ကမ္ဘာတဝန်းလုံးမှာ သတင်းသမားတွေ  အန္တရာယ်ကြုံနေကြရတယ်လို့ နော်ဝေနိုင်ငံမှာ ဆုလက်ခံယူဖို့ ရောက်ရှိနေတဲ့ နိုဘယ်လ်ငြိမ်းချမ်းရေးဆုရှင်နှစ်ယောက် ပြောကြားလိုက်ပါတယ်။

ဖိလစ်ပိုင် အမျိုးသမီးဂျာနယ်လစ် မာရီရာရက်စ်ဆာ ရုရှားဂျာနယ်လစ် ဒီမစ်ထရီ မူရာတော့ဗ်တို့ဟာ သူတို့ နိုင်ငံတွေမှာ ဖြစ်ပျက်နေတဲ့ လာဘ်ပေးလာဘ်ယူမှု၊ အကျင့်ပျက်ခြစားမှုနဲ့ တရားမဲ့ပြုကျင့်မှုတွေကို သတ္တိရှိရှိ ဖော်ထုတ်ရေးသားခဲ့ကြတဲ့အတွက် ကမ္ဘာမှာ ဂုဏ်သိက္ခာ အရှိဆုံးလို့ သတ်မှတ်ကြတဲ့ နိုဘယ်လ်ငြိမ်းချမ်းရေးဆု ချီးမြှင့်ခံရတာ ဖြစ်ပါတယ်။

ဆုချီးမြှင့်တာနဲ့ ပတ်သက်လို့ နိုဘယ်လ်ဆုရွေးချယ်ရေး ကော်မတီရဲ့ ကြေညာချက်မှာ သတင်းစာဆရာမ  ရက်စ်ဆာနဲ့  သတင်းစာဆရာ မူရာတော့ဗ်တို့ဟာ ဖိလစ်ပိုင်နဲ့ ရုရှားမှာ လွတ်လပ်စွာ ထုတ်ဖော်ပြောဆိုခွင့်အတွက် သတ္တိရှိရှိ တိုက်ပွဲဝင်သူတွေဖြစ်တယ်လို့ ဖော်ပြထားပါတယ်။

တချိန်တည်းမှာ သူတို့ နှစ်ယောက်စလုံးဟာ ဒီမိုကရေစီနဲ့ လွတ်လပ်ခွင့်တွေ ယိုယွင်းလာနေတဲ့ ဒီနေ့ကမ္ဘာမှာ လွတ်လပ်ခွင့်တန်ဖိုးဘက်က ခုခံရပ်တည်ပေးနေတဲ့ သတင်းသမားအားလုံးကို ကိုယ်စားပြုတယ်လို့ ဆိုထားပါတယ်။

သတင်းစာ ရှင်းလင်းပွဲမှာ ဖိလစ်ပိုင် သတင်းစာဆရာမ ရက်စ်ဆာက ဒီနေ့အချိန်မှာ အချက်အလက်အပေါ် အခြေမခံတဲ့ ဆိုရှယ်မီဒီယာတွေပေါ်က ဒေါသနဲ့ အမုန်းတရားတွေဟာ လျင်လျင်မြန်မြန် ပျံ့နေတာကိုလည်း သတိပေးသွားပါတယ်။

အရင်နှစ်ကတော့ နိုဘယ်လ်ငြိမ်းချမ်းရေးဆုကို ကုလသမဂ္ဂ စားနပ်ရိက္ခာ ထောက်ပံ့ရေးအစီအစဉ်က ရရှိခဲ့ပြီး ကိုဗစ်ကပ်ဘေးကြောင့် ပုံမှန်အခမ်းအနားကို မကျင်းပနိုင်ခဲ့ပါဘူး။ 

ဒီနှစ် ဆုပေးပွဲကို အရင်က အစဉ်အလာအတိုင်း အော်စလို မြို့တော်ခန်းမမှာ ဒီဇင်ဘာ ၁၀ ရက်နေ့ ကျင်းပမှာဖြစ်ပြီး ဆုရရှိသူတွေ ကိုယ်တိုင် တက်ရောက်ကြမှာ ဖြစ်ပါတယ်။