ဂရမ်မီ ဆန်ခါတင်စာရင်းဝင် နိုင်ငံကျော် ပလတ်တီနမ်ကြယ်ပွင့် အဆိုတော် ဂျင်မီအယ်လန်ဟာ လိင်ပိုင်းဆိုင်ရာ စော်ကားမှုနဲ့ တရားစွဲခံရပြီးနောက် သူရဲ့အေဂျင်စီ UTA နဲ့ မန်နေဂျာတို့က သူနဲ့လက်တွဲဆောင်ရွက်နေတဲ့ကိစ္စတွေကို ဆိုင်းငံ့ လိုက်ပါတယ်။
အယ်လန်ကို မုဒိမ်းမှု၊ လိင်ပိုင်းဆိုင်ရာစော်ကားမှုနဲ့ နှောင့်ယှက်မှုတို့နဲ့ သူ့ရဲ့ စီမံခန့်ခွဲမှု ကုမ္ပဏီ ဟောင်းက မန်နေဂျာတဦးက တိုင်ကြားထားတာဖြစ်ပြီး လိင်ဆက်ဆံမှုမှာ ရိုင်းစိုင်းတဲ့ လိင်ဆက်ဆံမှုနဲ့ ကြိုးကိုင်ခြယ်လှယ်တာကို ခံခဲ့ရတယ်လို့လည်း စွပ်စွဲထားပါတယ်။
တရားစွဲဆိုမှုမှာ အယ်လန်ဟာ ၁ နှစ်ခွဲကျော်ကြာအောင် လိင်ပိုင်းဆိုင်ရာ ကြိုးကိုင်ခြယ်လှယ်မှုတွေ ရှိခဲ့ပြီး အလုပ်ကိစ္စအတွင်းမှာလည်း အယ်လန်ဟာ သူ့ကို မကြာခဏလိင်ပိုင်းဆိုင်ရာစော်ကားခဲ့ ကြောင်း စွပ်စွဲခဲ့ပါတယ်။
ဓာတ်ပုံရိုက်ကူးမှု၊ အစမ်းလေ့ကျင့်မှုနဲ့ ဖျော်ဖြေပွဲ လူမြင်ကွင်းတွေမှာလည်း လိင်ပိုင်းဆိုင်ရာ နှောင့်ယှက်ခဲ့တယ်လို့ သူကပြောပါတယ်။
အယ်လန်ဟာ ထိုအမျိုးသမီးနဲ့ လိင်ဆက်ဆံခံကြောင်း ဝန်ခံခဲ့ပေမဲ့ သဘောတူညီမှုရရှိခဲ့တယ်လို့ အခိုင်အမာဆိုခဲ့ပြီး ကြေညာချက်တခုမှာ အဆိုပါစွပ်စွဲချက်တွေဟာ အလွန်စိတ် အနှောင့်အယှက် ဖြစ်စေပြီး နာကျင်စေတယ်လို့ ဆိုပါတယ်။
အယ်လန်ဟာ တရားစွဲဆိုခံပြီးနာရီပိုင်းအတွင်း BBR တေးဂီတအုပ်စုကနေ ဆိုင်းငံ့ခြင်း ခံခဲ့ရပြီး သူရဲ့သီချင်းသစ်နဲ့ ပရိုမိုးရှင်းအပါအဝင် အဆိုတော်နဲ့ စီးပွားရေးဆိုင်ရာလုပ်ငန်းအားလုံးကို ရပ်ဆိုင်းထားပါတယ်။
UTA ရဲ့ ပြောရေးဆိုခွင့်ရှိသူတဦးက “မကြာသေးခင်က စွပ်စွဲချက်တွေကြောင့် ဂျင်မီအယ်လန်ကို ကျနော်တို့ အေဂျင်စီရဲ့ကိုယ်စားပြုကနေ ဆိုင်းငံ့လိုက်ပါတယ်” လို့ ပြောပါတယ်။
အယ်လန်ဟာ ပြီးခဲ့တဲ့နှစ်နှောင်းပိုင်းက ကယ်လီဖိုးနီးယားအခြေစိုက် စီမံခန့်ခွဲမှု ကုမ္ပဏီ The Familie နဲ့ လက်တွဲလုပ်ဆောင်ခဲ့ပြီး ကုမ္ပဏီရဲ့ ပြောရေးဆိုခွင့်ရှိသူက "မေလ ၁၁ ရက်က စွဲချက်တင်ခံရတဲ့စွပ်စွဲချက်တွေကြောင့် The Familie ဟာ ဂျင်မီအယ်လန်နဲ့ စီမံခန့်ခွဲမှုဆိုင်ရာ လုပ်ငန်းအားလုံးကို ချက်ချင်းရပ်ဆိုင်းဖို့ဆုံးဖြတ်ခဲ့တယ်" လို့ ပြောပါတယ်။
Source - Variety
ဘက်ကင်ဟမ်နန်းတော် ဝင်ဆာရဲတိုက်မှာ မေလ ၇ ရက်နေ့ ကျင်းပမယ့် ချားလ်စ်ဘုရင်ရဲ့ နန်းတက်ဖျော်ဖြေပွဲမှာ ထိပ်တန်း နာမည်ကျော်အဆိုတော်တွေက ဖျော်ဖြေဖို့ ငြင်းပယ်ကြတဲ့အတွက် ပွဲစီစဉ်သူတွေ အခက်တွေ့နေရတယ်လို့ The Sun က ကြေညာပါတယ်။
ဒိုင်ယာနာမင်းသမီးရဲ့ အခင်ဆုံးသူငယ်ချင်း အယ်လ်တန်ဂျွန်ကိုလည်း ချားလ်စ်ဘုရင်က ဖျော်ဖြေဖို့ ဖိတ်ကြားခဲ့တဲ့အတွက် ပြည်သူတွေကတော့ ချားလ်စ်ဘုရင်ရဲ့ သတ္တိကို လေးစားပါတယ်လို့ ဝေဖန်နေကြတာဖြစ်ပြီး အယ်လ်တန်ဂျွန်ကတော့ ဂရမ်မီ ဖျော်ဖြေပွဲတွေနဲ့ ရက်တိုက်နေတယ်ဆိုပြီး ငြင်းဆန်ခဲ့ပါတယ်။
Spice girls အဖွဲ့ဝင်တွေကတော့ နန်းတက်ပွဲ ဖျော်ဖြေဖို့ဆိုပြီး သူတို့အဖွဲ့ ပြန်လည်စုစည်းခဲ့ပေမဲ့ အခုတော့ ကမ်းလှမ်းချက်ကို ငြင်းပယ်လိုက်တာဖြစ်ပြီး ဂရမ်မီမှာ Artist of The Year ရရှိခဲ့တဲ့ ဟယ်ရီစတိုင်ကလည်း သူ့ရဲ့ Love on Tour ကမ္ဘာလှည့်ဖျော်ဖြေပွဲ အချိန်ဇယားကြောင့် ငြင်းပယ်ခဲ့ပါတယ်။
ပြီးခဲ့တဲ့တပတ်က ဗြိတိန်လူမျိုး နာမည်ကျော်အဆိုတော်တွေဖြစ်တဲ့ Adele နဲ့ Ed Sheeran တို့ကလည်း ဖျော်ဖြေဖို့ ငြင်းပယ်ခဲ့ကြတာဖြစ်ပြီး ထိပ်တန်းစာရင်းဝင် နာမည်ကျော်အားလုံး ချားလ်စ်ဘုရင် နန်းတက်ပွဲ ဖျော်ဖြေဖို့ ငြင်းပယ်ထားပေမဲ့ ထိပ်တန်းစာရင်းဝင်မဟုတ်တဲ့ အနုပညာရှင်တချို့ကတော့ ကမ်းလှမ်းချက်ကို လက်ခံထားတယ်လို့ ဆိုပါတယ်။
