စစ်ကောင်စီ လက်အောက်ခံ ပြန်ကြားရေးဝန်ကြီးဌာနကနေ ၃ နှစ်စာ ပေါင်းပြီး မြန်မာ့ရုပ်ရှင်ထူးချွန်ဆုပေးပွဲ အခမ်းအနားကို လာမယ့် မေ ၆ ရက်နေ့ ‌နေပြည်တော် မြို့တော်ခန်းမ၊ လဟာပြင် ကဇာတ်ရုံမှာ ကျင်းပသွားမှာပါ။

ကိုဗစ်ကပ်ရောဂါကြောင့် ၃ နှစ်ကြာ ရပ်နားခဲ့တဲ့ အကယ်ဒမီပေးပွဲကို စစ်ကောင်စီက သူတို့ လက်ထက်မှာ ပြန်အသက်သွင်းဖို့ ကြိုးစားနေပြီး ပြည်တွင်းက အနုပညာရှင်တွေကို အကယ်ဒမီပေးပွဲ မဖြစ်မနေတက်ကြဖို့ ဖိအားပေးနေပါတယ်။

တော်လှန်ရေးမှာ ပါဝင်နေတဲ့ ဒါရိုက်တာ သည်ခေတ်နေကတော့ အကယ်ဒမီ ပေးပွဲမှာ ပြည်တွင်းက အနုပညာရှင်အချို့ စစ်ကောင်စီရဲ့ ခြိမ်းခြောက်မှုကြောင့် တက်ရမယ့် အခြေအနေတွေ ရှိနေတယ်လို့ ဒီဗွီဘီကို ပြောပါတယ်။

"စစ်ကောင်စီက ဒီသင်္ကြန်ပွဲတို့ အကယ်ဒမီပေးပွဲတို့ကို ခမ်းခမ်းနားနား ကျင်းပချင်တယ်။ တခြား ပွဲတွေ ပွဲတွေကိုလည်း စည်ကားစေချင်တယ်။ အဲဒီအပေါ် အမြင်ဆိုရင် ပြည်သူတွေက စစ်ကောင်စီအပေါ် လူရာမသွင်းဘူးလေ။ လူရာမသွင်းဘူးဆိုတာ အချက် ၂ ချက်ပေါ့။ သူတို့ လူဖြစ်ကြောင်းလည်း ပြချင်တယ်။ သူတို့ လုပ်တဲ့ပွဲတွေ လူစည်ပါတယ်ဆိုတာလည်း ပြချင်တယ်။ ပုံမှန် ဖြစ်တယ်ဆိုတာလည်း ပြချင်တယ်။ ဒီအချက်တွေနဲ့ ဒီလိုမျိုးပွဲတွေကို အတင်းအကျပ် ဖန်တီးတယ် မြင်ပါတယ်။

"အဲဒီအပေါ်မှာ အကယ်ဒမီပေးပွဲနဲ့ ပတ်သက်ပြီးတော့ ပြည်တွင်းက ပြည်သူ့ဘက်ပါတဲ့ အနုပညာရှင်အချို့က စစ်ကောင်စီရဲ့ လက်အောက်မှာ မလူးသာမလွန့်သာ အခြေအနေဆိုတာကို ပြည်သူတွေက နားလည်ပါတယ်။ အဲဒီအတွက် တချို့ကတော့ စစ်ကောင်စီရဲ့ ရုပ်သေးရုပ်လေးတွေအဖြစ်နဲ့ အကယ်ဒမီပေးပွဲကို တက်ကြမှာပေါ့။ ကျန်တဲ့တချို့ကတော့ ပွဲတွေကို တက်ချင်လွန်းတဲ့အပြင် စစ်ကောင်စီကို ကြိုက်လွန်းလို့ တက်ကြတယ်ဆိုတာ ပြည်သူက သိပြီးသားပါ။ ပြည်သူက ကွဲကွဲပြားပြား နားလည်ပြီးသားပါ။ အဲဒီအပေါ်မှာမှ ပြည်သူ့ရဲ့ နားလည်မှု ပေးပြီးသားအပေါ်မှာ အခြား အဆင့်နိမ့်တဲ့ အခြား အနုပညာရှင်တွေနဲ့ ဒွန်တွဲပြီးတော့ ပြည်သူ့ရဲ့ နားလည်မှုအပေါ်မှာ သစ္စာမဖောက်ဖို့ လိုတယ်။ ပြည်သူ့အပေါ် သစ္စာမဖောက်ဖို့နဲ့ တော်လှန်ရေးအပေါ် သစ္စာမဖောက်ဖို့ လိုပါတယ်"လို့ ဒါရိုက်တာ သည်ခေတ်နေက ဒီဗွီဘီကို ပြောပါတယ်။

အကယ်ဒမီ ရပြီးသား အနုပညာရှင်တွေ ပွဲတက်ရင် ရွှေရင်ထိုး တံဆိပ် ပေးမယ်လို့ မြန်မာနိုင်ငံ ရုပ်ရှင်အစည်းအရုံးကနေ ဧပြီ ၂၂ ရက်မှာ ထုတ်ပြန်ထားပါတယ်။ စစ်ကောင်စီက အနုပညာရှင်တွေကို ဖိအားပေး ခြိမ်းခြောက်သလို တဖက်မှာလည်း အနုပညာရှင်အချို့ကို မက်လုံးပေး စည်းရုံးနေတာပါ။

အကယ်ဒမီပွဲမှာ စစ်ကောင်စီရဲ့ ဖမ်းဆီးခံရမှုကနေ ခံဝန်နဲ့ လွတ်လာတဲ့ အနုပညာရှင်တွေကို အသုံးချပြီး ပြည်သူနဲ့ ရန်တိုက်ပေးနိုင်တယ်လို့ တော်လှန်ရေးနယ်မြေမှာ ရောက်နေတဲ့ ဟားငါးကောင်အဖွဲ့မှ လူရွှင်တော် တိုင်းကျော်က ပြောပါတယ်။

"စစ်ကောင်စီက ပြီးခဲ့တဲ့ အတုယောင်သင်္ကြန်တုန်းကလည်း ဒီအကယ်ဒမီ ပေးပွဲမှာ လုပ်မယ့် အကွက်ပဲ သူတို့ သုံးသွားတယ်။ ပြည်သူနဲ့ ဒီတော်လှန်ရေးမှာ ပါခဲ့တဲ့ အနုပညာသမားတွေနဲ့ ထိပ်တိုက် တည်ပေးလိုက်တယ်။ ပြည်သူက တော်လှန်ရေးကို စိတ်ပျက်သွားအောင် ဒီလူတွေက တော်လှန်ရေးမှာ မပါတော့တာပဲဆိုပြီး စိတ်ပျက်သွားအောင် သူတို့က တည်ပေးတယ်။ ဥပမာ- ဂျီဖတ်ဆို သီချင်းတွေဆိုတယ်။ ဒါပေမဲ့ ပြည်သူက အမှ မအတော့တာ။ သင်္ကြန်မှာ ဘယ်သူက ပျော်ပျော်ပါးပါး သီချင်းဆိုသွားတယ်။ ဘယ်သူက သူ့စီးပွားအတွက် စစ်ကောင်စီနဲ့ ပူးပေါင်းသွားတယ်ဆိုတာ ပြည်သူက သိနေပြီ မအတော့ဘူး။

"အဲ့တော့ အကယ်ဒမီပေးပွဲကို သူတို့က ပိုပြီး ဗျူဟာကျကျ အနုပညာသမားနဲ့ ပြည်သူကို ရန်တိုက်ပေးမယ်။ နောက်ပြီးကျတော့ ဒီတော်လှန်ရေးမှာ ပါခဲ့တဲ့ ဖမ်းဆီးထိန်းသိမ်းခံထားရတဲ့ အနုပညာသမားအချို့ ရှိသေးတယ်။ ပြန်လွှတ်ပေးထားတဲ့ အနုပညာသမားတွေလည်း ရှိတယ်။ အဲဒီ အနုပညာသမားတွေကို ဒီအကယ်ဒမီပေးပွဲမှာ ပြည်သူတွေ ဝေဝါးအောင် ထုတ်ရှိုးမယ်။ ပြီးရင် ပြည်သူနဲ့ ထိပ်တိုက် ရန်တိုက်ပေးမယ်လို့ မြင်တယ်။ တော်လှန်ရေးမှာ ပါတဲ့ ဖမ်းဆီး ထိန်းသိမ်းခံထားရတဲ့ အနုပညာသမားတွေကို အကယ်ဒမီ ပေးလိုက်မယ်လို့ မြင်တယ်။ ဒါ အတင်းသပ်သပ် ဖိအားပေးပြီး ပြည်သူနဲ့ ပြည်သူ့အနုပညာရှင် အချို့ကို ထိပ်တိုက် တည်ပေးမယ့်ပွဲလို့ မြင်တယ်။ ပြောရမယ်ဆို ဘာအနုပညာမှ မပါတဲ့ အကယ်ဒမီ ပေးပွဲပေါ့။ အရင် အာဏာမသိမ်းခင်ကလိုမျိုး ပြည်သူက ရင်ခုန်မယ့် အကယ်ဒမီ ပေးပွဲ မဟုတ်ဘူး။ ငြိမ်ငြိမ်လေး နေနေတဲ့ ပြည်သူ့အနုပညာရှင်တွေကို ထိပ်တိုက် ရန်ဖြစ်အောင် ယုတ်မာတဲ့ပွဲပဲ"လို့ လူရွှင်တော် တိုင်းကျော်က ဒီဗွီဘီကို ပြောပါတယ်။

စစ်ကောင်စီက ၃ နှစ်စာ ပေါင်းလုပ်မယ့် အကယ်ဒမီ ပေးပွဲအတွက် ခမ်းခမ်းနားနား ကျင်းပဖို့ ပြင်ဆင်နေပြီး သူတို့ ဦးဆောင်လုပ်တဲ့ပွဲမှာ ရွှေစင်ရုပ်ထုတွေ အပါအဝင် ကုန်ကျစရိတ် အားလုံးကို နိုင်ငံတော် အသုံးစရိတ်ထဲကနေ မတည် သုံးစွဲသွားမယ်လို့ စစ်ကောင်စီ လက်အောက်ခံ ပြန်ကြားရေးဝန်ကြီး ဦးမောင်မောင်အုန်းက မတ်လအတွင်းက ပြောခဲ့ပါတယ်။

မေလ ၆ ရက်မှာလုပ်မယ့် အကယ်ဒမီပွဲအတွက် အနုပညာရှင်တွေကို မေလ ၁ ရက်ကနေ ၇ ရက်အတွင်း ရိုက်ကူးရေး လုပ်ငန်းတွေ ရပ်နားထားဖို့ ရုပ်ရှင်အစည်းအရုံးက ထုတ်ပြန်ထားပါတယ်။

စစ်ကောင်စီကို ထောက်ခံတဲ့ အနုပညာရှင် တချို့ကတော့ အကယ်ဒမီပေးပွဲ တက်ရောက်ဖို့ ဆန္ဒရှိနေကြပြီး အကယ်ဒမီပွဲမှာ စစ်ကောင်စီ လက်အောက်ခံ အနုပညာရှင်တွေအပြင် ခံဝန်နဲ့ လွတ်လာတဲ့ အနုပညာရှင်အချို့ကို အကယ်ဒမီဆုတွေ ပေးနိုင်တယ်လို့ ခန့်မှန်း ပြောဆိုတာတွေ ရှိနေပါတယ်။

လာမယ့် ဧပြီလထဲမှာ စစ်ကောင်စီဩဇာခံ မြန်မာနိုင်ငံရုပ်ရှင်အစည်းအရုံးကဦးစီးတဲ့ မြန်မာ့ရုပ်ရှင် အကယ်ဒမီထူးချွန်ဆုပေးပွဲကို ကျင်းပဖို့ စီစဉ်နေပါတယ်။ ဒီနှစ်မှာကျင်းပမယ့် အကယ်ဒမီပေးပွဲက ပြီးခဲ့တဲ့ ကိုဗစ်ကာလကတည်းက ရပ်ဆိုင်းထားခဲ့ရတဲ့ ၂၀၁၉၊ ၂၀၂၀၊ ၂၀၂၂ ခုနှစ်အတွင်းက ရုံတင်ခဲ့တဲ့ ၃ နှစ်စာကို ရုပ်ရှင်ကားတွေကို ပေါင်းပြီး အကယ်ဒမီဆု ရွေးချယ်သွားမှာဖြစ်တယ်လို့ သိရပါတယ်။

၂၀၁၉ ရုပ်ရှင်ဆန်ခါတင်စာရင်းကိုတော့ ၂၀၂၀ ပြည့်နှစ်ကတည်းက ထုတ်ပြန်ကြေညာထားခဲ့တာမှာ လက်ရှိ နွေဦးတော်လှန်ရေးမှာပါဝင်နေဆဲ အနုပညာရှင်တွေရဲ့ ရုပ်ရှင်ကားတွေလည်း ပါဝင်နေတာပါ။ အဲဒီအထဲမှာ အကယ်ဒမီမင်းမော်ကွန်းရဲ့ “နိုင်ငံကြီးသား” “ထာဝရထက်နှစ်ဆ” စတဲ့ ရုပ်ရှင်ကားတွေပါဝင်နေတာကြောင့် အကယ်ဒမီမင်းမော်ကွန်းကို အကယ်ဒမီပေးပွဲနဲ့ ပတ်သက်တာတွေအပြင် တော်လှန်ရေးနဲ့ ပတ်သက်တဲ့အကြောင်းအရာတချို့ကို  ဒီဗွီဘီက ဆက်သွယ်မေးမြန်းထားပါတယ်။

မေး - စစ်ကောင်စီလက်အောက်မှာ ကျင်းပမယ့် အကယ်ဒမီပေးပွဲနဲ့ ပတ်သက်လို့ ကိုကျော့်ရဲ့ အမြင် ဘယ်လိုရှိပါသလဲ။

ဖြေ။ “တက်တဲ့သူတွေ‌တော့ တက်ကြမှာပေါ့။ ဒါပေမဲ့ အကယ်ဒမီစင်မြင့်ပေါ်တက်ပြီးတော့ ဘယ်သူက ဒီဆုကိုယူမလဲဆိုတာကိုပဲ ကျနော်တို့က စိတ်ဝင်တစားစောင့်ကြည့်ရမှာပေါ့။ ဟုတ်တော့လည်း ဟုတ်ပါတယ်။ သူတို့က ပေးပြီးတော့ မယူပြန်ဘူးဆိုရင်တော့ အခက်အခဲဖြစ်နိုင်တဲ့ကိစ္စတွေလည်း ကြိုတော့မြင်နေရတယ်။ တချို့တွေက ဘေးကျပ်နံကျပ်ထဲ နေနေရတယ်ပေါ့။ တချို့တွေကတော့ အဲဒီလိုမဟုတ်ဘူး ဟိုဘက်ကို ပေါ်ပေါ်ထင်ထင်ကူး သွားပြီးတော့ ပြည်သူကို သစ္စာဖောက်သွားတာတွေရှိပါတယ်။ သစ္စာဖောက်လို့ ပြောတဲ့နေရာမှာ တော်လှန်ရေးအစပိုင်းတုန်းက ပြည်သူနဲ့တသားတည်းဆိုပြီး လိမ်ညာခဲ့ပြီးတော့ အခုချိန်မှာ စကစဘက်က ပေါ်ပေါ်ထင်ထင် ရပ်တည်သွားတဲ့သူမျိုးတွေကို သစ္စာဖောက်တယ်လို့ပဲ ကျနော်သုံးချင်ပါတယ်။”

“ကျနော်တို့ ဖျော်ဖြေရေးနဲ့ဆိုင်တဲ့ အနုပညာလုပ်ငန်းရုပ်ရှင်ဖြစ်ဖြစ် ဂီတဖြစ်ဖြစ်ပေါ့ အားလုံးက ငွေကြေးနဲ့ သက်ဆိုင်နေတယ်၊ Commercial art ဖြစ်တဲ့အတွက် ကျနော်တို့ တိုင်းပြည် အဆင်ပြေနေမှ ကျနော်တို့ ပြည်သူတွေပြေလည်နေမှ ကျနော်တို့အနုပညာတွေလည်း စီးပွားရေးအရအောင်မြင်မှာ ဖြစ်ပါတယ်။ ကျပ်တည်းနေရင် ရုပ်ရှင်တွေမကြည့်တော့ဘူး စတိတ်ရှိုးတွေ သွားမကြည့်တော့ဘူး။ ဒါပေမဲ့ ဆန်ဈေးတွေ ဆီဈေးတွေတက်ရင်လည်း ဝယ်ရမယ်သုံးရမယ်။ ကားခဆီဈေးတွေတက်ရင်လည်း ဒါမဖြစ်မနေ ကျောင်းသွား ရုံးသွားဖို့ ဝယ်သုံးရမှာပဲ။ ဒါပေမဲ့ တဖက်မှာဖျော်ဖြေရေးနဲ့ပတ်သက်တာတွေ အပျော်အပါးတွေကို လျှော့ချ ကြမှာဖြစ်တယ်။ နောက်တနည်းပြောရရင် ပြည်သူတွေ အဆင်ပြေနေဖို့ လိုပါတယ်။ အနုပညာတွေ အရင်မလုပ်ဘဲနဲ့ ကျနော်တို့က တိုင်းပြည်ကောင်းစားဖို့ ပြည်သူအဆင်ပြေဖို့ ရှေးရှုပြီးတော့ အရင်လုပ်ရပါမယ်။ ဒါတွေကို အရင်မလုပ်ဘဲနဲ့ စကစနဲ့ပေါင်းပြီးတော့ ပြည်သူကို ညာစားနေတဲ့ အနုပညာရှင်တွေသည် ပြည်သူကို သစ္စာဖောက်တဲ့ သရဲဘောကြောင်တဲ့ အနုပညာသမားတွေ  ပဲဖြစ်ပါတယ်ခင်ဗျ။”

မေး။ နောက်တခုကတော့ ဒီနှစ်အကယ်ဒမီပေးပွဲမှာ အရင်အစိုးရလက်ထက်ကတည်းက ထုတ်ပြန်ထားပြီးသား ၂၀၁၉ ဆန်ခါတင်ကားတွေကိုလည်း ထည့်သွင်း ရွေးချယ်သွားမယ်လို့ ပြောထားတာဆိုတော့ ကိုကျော့် ရုပ်ရှင်ကားတွေလည်းပါဝင်နေတယ်။ ဆိုတော့ အနုပညာရှင်တစ်ယောက်အနေနဲ့ ဘာများပြောချင်ပါသလဲ။

ဖြေ။ ‘ကျနော်က တိုင်းပြည်အေးချမ်းနေတဲ့အချိန်တုန်းကတောင် အကယ်ဒမီဆိုတာကို လိုချင်ခဲ့တာ မဟုတ်ပါဘူးဗျ။ အခုလိုအချိန်ဆိုတော့ ပိုဆိုးတာပေါ့။ ပေးတာမပေးတာ သူတို့အပိုင်းပါပဲ။ လက်ခံခြင်းမခံခြင်းကတော့ ကျနော်တို့အပိုင်းပါပဲ ကျနော်တို့က လုပ်စရာရှိတာကို ပြတ်ပြတ်သားသားလုပ်ခဲ့ပြီးသားဆိုတာ အားလုံးသိပါတယ်။ အဲဒါကြောင့်မို့ အကယ်ဒမီဆိုတဲ့ ကိစ္စတွေနဲ့ ကျနော်နဲ့က ဘာမှသက်ဆိုင်ခြင်းလည်း မရှိတော့ဘူး။ နောက်ပြီးတော့ မြန်မာနိုင်ငံရုပ်ရှင်အစည်းအရုံးကနေပြီးတော့လည်း ကျနော့် သဘောဆန္ဒအလျောက် နုတ်ထွက်ပြီးသားဆိုတာလည်း အများသိအောင်ကြေညာပြီးသားဖြစ်တယ်။ စကစကိုလည်း အစကတည်းက တော်လှန်ခဲ့တာဆိုတော့ ရုပ်ရှင်အစည်းအရုံးရော စကစရောက လုပ်တဲ့ ဘယ်လိုပွဲမျိုးနဲ့မဆို ကျနော်နဲ့ မသက်ဆိုင်ပါဘူး။”

မေး။ လက်ရှိမှာ စစ်ကောင်စီက ဖမ်းဆီးထားခဲ့တဲ့ အနုပညာရှင်တွေကို ပြန်လွှတ်ပေးပြီး အနုပညာအလုပ်တွေ ထဲပါဝင်စေတာမျိုး၊ နောက်ပီးတော့ အဲဒီအနုပညာရှင်တွေပါတဲ့ရုပ်ရှင်တွေ ဇာတ်လမ်းတွေကို ပြသနေတာမျိုးတွေ လုပ်နေတာဟာ စစ်ကောင်စီရဲ့ လှည့်ကွက်တခုလို့ ထင်ပါသလား။

ဖြေ- “အဓိက ကတော့ ခုနက ကျနော်ပြောသလို နှစ်ပိုင်းရှိတာပေါ့။ သူတို့ဘက်ကို ပါသွားတဲ့သူတွေနဲ့တော့ သူတို့က ပျော်ပျော်ကြီးကျင်းပမယ် လုပ်နေမယ်ပေါ့။ သူတို့ဘက်ကို မရပ်တည်တဲ့သူတွေကိုကျတော့ ပိုပြီးတော့ ကျဉ်းထဲ ကျပ်ထဲ ရောက်လာအောင် ပိုပြီးတော့ ပရိသတ်နဲ့ စိတ်ဝမ်းကွဲအောင်အကြောင်းတွေ ဖန်တီးမယ်ဆိုတော့ ကျနော်ကတော့ ဒါကိုမြင်ပီးသားပါ။ တော်လှန်ရေးရှည်ကြာလာတာနဲ့အမျှ သူတို့ကတော့ ဉာဏ်နီဉာဏ်နက်မျိုးစုံကို ထုတ်သုံးနေမှာပါပဲ။”

မေး။  တော်လှန်ရေးကာလ တလျောက်မှာ အခက်အခဲတွေကြုံရတဲ့အခါ စိတ်ပိုင်းဆိုင်ရာ၊ ရုပ်ပိုင်းဆိုင်ရာ ပင်ပန်းတာတွေရှိမှာဆိုတော့ ဘယ်လိုမျိုး ကျော်ဖြတ်ခဲ့ရလဲ။

ဖြေ။ “ကျနော်တို့က တောထဲမှာလည်းနေခဲ့ဖူးတယ်။ အခု ဒီနိုင်ငံမှာလည်းနေနေတယ်ဆိုတော့ တောထဲလည်း တော်ထဲအလျောက် ဒီမှာဆိုလည်း ဒီမှာအလျောက်မတူတဲ့ အခက်အခဲတွေ မျိုးစုံရှိပါတယ်။ တခါတလေမှာလည်း ကျနော်တို့ကိုယ်တိုင်လည်း လူဖြစ်တဲ့အလျောက် စိတ်ဓာတ်ကျတဲ့အခါမျိုးတွေလည်းရှိပါတယ်။ ဒါပေမဲ့ အမြဲကြီးတော့ မဟုတ်ဘူးပေါ့၊ ကျသွားလိုက် ပြန်ပြီး တော်လှန်ရေးမှာလုပ်ရမယ်ဆိုတဲ့စိတ်နဲ့ ကိုယ့်ကိုယ်ကိုယ် ထူမတ်လိုက်ပေါ့။ ဒီလိုပဲ အားလုံးလည်း သွားနေရမယ်ထင်တာပဲ။ အထူးသဖြင့်တော့ တောထဲက ကျနော်တို့ ညီအစ်ကိုမောင်နှမတွေကိုပိုပြီးတော့ကိုယ်ချင်းစာပါတယ်။ ဒါ့ကြောင့်အများကြီးတော့ မညည်းချင်ဘူး။ တခါတလေကျတော့လည်း ပြန်ပြီးတော့ မထချင်လောက်အောင် ဖြစ်ရတာမျိုးတွေလည်းရှိပါတယ်။ ဒါပေမဲ့ အခုချိန်ထိတော့ ကြိုးစားပြီး ပြန်ထူမတ်နေဆဲပေါ့။”

မေး-တော်လှန်ရေးရှည်ကြာလာတဲ့အခါမှာ ပါဝင်နေကြတဲ့အနုပညာရှင်တွေ၊ အတတ်ပညာရှင်တွေနဲ့ တော်လှန်ရေးရဲဘော်တွေက မတူတဲ့ပုံစံတွေနဲ့ တိုက်ခိုက်ခံရတာမျိုးတွေ ကြုံလာကြတဲ့အခါ တချို့သူတွေက လက်လျော့နောက်ဆုတ်သွားကြတာမျိုးတွေလည်းရှိလာတဲ့အပေါ် ဘာများပြောချင်လဲ။

ဖြေ။ “ကျနော်တို့ ညီအစ်ကိုတွေကိုကျနော်တခုပဲပြောချင်တာက ပြည်တွင်းမှာ ကြံ့ကြံ့ခံနေကြတဲ့ ပြည်သူတွေရော၊ တောထဲက ရဲဘော်တွေရော၊ ပြည်ပမှာရှိနေတဲ့ လူတွေရော အကုန်လုံးက ကြံ့ကြံ့ခံရင်းနဲ့ ရပ်တည်နေကြရတာပါ။ ဒီလိုအခက်အခဲတွေကြုံလာရတဲ့အခါ ကျနော်တို့ စိတ်ဓာတ်ကျလို့တော့ရပါတယ်။ ဒါပေမဲ့ လက်လျော့လိုက်လို့တော့မရပါဘူး။ နဂိုတည်းက ပါလာခဲ့တဲ့ အရှိန်အဟုန်အတိုင်းပဲ ဆက်ပြီးတော့ ကြိုးစားပေးနေစေချင်ပါတယ်။ ဒါမှလည်း ကျနော်တို့တော်လှန်ရေးက အချိန်မှီအတွင်းမှာ အောင်မြင်ပါလိမ့်မယ်။ အဲဒီလို မြန်မြန်ဆန်ဆန်အောင်မြင်ဖို့လည်း လိုပါတယ်။ ဒီနေ့ချိန်ထိ ပြည်တွင်းမှာ အသက်ဆုံးရှုံးနေရတဲ့ အိုးအိမ်တွေ ဆုံးရှုံးနေရတဲ့ တိုင်းရင်းသားတွေ ညီအစ်ကိုမောင်နှမတွေ အများကြီးရှိနေပါတယ်။ သူတို့ အတွက်ကို ကျနော်တို့က မဖြစ်မနေ ဆက်ပြီးတော့ ကြိုးစားနေဖို့တော့ လိုပါတယ်။”

မေး - တခြားဖြည့်စွက်ပြောချင်တာရှိရင် ပြောပေးပါ။

ဖြေ။ “အဓိကကတော့ ကျနော်တို့ ဒီတော်လှန်ရေးက မြန်မြန်အောင်မြင်ဖို့ လိုအပ်နေပါပြီ ဟိုဘက်ကလည်း တနေ့တခြားဆုံးရှုံးမှုတွေ ရှိလာသလို သူတို့ခြေကုပ်ယူနိုင်တာတွေ အင်အားကြီးထွားလာတဲ့ အကြောင်းအရာတွေလည်း ရှိနေပါတယ်။ ဆိုတော့ ကျနော်တို့ တော်လှန်ရေး အမြန်အောင်မြင်အောင် ညီညီညွတ်ညွတ်နဲ့ အရှိန်အဟုန်မြှင့်တင်ပြီးတော့ လုပ်ဖို့လည်း လိုပါလိမ့်မယ်။ နောက်ထပ် ကျနော်တို့ ဒီတော်လှန်ရေးထဲမှာ ရန်သူကိုရင်ဆိုင်တဲ့အခါ ကိုယ့်အချင်းချင်းက အပြစ်တင်ပြီးတော့ တယောက် တပေါက်နဲ့ ရင်ဆိုင်ဖို့ဆို မလွယ်ကူနိုင်ပါဘူး။ ဆိုတော့ ကိုယ့် အချင်းချင်းလည်း ယုံကြည်ရမှာဖြစ်သလို အချင်းချင်းဖေးမပြီး စာနာနားလည်ပြီး ရှေ့ဆက်ဖို့ လိုပါလိမ့်မယ်ခင်ဗျ။ အားလုံးကိုလည်း ကျနော်က ကျေးဇူးတင်ပါတယ်။”

ဒီဗွီဘီကလည်း ကျေးဇူးတင်ပါတယ်။