန်နဲ့ စက်သုံးဆီတင်သွင်းခွင့်ပိတ်ထားတာကြောင့် ပုံမှန် ဆန်ကြမ်းတစ်အိတ်ကို ငွေကျပ် ၅၀၀၀၀ ကျော် မြင့်တက်သွားပြီး စက်သုံးဆီတွေကတော့ ၁ လီတာကို ၅၀၀၀ ပေးရကာ ဆိုင်တိုင်းဝယ်မရတော့တဲ့အထိ ပစ္စည်းပြတ်လပ်နေပြီလို့ ဒေသခံတွေက ပြောပါတယ်။
