စစ်ကိုင်းတိုင်း၊ မြောင်မြို့နယ် ရွှေပန်းကျေးရွာကို စစ်ကောင်စီစစ်တပ်က ဝင်ရောက်မီးရှို့ဖျက်ဆီးခဲ့ပြီး အမျိုးသမီး လေးယောက်ကိုလည်း အဓမ္မပြုကျင့်ခဲ့တယ်လို့ ရွှေပန်းကျေးရွာ ပြည်သူ့အုပ်ချုပ်ရေးအဖွဲ့ ခေါင်းဆောင်က ဇူလိုင် ၁၂ ရက်မှာ ဒီဗွီဘီကို ပြောပါတယ်။

အင်အား ၁၀၀ ကျော်လောက်ရှိတဲ့ စစ်ကောင်စီစစ်ကြောင်းဟာ ဇွန်လ ၂၉ ရက်နေ့မှာ ရွှေပန်းကျေးရွာကို ဝင်ရောက်ပြီး အမျိုးသမီး လေးယောက်ကို ဖမ်းဆီးကာ အဓမ္မပြုကျင့်သွားတယ်လို့ ဆိုပါတယ်။

ဒေသခံ ပ.အ.ဖ ခေါင်းဆောင်က “စစ်(...)တွေ စစ်ကြောင်းထိုးလာတော့ ရွှေပန်းကျေးရွာနဲ့ ရွှေပန်းကျွန်းရွာက ဒေသခံပြည်သူတွေ ရွာလုံးကျွတ် ထွက်ပြေးကြရတာဗျ။ ရွှေပန်းရွာထဲမှာ ပိတ်မိနေတဲ့ အမျိုးသမီး လေးယောက်ကို ဖမ်းဆီးပြီး စစ် (--)တွေက ဝိုင်းပြီးမုဒိမ်းကျင့်သွားတာလို့ အဲဒီအမျိုးသမီးတွေနဲ့ နီးစပ်တဲ့သူတွေက ပြောပြတယ်။ ကျနော်တို့ အနေနဲ့တော့ အသေးစိတ်မေးလို့ မကောင်းဘူး။ ဖြစ်စဥ်ကတော့ အမှန်ပါ” လို့ ပြောပါတယ်။

“ကျမတိုရွာဘက်ကို ဇူလိုင်လ ၂၉ ရက်နေ့မှာ စစ်(...)တွေဝင်လာတော့ အခါတိုင်းစစ်ကြောင်းတွေလိုမှတ်ပြီး သက်ကြီးရွယ်အိုတွေ၊ ကလေးသူငယ်တွေ၊ အမျိုးသမီးတွေ ၇၅ ယောက်လောက်က ရွာဘုန်းကြီးကျောင်းမှာ ကျန်ခဲ့ကြတာပါ။ ဒေသခံပြည်သူ ၇၅ ယောက်လုံး ဘုန်းကြီးကျောင်းမှ ာပိတ်မိသွားပြီး အသက် ၃၀ လောက်ရှိတဲ့ အမျိုးသမီး ၄ ယောက်ကို အဓမ္မပြုကျင့်ကြတာပါ။ စစ်(...)တွေက သူတို့နေတဲ့ အခန်းထဲကို ခေါ်သွားပြီး ၃ ရက်လုံး အကြိမ်ကြိမ် အဓမ္မပြုကျင့်ခဲ့ကြတာ။ သူတို့ အဓမ္မကျင့်ချင်တဲ့ အချိန်ဆိုရင် လာခေါ်သွားပြီး ည ၁၁ နာရီလောက်မှ ပြန်ပို့ကြတယ်။ အသက်မပြည့်သေးတဲ့ မိန်းကလေးငယ်တစ်ယောက်ကိုလည်း မေးတာမှန်မှန်မဖြေရင် ညစာဖြစ်သွားမယ်လို့ ခြိမ်းခြောက်ခဲ့တယ်"လို့ ရွှေပန်းကျေးရွာ ဒေသခံ အမျိုးသမီးတစ်ယောက်က ပြောပါတယ်

ရွှေပန်းကျေးရွာနဲ့ တစ်မိုင်လောက်အကွာကို ဒီကနေ့ ဇူလိုင်လ ၁၂ ရက်နေ့ မနက်ပိုင်းမှာ စစ်ခွေးတွေစစ်ကြောင်းထိုးနေလို့ ရွာလုံးကျွတ် ဘေးလွတ်ရာကို ထွက်ပြေးနေကြရပြီး တောထဲတွေမှာပဲ ဖြစ်သလို နေနေကြရတယ်လို့ ဆိုပါတယ်။

အခုလို စစ်ကောင်စီတပ်တွေ ရွာဝင်မီးရှို့ အဓမ္မပြုကျင့်မှုတွေနဲ့ ပတ်သက်ပြီး စစ်ကောင်စီတပ်ဘက်ကိုတော့ ဆက်သွယ်မေးမြန်းနိုင်ခြင်း မရှိခဲ့ပါဘူး။ 

စစ်ကောင်စီတပ်တွေဟာ အိမ်ခြေ ၄၅၀ လောက်ရှိတဲ့ ရွှေပန်းကျေးရွာကို စိတ်ကြိုက်မွှေနှောက်ပြီး ဇွန်လ ၂၉ ရက်နဲ့ ၃၀ ရက်နေ့ နှစ်ညအိပ်ကာ ဇူလိုင် ၁ ရက် မနက်ပိုင်းမှာ ရွှေပန်းရွာက နေအိမ် ၁၇ လုံးနဲ့ ရွှေပန်းကျွန်းရွာက နေအိမ် တလုံးကို မီးရှို့ဖျက်ဆီးသွားတယ်လို့ ဆိုပါတယ်။

နှစ်ဘက်ထိတွေ့တိုက်ပွဲဖြစ်ပွားခဲ့တာတော့ မရှိဘဲ ဇူလိုင်လ ၁ ရက်နေ့ စစ်ကောင်စီတပ်တွေ ပြန်ထွက်တဲ့ အချိန်မှာတော့ ရှော့တိုက်ဒုံးနဲ့ နစ်ချက်ပစ်ခတ်တိုက်ခိုက်လိုက်တယ်လို့ ပြောပါတယ်။

စစ်ကောင်စီတပ်တွေပြန်ထွက်သွားပြီးတဲ့နောက် ပ.အ.ဖ အဖွဲ့က ပြည်သူတွေနဲ့ ပူးပေါင်းပြီး နယ်မြေရှင်းလင်း မီးငြှိမ်းသတ်ပေးခဲ့ကာ မီးလောင်ပြင်မှာ တွေရှိခဲ့တဲ့ လက်ဝတ်ရတနာတွေကိုလည်း ပြည်သူတွေကို ပြန်လည်ပေးအပ်ခဲ့ပြီး မီးဘေးသင့် ပြည်သူတွေအတွက် ပြန်လည် ထူထောင်ရေးလုပ်ငန်းတွေ လုပ်ဆောင်ပေးနေတယ်လို့ ရွှေပန်းရွာ ပ.အ.ဖ ခေါင်းဆောင်က ပြောပါတယ်။

စစ်ကိုင်းတိုင်းမှာ စစ်တပ်အာဏာသိမ်းတဲ့ ဖေဖော်ဝါရီ ၁ ရက်ကနေ  မေလ ၃၁ ရက်အထိ အိမ်ခြေ အလုံး ၁၃၈၄၀ ကိုစစ်ကောင်စီတပ်တွေက မီးရှို့ဖျက်ဆီးခဲ့ကြပြီး တနိုင်ငံလုံး အတိုင်းတာနဲ့ဆိုရင် အိမ်ခြေပေါင်း ၁၈၈၈၆ လုံးမီးရှို့ဖျက်ဆီးခံခဲ့ရတယ်လို့ Data For Myanmar က ဇွန်လ ၇ ရက်မှာ ထုတ်ပြန်ထားပါတယ်။

စစ်ကိုင်းတိုင်း၊ မင်းကင်းမြို့နယ်၊ ကျော်ရွာမှာ စစ်ကောင်စီတပ်ဖွဲ့ဝင်တွေရဲ့ အကြိမ်ကြိမ် အဓမ္မပြုကျင့်ခံရတဲ့ အမျိုးသမီး ၂ ယောက်  မတ် ၂၇ ရက်နေ့က ကိုယ့်ကိုယ်ကိုယ် ဆွဲကြိုးချ အဆုံးစီရင်သွားတယ်လို့ မင်းကင်းဒေသခံ PDF တဦးက အတည်ပြု ပြောပါတယ်။

မင်းကင်းမြို့နယ်၊ ကျော်ရွာကို စစ်ကောင်စီတပ်သားတွေက စိုးမိုးထားပြီး အမျိုးသမီးတွေကို အဓမ္မပြုကျင့်တာ၊ အမျိုးသားတွေကို ဖမ်းဆီးနှိပ်စက် ပစ်ခတ်သတ်ဖြတ်တာတွေအပြင် ရွာသားတွေကို ရွာပြင်ထွက်ခွင့်မပေးတဲ့အတွက် အနီးနားရွာတွေနဲ့ ဆက်သွယ်ဖို့တောင် အခက်အခဲ ရှိနေပါတယ်။

ကျော်ရွာမှာ သတ်သေခဲ့တဲ့ အမျိုးသမီး ၂ ဦး အပါအဝင် ပြည်သူ ၅ ဦးထက်မနည်း သေဆုံးခဲ့တယ်လို့ မင်းကင်းဒေသခံ PDF တဦးက ဆိုပါတယ်။

“အမျိုးသမီး ၂ ယောက် အကြိမ်ကြိမ် အဓမ္မပြုကျင့်ခံရလို့ အဆုံးစီရင်သွားတယ်။ ပြီးခဲ့တဲ့ မတ်လ ၁၇ ရက်နေ့ကစပြီး သူတို့ အင်အားသုံး ဝင်လာတယ်။ ရွာက ထွက်ခွင့်ကလည်း မရဘူး။ ဒီလိုပဲဖြစ်နေတော့ သူတို့ အဆုံးစီရင်သွားတယ်လို့ ကြားသိရတယ်။ အရွယ်တွေကတော့ ၃၀ ကျော် ၃၅ အောက်တွေပေါ့။ ၂ ယောက်ကတော့ အတည်ပြုလို့ရတယ်။ တယောက်ကတော့ အတည်ပြုလို့ မရသေးဘူး။ သူတို့က တရွာလုံးကို စိုးမိုးထားတယ်။ ရွာထဲကနေ ရွာပြင်ထွက်တဲ့သူတောင် ပစ်သတ်နေတဲ့ အနေအထား ဖြစ်တယ်။ ပတ်ဝန်းကျင်ရွာတွေနဲ့ ဆက်သွယ်ဖို့ဆိုတာ တော်တော်ခဲယဉ်းတယ်။ လူသတ်တယ်၊ အလောင်းဖျောက်တယ်၊ အဲလိုပုံစံမျိုး ဖြစ်နေတာဆိုတော့။ အမျိုးသမီး ၂ ယောက်ကတော့ ၂၇ ရက်နေ့က သတ်သေသွားတာဗျ။ သူတို့ ရက်စက်ယုတ်မာမှုတွေကို ရရင်ရသလို တွန်းလှန်သွားဖို့ ကြိုးစားနေပါတယ်။”

အဓမ္မပြုကျင့်မှုတွေနဲ့ ပတ်သက်ပြီး သက်ဆိုင်ရာ စစ်ကောင်စီတပ်တွေဘက်ကိုတော့ မေးမြန်းလို့ မရသေးပါဘူး။ 

မင်းကင်းနယ် တောင်တွင်းချောင်ဒေသမှာ ကျေးရွာပေါင်း ၃၆ ရွာရှိပြီး စစ်အုပ်စုဟာ ကျော်ရွာ၊ မြို့မ၊ ကုလားဆိုက်နဲ့ ကြာပင်ရွာဆိုတဲ့ ရွာလေးရွာမှာ အင်အား ၃၀၀ ကျော်နဲ့ ဖြန့်ခွဲ တပ်စွဲထားပြီး ဒေသတွင်း မွှေနှောက် သောင်းကျန်းနေတာ ဖြစ်ပါတယ်။

အဲဒီဒေသဟာ ယာကြီး-ကလေးဝ လမ်းဖောက်လုပ်တဲ့ အိန္ဒိယကုမ္ပဏီတခုရဲ့ လုပ်ငန်းဆိုက် တည်ရှိရာနေရာ ဖြစ်ပါတယ်။

မင်းကင်းနယ် တောင်တွင်းချောင်ဒေသမှာ စစ်ကောင်စီ၊ ပျူစောထီး ပူးပေါင်းအုပ်စုနဲ့ ဒေသခံ ပြည်သူ့ကာကွယ်ရေး တပ်ဖွဲ့တွေအကြား ထိတွေ့တိုက်ပွဲတွေ ဆက်တိုက်ဖြစ်ပွားနေပါတယ်။