ထိုင်း-မြန်မာနယ်စပ် တာ့ခ်ခရိုင်၊ ဖုပ်ဖရမြို့က အသက် ၁၆ နှစ်အရွယ် မြန်မာရွှေ့ပြောင်းလုပ်သား မိန်းကလေး ၁ ဦးဟာ အလုပ်ရှင်က ၇ လ ပိတ်လှောင်ထားပြီး အဓမ္မပြုကျင့်တာ ခံခဲ့ရတယ်လို့ Matichon ထိုင်းသတင်းမှာ ဖော်ပြပါတယ်။

ကေ (အမည်လွှဲ) လို့ခေါ်တဲ့ မြန်မာမိန်းကလေးဟာ ၁၀ နှစ်ခံ တောင်ပေါ်သားကတ် ကိုင်ဆောင်ထားပြီး ပြီးခဲ့တဲ့ ၂၀၂၂ မေလ ၁ ရက်နေ့ကစလို့ ဖုပ်ဖရမြို့ ချောင့်ခက်ပ်ရပ်ကွက်ရှိ နာမည်ကြီး ကွေ့သယို (ခေါက်ဆွဲ) ဆိုင် ၁ ဆိုင်မှာ အလုပ်ဝင်လုပ်ခဲ့ပါတယ်။

အဲဒီမှာလုပ်ကိုင်စဉ် အလုပ်ရှင် အမျိုးသားက ဘယ်မှသွားခွင့်မပြုဘဲ အိမ်မှာလှောင်ထားပြီး မကြာခဏ အဓမ္မပြုကျင့်ခဲ့ကြောင်း၊ သူမဟာ ထွက်ပြေးဖို့ အကြိမ်ကြိမ်ကြိုးစားခဲ့ပြီး ဒီ ၂၀၂၃ ခုနှစ် ဖေဖော်ဝါရီလထဲမှာမှ လွတ်မြောက်လာနိုင်ခဲ့တယ်လို့ ဆိုပါတယ်။

အပြင်ရောက်ပြီးတဲ့နောက် သူမက ဖုပ်ဖရမြို့နယ်ရဲစခန်းမှာ သွားရောက်တိုင်တန်းထားခဲ့ကြောင်း၊ ဒါကို အလုပ်ရှင်က သိသွားပြီးတဲ့နောက် အမှုပြန်ရုပ်သိမ်းဖို့ ကြားလူကနေတဆင့် ဘတ်ငွေ ၈ သောင်းနဲ့တကြိမ်၊ ၁ သိန်းနဲ့ ၁ ကြိမ် လာရောက် ညှိနှိုင်းခဲ့တယ်၊ ဒါပေမဲ့ မိန်းကလေးက လက်ခံလိုက်ရင် နောက်ထပ် တခြားမိန်းကလေးတွေကို သူ့လိုလုပ်မှာစိုးလို့ လက်မခံဘဲ ငြင်းခဲ့တယ်လို့ ဆိုပါတယ်။

ငွေပေးတာ လက်မခံတဲ့အတွက် အလုပ်ရှင်က သူတို့အသိ ရဲတွေနဲ့ပါ လာရောက် ခြိမ်းခြောက်ခဲ့ကြောင်း၊ ဒါကြောင့် မဲဆောက်ရှိ အလုပ်သမားကူညီရေးအဖွဲ့ ၁ ဖွဲ့နဲ့ ဆက်သွယ်မိပြီး အဆိုပါအဖွဲ့အစည်းနဲ့အတူ ပြီးခဲ့တဲ့ မေ ၉ ရက်က ဖုပ်ဖရမြို့နယ်ရဲစခန်းကို ထပ်မံတိုင်ကြားခဲ့ပါတယ်။

စခန်းမှူးကတော့ မိန်းကလေးဟာ လူငယ်ဖြစ်တဲ့အတွက် ထိရှလွယ်တဲ့အမှုဖြစ်လို့  အနည်းငယ် ကြန့်ကြာနေရကြောင်း၊ ဖြစ်စဉ်က ကြာခဲ့လို့ ဆေးစစ်ချက်တွေ ပြန်လုပ်နေရတယ်လို့ပဲ ပြန်ဖြေတယ်လို့ ဆိုပါတယ်။

အခုလို အဖွဲ့အစည်းတခုခုက ဝင်ရောက်ကိုင်တွယ်တယ် ဆိုရင်တော့ ကျူးလွန်သူ အလုပ်ရှင်ကို အရေးယူ အပြစ်ပေးနိုင်မယ်လို့ ယုံကြည်ကြောင်း သတင်းမှာ ဖော်ပြပါတယ်။

မိန်းကလေးကို အကူအညီပေးနေတဲ့ အဖွဲ့အစည်းကိုတော့ ဒီဗွီဘီက စုံစမ်းဆက်သွယ်လို့ မရသေးပါဘူး။

ကိုးကား - .msn.com

ထိုင်းမြောက်ပိုင်း၊ ဖစ်ချဘွန်းခရိုင်ရှိ နာမည်ကြီးအထက်တန်းကျောင်းတစ်ကျောင်းက ၁၇ နှစ်ရွယ် ကျောင်းသူတယောက်ဟာ ပြီးခဲ့တဲ့လက ကိုဗစ်-၁၉ ကူးစက်ခံရလို့ ကျောင်းက စီစဉ်ပေးတဲ့ ကွာရန်တင်းစင်တာမှာ ဝင်ရောက်နေထိုင်စဉ် ကျောင်းသားတယောက်ရဲ့ အဓမ္မပြုကျင့်တာ ခံခဲ့ရတယ်လို့ ထိုင်းသတင်းတွေမှာ ဖော်ပြပါတယ်။

မိန်းကလေးဟာ ထိုင်းမြောက်ပိုင်း လွေးခရိုင်မှာနေထိုင်ကာ အုပ်ထိန်းသူတွေက ဖစ်ချဘွန်းအထက်တန်းကျောင်းမှာ  ကျောင်းအိပ်ကျောင်းစား အပ်နှံထားကြောင်း၊ ပြီးခဲ့တဲ့ စက်တင်ဘာ ၈ ရက်က သူတို့ကျောင်းက ကျောင်းသူတွေ စာရိတ္တကိစ္စ အရေးပေါ်ဆွေးနွေးစရာရှိလို့ ဆိုပြီး အုပ်ထိန်းသူကို လှမ်းခေါ်ခဲ့ကြောင်း၊ အုပ်ထိန်းသူတွေ ရောက်လာတဲ့အခါ ကျောင်းအုပ်ကြီးနဲ့ ဆရာ၊ ဆရာမတွေက သူတို့ ကျောင်းထဲမှာ ကျောင်းသူကျောင်းသားချင်း လိင်ပိုင်းဆိုင်ရာ ကျူးလွန်မှုတွေရှိခဲ့လို့ ဒီကိစ္စ ကျောင်းနာမည် ပျက်မှာစိုးလို့  မိဘ ဆရာ ပူးပေါင်းပြီး ကျိတ်ဖြေရှင်းချင်တဲ့အကြောင်း ပြောခဲ့တယ်လို့ ဆိုပါတယ်။ 

ဩဂုတ် ၂၃ ရက်ညက ကိုဗစ်-၁၉ ကူးစက်ခံထားရတဲ့ ကျောင်းသူ အယောက် ၃၀ ရှိ ကွာရန်တင်းဆောင်ထဲကို ကျောင်းသား လေးယောက် ဝင်လာပြီး သူတို့နဲ့ ချိန်းဆိုထားတဲ့ မိန်းကလေးတွေနဲ့ အတူအိပ်ခဲ့ကြောင်း၊ ဒီကိစ္စ ဘယ်သူ့ကိုမှ မတိုင်ရဘူး၊ တိုင်တဲ့သူ အကြောင်းသိမယ်လို့ ခပ်ကြမ်းကြမ်း ခေါင်းဆောင်မိန်းကလေး နှစ်ယောက်က   ခြိမ်းခြောက်ထားလို့ ဘယ်သူမှ မပြောရဲဘူးလို့ ဆိုပါတယ်။

ဩဂုတ်လ ၂၄ ရက်နေ့မှာတော့ ကျောင်းသား ခြောက်ယောက် ထပ်ဝင်လာပြီး လေးယောက်က သူတို့မိန်းကလေးတွေနဲ့အိပ်၊ ကျန်တယောက်က အစောင့်လုပ်၊ နောက်တယောက်က အတွဲ မရှိဘဲ ဖြစ်နေတာကြောင့် တွေ့ရာခုတင်ပေါ်က ၁၇ နှစ်ရွယ်ကျောင်းသူကို အဓမ္မပြုကျင့်ခဲ့ကြောင်း၊ မိန်းကလေးမှာ အဖျားတက်နေလို့ ရုန်းကန်နိုင်စွမ်းမရှိခဲ့ဘူးလို့ ဆိုပါတယ်။

နောက်နေ့မှာ ဒီကိစ္စ ဆရာ၊ ဆရာမတွေဆီ ပေါက်ကြားသွားပြီး ကျောင်းသား ငါးယောက်ကို ကျောင်းထုတ် အပြစ်ပေးလိုက်ကာ မိန်းကလေးတွေကိုလည်း သန္ဓေတားဆေး တိုက်ကျွေးခဲ့ပါတယ်။

ကိုယ်ဝန်ရှိခဲ့ရင် ဆရာဝန်တွေနဲ့ တိုင်ပင်ဆောင်ရွက်ပေးမှာဖြစ်ပေမဲ့  ကျောင်းရဲ့ဂုဏ်သိက္ခာနဲ့ မိမိသားသမီးတွေ နာမည်ပျက် အရှက်ရမှာစိုးလို့ ကျောင်းကိစ္စကျောင်းထဲမှာပဲ ကျိတ်ဖြေရှင်းဖို့ ဆရာ၊ ဆရာမတွေက အုပ်ထိန်းသူတွေကိုပြောပြီး အဓမ္မကျင့်တဲ့ကိစ္စ မိန်းကလေးတွေက အလိုတူကြောင်း လက်မှတ်ထိုးခိုင်းတယ်လို့ ဆိုပါတယ်။

အသက် ၁၇ နှစ်ရွယ်မိန်းကလေးဟာ အုပ်ထိန်းသူတွေနဲ့ စကားပြောခွင့်ရတဲ့အခါမှာ သူဟာ အလိုမတူဘဲ အဓမ္မပြုကျင့်ခံရကြောင်း၊ အဲဒီကျောင်းမှာလည်း ဆက်မနေချင်တော့ပဲ ဆရာဝန်ပြချင်တယ်လို့ ပြောတာကြောင့် အုပ်ထိန်းသူတွေက ခေါ်ထုတ်ပြီး ဆေးစစ်ကာ အမျိုးသမီးနဲ့ကလေးသူငယ်စောင့်ရှောက်ရေးဖောင်ဒေးရှင်းကို တိုင်ကြားခဲ့ပါတယ်။  

တိုင်ကြားခြင်းမပြုခင်က ကျောင်းအုပ်နဲ့ ဆရာ၊ ဆရာမတွေက အုပ်ထိန်းသူကို ဘယ်မှမတိုင်ဖို့ အတန်တန် ဆက်သွယ်ပြောဆိုပြီး နစ်နာကြေးတွေပါ လာရောက်ညှိနှိုင်းဖို့ ပြောဆိုခဲ့ပါသေးတယ်။ 

ဒါပေမဲ့ အုပ်ထိန်းသူဘက်က ပြဿနာဖြစ်ပြီး ၁၀ ရက်ကျော်မှ အကြောင်းကြားတဲ့အပေါ် မကျေနပ်သလို စိတ်ပိုင်းဆိုင်ရာပါထိခိုက်နေတဲ့ သူတို့သမီးအတွက်လည်း တရားမျှတရေး ဆက်လက်ဆောင်ရွက်သွားမယ်လို့ ပြောပါတယ်။

အဆိုပါအမှုဟာ ပညာရေးဌာနဆီရောက်သွားပြီး ကျောင်းအုပ်ကြီးကို ပြောင်းရွှေ့ပစ်လိုက်သလို စုံစမ်းစစ်ဆေးရေးကော်မတီဖွဲ့ပြီး လိုအပ်သလိုအရေးယူဖို့ ဆက်လက်စစ် ဆေးနေကြပါတယ်။

ဖစ်ချဘွန်းခရိုင်ရဲတပ်ဖွဲ့ ရဲမှူးကြီးကလည်း ဒီကိစ္စဟာ မဖြစ်သင့်မဖြစ်အပ်တဲ့ ပညာသင်ကျောင်းထဲမှာ ဖြစ်ပြီး ကျောင်းသားလူငယ်တွေ စာရိတ္တပိုင်းဆိုင်ရာအတွက် အလွန်ကြီးမားတဲ့ အန္တရာယ်ဖြစ်လို့ လွှတ်ထားလို့မရဘဲ ထိထိရောက်ရောက် အရေးယူသွားမယ်လို့ သတင်းထောက်တွေကို ပြောသွားပါတယ်။ 

Ref- NationTV/Matichon