စစ်ကိုင်းတိုင်း၊ မုံရွာမြို့နယ်၊ အလုံမြို့မှာ အခြေစိုက်ထားတဲ့ အနောက်မြောက်တိုင်း စစ်ဌာနချုပ် တပ်စခန်းကို ပြည်သူ့ကာကွယ်ရေးအဖွဲ့တွေက ဩဂုတ် ၃၀ ရက် ည ၉ နာရီလောက်က လက်နက်ကြီးနဲ့ ပစ်ခတ်တိုက်ခိုက်ခဲ့တယ်လို့ ဒေသခံတွေက ပြောပါတယ်။
နမခတပ်နဲ့အနီးဆုံး ညောင်ခြေထောက်ရွာသားတယောက်က “မနေ့ညက တပ်ထဲကို လက်နက်ကြီး ၂ လုံးကျပေါက်ကွဲသံ ကြားရတယ်။ မြေကြီးတွေပါ တုန်ခါသွားတယ်ဗျ။ အထိအခိုက်၊ အပျက်အစီးကတော့ တပ်အတွင်း အရပ်သားတွေ မဝင်ရတော့ မသိရဘူး” လို့ ပြောပါတယ်။
အခုလို လက်နက်ကြီးနဲ့ ပစ်ခတ်ခံရပြီး နမခတပ်အတွင်း ခလရတပ်ရင်း ၆ ေရှ့မှာ ကျရောက်ပေါက်ကွဲခဲ့ကာ အထိအခိုက် အတိအကျ မသိရဘူးလို့ တပ်တွင်းနီးစပ်သူတွေက ပြောပါတယ်။
ကနောင်အဖွဲ့ တာဝန်ရှိသူက “ပစ်ခတ်ခဲ့တာက အရင်က ကျနော်တို့ ၁၂၀ မမတွေနဲ့ ပစ်ခတ်ခဲ့ဖူးတယ်။ အခုဟာကတော့ အဝက ၆ လက်မအကျယ်နဲ့ အရှည် ၂ ပေနီးပါးလောက် ရှိမယ့် လက်နက်ကြီး ၂ လုံးနဲ့ ပစ်ခတ်ခဲ့တယ်။ အခုပစ်တဲ့လက်နက်ကို မဟူရာဒုံးကျည်လို့ အမည်ပေး ပစ်ခတ်ခဲ့တယ်ဗျ။ သူတို့ဘက်ကလည်း ပြန်ပစ်တာရှိတယ်။ ကျနော်တို့က အဝေးထိန်းနဲ့ ပစ်ခတ်ခဲ့တာဆိုတော့ အထိအခိုက် မရှိခဲ့ဘူး” လို့ ပြောပါတယ်။
အဲဒီပစ်ခတ်မှုကို ဘုတလင်ကနောင်အဖွဲ့နဲ့ Future Star တို့ ပူးပေါင်းတိုက်ခိုက်ခဲ့တာ ဖြစ်တယ်လို့လည်း သိရပါတယ်။
စစ်ကိုင်းတိုင်း မုံရွာမြို့နယ် အလုံမြို့အခြေစိုက် အနောက်မြောက်တိုင်းစစ်ဌာနချုပ် (နမခ) တပ်ရင်း ကို ဒီဇင်ဘာ ၂၂ ရက် ညနေ ၃ နာရီဝန်းကျင်လောက် ပြည်သူ့ကာကွယ်ရေးပူပေါင်းတပ်ဖွဲ့တွေက ပူးပေါင်းပစ်ခတ်တာတွေရှိတယ်လို့ ဒေသခံတွေဆီက သိရပါတယ်။
ပစ်ခတ်ခဲရာမှာပါဝင်ခဲ့တဲ့ Ninja (ဘုတလင်) အဖွဲ့ခေါင်းဆောင် ဗိုလ်ခေါကြီးက “ကျနော်တို့ အခုလို ပစ်ခတ်တာတွေ လုပ်ရတာက ဘုတလင်မြို့နယ်အနောက်ဘက် ယင်းမာပင်မြို့နယ်ဘက်ကို လေယာဉ်တွေ အသုံးပြုတိုက်ခိုက်ခဲ့လို တန်ပြန်လက်စားခြေပြန်တိုက်တာဗျ။ ပထမက လက်နက်ကြီး သုံးလုံးပစ်ဖို့ ရည်ရွယ်ခဲ့တယ်ဗျ။ နောက်တော့ ပတ်ဝန်းကျင်မှာ ကြက်သွန်စိုက်တဲ့ ပြည်သူတွေလည်းရှိနေတာက တစ်ကြောင်း၊ ကျနော်တို့ လုံခြုံရေးအရကတစ်ကြောင်းမို့ လက်နက်ကြီး တစ်လုံးပဲ ပစ်ခတ်တိုက်ခိုက်ခဲ့ရတာ” လို့ ပြောပါတယ်။
အခုတိုက်ခိုက်ခဲ့တဲ့အဖွဲ့တွေဟာ လျှပ်စီး (ဘုတလင်)၊ ဒုံးပျံ (ဘုတလင်)၊ Three Tiger (ဘုတလင်)၊ ယမ်းဘီးလူး (ဘုတလင်) နဲ့ လှော်တက်အင်အားစု (126) (အရာတော်)၊ Zero Fighter (ဒီပဲယင်း) ၊ နင်ဂျာ(ဘုတလင်) PDF မဟာမိတ်(၇)ဖွဲ့ ဖြစ်တယ်လို့ ဆိုပါတယ်။
အခုလို ပစ်ခတ်တိုက်ခိုက်ခဲ့တာကြောင့် စစ်ကောင်စီဘက်မှ တပ်သား ၂ ဦး သေဆုံးတယ်ဆိုတဲ့ သတင်းတွေ ထွက်ပေါ်နေပေမဲ့ DVB အနေနဲ့ သီးခြားအတည်မပြုနိုင်သေးပါဘူး။
အဲဒီလို အပစ်ခတ်ခံရတာကြောင့် စစ်ကောင်စီဘက်မှ မုံရွာ-ဘုတလင်သွား ကားလမ်းမကြီးကို ပိတ်ဆို တားဆီးစစ်ဆေးခဲ့တာတွေလည်း ရှိတယ်လို့ ဒေသခံတွေရဲ့ ပြောပြချက်အရ သိရပါတယ်။
အနောက်မြောက်တိုင်းစစ်ဌာနချုပ် တိုက်ခိုက်ခံရတာနဲ့ ပတ်သက်ပြီး စစ်ကောင်စီဘက်ကတော့ သတင်းထုတ်ပြန်တာ မရှိသေးပါဘူး။
