အမျိုးသားညီညွတ်ရေးအစိုးရ(NUG)က နွေဦးတော်လှန်ရေး အထူးငွေတိုက်စာချုပ်တွေကို ဝယ်ယူနိုင်မယ့် ဝက်ဘ်ဆိုက်စာမျက်နှာကို ထုတ်ပြန်လိုက်ပြီး ဒီကနေ့ နိုဝင်ဘာ ၂၂ ရက်မှာ စတင်ထုတ်ဝေရောင်းချနေပါတယ်။

ငွေတိုက်စာချုပ်တွေကိုတော့ ဝက်ဘ်ဆိုက်စာမျက်နှာ https://www.unitedbonds-nug.org/  ပေါ်ကတဆင့် ဝယ်ယူနိုင်မှာဖြစ်ကာ ဝယ်ယူသူရဲ့ ကိုယ်ရေးအချက်အလက်တွေကိုလည်း အထူးလုံခြုံတဲ့ နည်းပညာနဲ့ အာမခံချက်ပေးထားတာကြောင့် စိုးရိမ်ကြောင့်ကြမဖြစ်ဘဲ ယုံယုံကြည်ကြည် ပူးပေါင်းဆောင်ရွက်ကြဖို့ တိုက်တွန်းထားပါတယ်။

ဒါ့အပြင် ဘဏ်ငွေလွှဲစနစ်ကိုလည်း အတတ်နိုင်ဆုံး၊ အစွမ်းကုန် ကြိုးစားပြင်ဆင်ပေးထားတဲ့အတွက် စိတ်ချလုံခြုံစွာ ငွေလွှဲပြောင်းပေးပို့နိုင်တဲ့အပြင် ဝယ်ယူသူ မူလပိုင်ရှင်အပြင် ဆက်ခံသူတစ်စုံတစ်ဦးကိုလည်း အမည်/တော်စပ်ပုံ ဖြည့်သွင်းဆောင်ရွက်ခြင်းနဲ့ စိတ်ချ လုံခြုံမှုကို အပြည့်အဝဆောင်ရွက်နိုင်မှာဖြစ်တယ်လို့ ဆိုပါတယ်။

ငွေတိုက်စာချုပ်တွေကို အမေရိကန်ဒေါ်လာ ၁၀၀၊ ၅၀၀၊ ၁၀၀၀၊ ၅၀၀၀ တန်အမျိုးအစား ၄ မျိုးနဲ့ အတိုးမဲ့ ထုတ်ဝေရောင်းချသွားမယ်လို့ ကြေညာထားပြီး တစ်ဦးချင်း၊ တစ်ယောက်ချင်း စိတ်ကြိုက် ဝယ်ယူနိုင်တဲ့အပြင် အစုအဖွဲ့လိုက် စုပေါင်းစပ်ပေါင်းလည်း ဝယ်ယူနိုင်မယ်လို့ ဆိုပါတယ်။

စာချုပ်သက်တမ်းကိုတော့ ၂ နှစ်သတ်မှတ်ထားကာ သက်တမ်းစေ့ရောက်တဲ့အချိန်မတိုင်ခင်မှာ တဆင့်ပြန်လည်လွှဲပြောင်း၊ ရောင်းချ၊ ဝယ်ယူခွင့်ပြုမှာမဟုတ်ဘဲ သက်တမ်းစေ့ပြီးနောက်မှသာ သတ်မှတ်စည်းမျဉ်းစည်းကမ်းတွေနဲ့အညီ ဆောင်ရွက်ပိုင်ခွင့်ရှိမှာ ဖြစ်ပါတယ်။

အခုလို အထူးငွေတိုက်စာချုပ်တွေကို တော်လှန်ရေးအစိုးရတရပ်က အတိုးမဲ့ ထုတ်ဝေ ရောင်းချတာဟာ ကမ္ဘာ့သမိုင်းမှာတော့ ပထမဆုံးအကြိမ် ဖြစ်လာခဲ့ပြီး ဖက်ဒရယ်ဒီမိုကရေစီစနစ်ကို လိုလားတဲ့ မြန်မာပြည်သူတွေက စစ်အာဏာရှင်ကို အဆုံးစွန် ဆန့်ကျင် အာခံတော်လှန်ခဲ့တဲ့ သမိုင်းမော်ကွန်းအဖြစ် ခမ်းနားစွာထင်ရှား ကျန်ရစ်ခဲ့မှာဖြစ်တယ်လို့ ဆိုပါတယ်။

အသေးစိတ်သိလိုတာတွေရှိရင်လည်း အီးမေးလ်လိပ်စာ [email protected] ဆီ ဆက်သွယ်မေးမြန်းနိုင်တယ်လို့ ထုတ်ပြန်ထားပါတယ်။

အမျိုးသားညီညွတ်ရေးအစိုးရ(NUG)က အမေရိကန်ဒေါ်လာ သန်း ၁၀၀၀ ဖိုးနဲ့ ညီမျှတဲ့ နွေဦးတော်လှန်ရေး အထူးငွေတိုက် စာချုပ်တွေကို ဥပဒေနဲ့အညီ ထုတ်ဝေရောင်းချသွားမယ်လို့ ထုတ်ပြန်ကြေညာပါတယ်။

NUGအစိုးရ၊ စီမံကိန်း၊ ဘဏ္ဍာရေးနှင့် ရင်းနှီးမြုပ်နှံမှုဝန်ကြီးဌာန ဝန်ကြီး ဦးတင်ထွန်းနိုင်က လက်မှတ်ရေးထိုးထုတ်ပြန်လိုက်တဲ့ အဆိုပါ ကြေညာချက်မှာ ပြည်ထောင်စုလွှတ်တော်အနေနဲ့ ၂၀၂၁ ခုနှစ်၊ ဇွန် ၁၄ ရက်စွဲနဲ့ ပြည်သူ့ ကြွေးမြီစီမံခန့်ခွဲမှုဥပဒေကို တတိယအကြိမ်ပြင်ဆင်တဲ့ ဥပဒေ၊ ပြည်ထောင်စုလွှတ်တော် ဥပဒေအမှတ် ၄ ကို အတည်ပြုပြဋ္ဌာန်းပြီးကြောင်းနဲ့ အဲဒီပြင်ဆင်တဲ့ ဥပဒေနဲ့ အညီ နွေဦးတော်လှန်ရေးအထူးငွေတိုက်စာချုပ်များရောင်းချခွင့်ကို NUG အစိုးရအဖွဲ့ က သဘောတူခွင့်ပြုခဲ့ပြီးဖြစ်တယ်လို့ ဖော် ပြပါတယ်။

အခုလက်ရှိ ရောင်းချမယ့် နွေဦးတော်လှန်ရေး အထူးငွေတိုက်စာချုပ်တွေရဲ့ သက်တမ်းကတော့ ၂ နှစ်ဖြစ်ပြီး အမေရိကန်ဒေါ်လာ သန်း ၁၀၀၀ ဖိုး နဲ့ညီမျှတဲ့ အတိုးမဲ့စာချုပ်တွေအနေနဲ့ ထုတ်ဝေရောင်းချသွားမယ်လို့ ဆိုပါတယ်။

အခုလို အထူးငွေတိုက်စာချုပ်တွေကို တော်လှန်ရေးအစိုးရတရပ်က အတိုးမဲ့ ထုတ်ဝေ ရောင်းချတာဟာ ကမ္ဘာ့သမိုင်းမှာတော့ ပထမဆုံးအကြိမ်ဖြစ်လာခဲ့ပြီး ဖက်ဒရယ်ဒီမိုကရေ စီစနစ်ကို လိုလားတဲ့ မြန်မာပြည်သူတွေက စစ်အာဏာရှင်ကို အဆုံးစွန် ဆန့်ကျင်အာခံ တော်လှန်ခဲ့တဲ့ သမိုင်းမော်ကွန်းအဖြစ် ခမ်းနားစွာထင်ရှား ကျန်ရစ်ခဲ့မှာဖြစ်တယ်လို့ ဆိုပါ တယ်။

ဒါကြောင့်မို့ မြန်မာ့မြေပေါ်ကနေ စစ်အာဏာရှင်စနစ် အပြီးတိုင် ပျောက်ကွယ်ချုပ်ငြိမ်း သွားစေရေးကို ပြင်းပြတဲ့ဆန္ဒနဲ့ လိုလားတောင့်တကြသူတိုင်း နွေဦးတော်လှန်ရေး အထူးငွေတိုက်စာချုပ်တွေကို တော်လှန်ရေး အောင်စိတ်နဲ့ မဖြစ်မနေ ဝယ်ယူကြဖို့လည်း  မေတ္တာရပ်ခံတိုက်တွန်းထားပါတယ်။

လတ်တလောမှာတော့ ဘယ်နေ့စတင်ရောင်းချမယ်ဆိုတာကို မသိရသေးပဲ စတင်ရောင်း ချမယ့် နေ့ရက်၊ ဝယ်ယူနိုင်မယ့် နည်းလမ်းတွေနဲ့ အသေးစိတ်စည်းမျဉ်းစည်းကမ်းတွေကို တော့ ထပ်မံပြီးတော့ ကြိုတင် အသိပေးထုတ်ပြန်ပေးသွားမယ်လို့ ဆိုပါတယ်။