ဧရာဝတီတိုင်း၊ ကျုံပျော်မြို့နယ် ကျေးရွာရှစ်ရွာက အခြေခံလူတန်းစားတွေကို စက်တင်ဘာ ၇ ရက် မနက်ပိုင်းမှာ ဗြဟ္မဝိဟာရ ကုသိုလ်ဖြစ်ဆေးခန်းက ဆန်အပါအဝင် စားသောက်ကုန် ၉ မျိုး လှူဒါန်းခဲ့တယ်လို့ မြို့ခံတွေက ပြောပါတယ်။
ကျုံပျော်မြို့နယ် အထောင်မြို့ရှိ ဗြဟ္မဝိဟာရ ကုသိုလ်ဖြစ်ဆေးခန်းကနေ လှူဒါန်းပေးတာတွေကို ကတ်ပြားနဲ့သွားထုတ်ရတယ်လို့ ရှားခဲကျေးရွာနေသူတဦးက ဒီဗွီဘီကိုပြောပါတယ်။
"ဆန် ၄ ပြည်၊ ဆီ ၃၀ သား၊ ငန်ပြာရည် ၃၀ သား၊ ကြက်သွန်နီ ၅၀ သား၊ ကြက်သွန်ဖြူ၊ ပဲကတ္တီပါ ၂ ဘူး၊ ကြက်ဥ ၆ လုံး၊ ဟင်းခတ်မှုန့်နဲ့ခေါက်ဆွဲခြောက် ၂ ထုပ် ပေးတယ်။ မရှိနေတဲ့ အချိန်ဆိုတော့ အရမ်းပျော်တာ။”
ကျေးရွာရှိ ရပ်မိရပ်ဖတွေက အမှန်တကယ်နွမ်းပါးသူတွေကိုသာ ပစွည်းထုတ်တဲ့ ကတ်ပြားပေးတာလို့ ကြက်တညင်ကျေးရွာနေသူတဦးက ပြောပါတယ်။
“အရင်ကလည်း လှူသေးတယ်၊ ဇူလိုင်လတုန်းက ဖြစ်မယ်၊ ရက်တော့အတိအကျ မသိဘူး။ အခုက အကုန်လုံး ကျပ်တည်းနေတော့ လှူပေးတဲ့သူတွေ ကျန်းမာပါစေလို့ပဲ စိတ်ထဲက ဆုတောင်းမိတယ်။”
ဗြဟ္မဝိဟာရ ကုသိုလ်ဖြစ်ဆေးခန်းက ရှားခဲ၊ ပန်းမြိုင်ကုန်း၊ ကြက်တညင်၊ ရောင်းရင်းကုန်း၊ အုန်းကုန်း၊ သိန်ကုန်း၊ မန်းကြာနဲ့ ကံကလေး စတဲ့ကျေးရွာတွေမှာ နေထိုင်တဲ့ အိမ်ထောင်စု ၁၂၅ စုကို လှူဒါန်းခဲ့တာလို့ ရပ်မိရပ်ဖတဦးက ပြောပါတယ်။
“အထောင်မှာက နေ့တိုင်းထမင်းကျွေးတဲ့သူတွေရှိတယ်၊ ဆန်လှူတဲ့သူတွေလည်းရှိတယ်၊ အဲ့ဒါကြောင့် ကျုံပျော်အပိုင်ထဲက တကယ်အခက်အခဲဖြစ်နေတဲ့သူတွေကို ရွေးပြီး အသင်းက လှူတာ။”
ပြီးခဲ့တဲ့ ဇူလိုင် ၂၇ ရက်ကလည်း ဗြဟ္မဝိဟာရ ကုသိုလ်ဖြစ်ဆေးခန်းက ဆင်းရဲနွမ်းပါးတဲ့ အိမ်ထောင်စု ၁၀၀ ကျော်ကို ဆန်၊ ဆီ၊ အပါအဝင် စားသောက်ကုန်တွေ လှူဒါန်းခဲ့ပါသေးတယ်။
ဧရာဝတီတိုင်း ကျုံပျော်မြို့နယ်၊ အထောင်မြို့မှာ နှစ်ရက်အတွင်း အမျိုးသားလူငယ် ၁၀ ဦး ထက်မနည်းကို စစ်ကောင်စီက ဖမ်းဆီးခဲ့တယ်လို့ သိရပါတယ်။
ဖေဖော်ဝါရီ ၁၁ ရက်ညပိုင်းက လျှပ်စစ်ရုံး ဗုံးပေါက်ကွဲမှုဖြစ်စဉ်နဲ့ ပတ်သက်ပြီး ဒေသခံ ၁၀ ဦး ထက်မနည်းကို စစ်ကောင်စီက ဖမ်းဆီးသွားတာလို့ ဒေသခံတွေက ပြောပါတယ်။
“လျှပ်စစ်ရုံးမှာ ဗုံးပေါက်တဲ့ကိစ္စနဲ့ ပတ်သက်ပြီး ကလေးတွေ အဖမ်းခံရတယ်။ နှစ်ရက်ရှိပြီ လူငယ်အမျိုးသား ၁၀ ယောက်လောက် အဖမ်းခံထားရတယ်” လို့ ဒေသခံတစ်ဦးက ပြောပါတယ်။
လျှပ်စစ်ရုံး ဗုံးပေါက်ကွဲတဲ့ ကိစ္စနဲ့ပတ်သက်ပြီး ဖေဖော်ဝါရီ ၁၆ နဲ့ ၁၇ ရက်တွေမှာ လူငယ် ၁၀ ဦး ထက်မနည်းကို စစ်ကောင်စီက လိုက်လံ ဖမ်းဆီးခဲ့တာဖြစ်ပြီး ကျုံပျော်မြို့နယ် ရဲစခန်းမှာ ထားရှိတယ်လို့ ဆိုပါတယ်။
“ဗုံးပေါက်ကွဲခဲ့တဲ့ ကိစ္စနဲ့ပတ်သက်ပြီး လုံခြုံရေးအရ သံသယရှိလို့ ဖမ်းဆီးစစ်ဆေးနေတာ” လို့ ကျုံပျော်မြို့မရဲစခန်း ရဲတပ်ဖွဲ့ဝင်တစ်ဦးက ပြောပါတယ်။
အထောင်မြို့ လျှပ်စစ်ရုံး ဗုံးဖောက်ခွဲတာကို ကျုံပျော် မြို့ပြပျောက်ကြားအဖွဲ့က ပြုလုပ်တာလို့ ထုတ်ပြန်ထားပါတယ်။
အထောင်မြို့ လျှပ်စစ်ရုံးမှာ ဖေဖော်ဝါရီ ၁၁ ရက် ည ၈ နာရီလောက်က ဗုံးပေါက်ကွဲမှုဖြစ်ပွားခဲ့ပြီး လျှပ်စစ်ရုံး ဝန်ထမ်းတစ်ဦး ထိခိုက်ဒဏ်ရာရခဲ့သလို ပြီးခဲ့တဲ့ လပိုင်းကလည်း ပေါက်ကွဲမှုဖြစ်ပွားခဲ့တာကြောင့် ခုတကြိမ်နဲ့ဆို ၃ ကြိမ်ရှိပြီဖြစ်ပြီး အရင်ကတော့ ဗုံးပေါက်တာနဲ့ပတ်သက်ပြီး ဖမ်းဆီးခံရတာ မရှိခဲ့ဘူးလို့ သိရပါတယ်။
