ထိုင်းနိုင်ငံမှာ ကိုဗစ်-၁၉ ရောဂါကို အန္တရာယ်ရှိ ကူးစက်ရောဂါစာရင်းမှ ပယ်ဖျက်ပြီး စောင့်ကြည့်ရမယ့်ရောဂါအဆင့်သို့ လျှော့ချသွားမှာဖြစ်တယ်လို့ အစိုးရပြန်တမ်းက စက်တင်ဘာ ၂၀ ရက် နေ့စွဲနဲ့ ထုတ်ပြန်ပါတယ်။
လက်ရှိ ထိုင်းနိုင်ငံမှာ ကိုဗစ်-၁၉ ရောဂါ ကူးစက်မှုနှုန်းရော သေဆုံးမှုနှုန်းပါ လျော့ပါးလာပြီး ကာကွယ်ဆေးတွေလည်း တနိုင်ငံလုံး ထိုးနှံပြီးဖြစ်ကြောင်း၊ နောက်ထပ် ကာကွယ်ဆေးတွေလည်း အလုံအလောက်ရှိနေသလို ပြည်သူလူထုကြားမှာလည်း ကိုယ်ခံအားတွေ ပြည့်လာတဲ့အတွက် ထိုင်းကျန်းမာရေးဝန်ကြီးဌာနမှ လာမယ့် အောက်တိုဘာ ၁ ရက်ကစပြီး အန္တရာယ်ရှိရောဂါအဆင့်မှ စောင့်ကြည့်ရမယ့် ရောဂါအဆင့်သို့ လျှော့ချ သတ်မှတ်သွားမှာ ဖြစ်တယ်လို့ ထိုင်းအစိုးရဝန်ကြီးများရုံး ပြောရေးဆိုခွင့်ရှိသူ နန်းဆောင် တရိုင်းဆူရီ တရိုင်းဆွန်နကွန်းက ပြောပါတယ်။
အန္တရာယ်ရှိအဆင့်မှ လျှော့ချတဲ့အခါ လိုက်နာဆောင်ရွက်ရမယ့် စည်းမျည်းစည်းကမ်းတွေနဲ့ ပတ်သက်ပြီး ထိုင်းနိုင်ငံ ကိုဗစ်-၁၉ အခြေအနေ ကွပ်ကဲထိန်းချုပ်ရေး ဗဟိုကော်မတီက လာမယ့် စက်တင်ဘာ ၂၃ ရက်နေ့မှာ ဆွေးနွေးဖို့ရှိတယ်လို့ ဆိုပါတယ်။
ကိုဗစ်-၁၉ ရောဂါဟာ ကိုရိုနာဗိုင်းရပ်စ်ပိုးကြောင့်ဖြစ်ပြီး ပိုးကူးစက်ခံရရင် ဖျားနာတာ၊ ချောင်းဆိုးတာ၊ မောပန်းနွမ်းနယ်တာ၊ အဆုတ်နာတာ၊ အသက်ရှူလမ်းကြောင်းဆိုင်ရာ ပြဿနာဖြစ်ပြီး အခန့်မသင့်က သေဆုံးနိုင်တယ်လို့ ထိုင်းကျန်းမာရေးဝန်ကြီးဌာနက လွန်ခဲ့တဲ့ ၂၀၁၉ ခုနှစ်က ထုတ်ပြန်ခဲ့တာဖြစ်ပါတယ်။
အန္တရာယ်ရှိ ကူးစက်ရောဂါ ဖြစ်တာကြောင့် ရောဂါကာကွယ်ထိန်းချုပ်ရေးအတွက် အရေးပေါ် ဥပဒေ၊ ညမထွက်ရဥပဒေတွေ ထုတ်ပြန်ကာ ခရီးသွားလာမှု၊ ရောင်းဝယ်ဖောက်ကားမှု အစရှိတဲ့ လုပ်ငန်းဆောင်တာတွေ ကန့်သတ်ခဲ့ပါတယ်။
ထိုင်းနိုင်ငံရဲ့ ဒီကနေ့ စက်တင်ဘာ ၂၁ ရက် ကိုဗစ်-၁၉ ကူးစက်မှုအခြေအနေမှာ ကူးစက်ခံရသူ လူနာသစ် ၁,၁၂၉ ယောက်၊ သေဆုံးသူ ၁၁၃ ယောက်၊ ဆေးရုံမှာကုသနေသူ ၈,၃၇၁ ေယာက်နဲ့ သက်သာလို့ ဆေးရုံကဆင်းရသူ ၉၃၄ ယောက်ရှိတယ်လို့ ထိုင်းနိုင်ငံ ကိုဗစ်-၁၉ အခြေအနေ ကွပ်ကဲထိန်းချုပ်ရေးကော်မတီက ထုတ်ပြန်ထားပါတယ်။
