ဥရောပသမဂ္ဂ (အီးယူ)ရဲ့ ညှိနှိုင်းရေးမှူးတွေဟာ ကာဗွန်စျေးကွက်ကို ပြန်ပြင်ဆင်ဖို့၊ ကမ္ဘာဂြိုဟ်ရဲ့ အပူထုတ်လွှတ်မှု ပိုမိုမြန်မြန်လျှော့ချဖို့နဲ့ ၂၀၂၇ ခုနှစ်မှာ ကုန်းလမ်းပို့ဆောင်ရေးနဲ့ အဆောက်အဦတွေမှာသုံးတဲ့ လောင်စာဆီ CO2 ကုန်ကျစရိတ် အသစ်တွေ သတ်မှတ်ဖို့ ဒီဇင်ဘာ ၁၈ ရက်က သဘောတူညီချက်တရပ် ရရှိခဲ့ပါတယ်။

အီးယူအစုအဖွဲ့ရဲ့ ကာဗွန်စျေးကွက်ဟာ လေထုညစ်ညမ်းစေတဲ့ CO2 ပါမစ်တွေကို ဝယ်ဖို့ ဓာတ်အားပေးစက်ရုံ ၁၀,၀၀၀ လောက် လိုအပ်နေတာပါ။

အီးယူက ရည်မှန်းထားတဲ့အတိုင်း အီးယူရဲ့ အသားတင် ဖန်လုံအိမ်ဓာတ်ငွေ့ထုတ်လွှတ်မှု ၅၅ ရာခိုင်နှုန်းကို ၂၀၃၀ မှာ လျှော့ချဖို့ အဓိကအချက်က CO2 ပါမစ်တွေ ဖြစ်ပါတယ်။

အီးယူနိုင်ငံတွေနဲ့ ဥရောပပါလီမန်တို့က ညှိနှိုင်းဆွေးနွေးသူတွေ သဘောတူထားတဲ့ သဘောတူညီချက်အရ အီးယူဟာ ကာဗွန်စျေးကွက်ကို ၂၀၀၅ ခုနှစ်ကနေ ၂၀၃၀ ခုနှစ်ထိ ၆၂ ရာခိုင်နှုန်းအထိ လျှော့ချဖို့ ပြုပြင်ပြောင်းလဲရေးလုပ်မှာ ဖြစ်ပါတယ်။

ဒီအစီအစဉ်ထဲမှာ ၂၀၂၄ ခုနှစ်မှာ စနစ်ကနေ CO2 ပါမစ် သန်း ၉၀၊ ၂၀၂၆ ခုနှစ်မှာ ၂၇ သန်းကို ဖယ်ရှားပြီး စနစ်အတွင်း CO2 ပါမစ် ပမာဏကို ၂၀၂၄-၂၀၂၇ ဘဏ္ဍာရေးနှစ်မှာ ၄ ဒသမ ၃ ရာခိုင်နှုန်းနဲ့ ၂၀၂၈-၂၀၃၀ ဘဏ္ဍာရေးနှစ်မှာ ၄ ဒသမ ၄ ရာခိုင်နှုန်းဆီ လျှော့ချဖို့ ပါပါတယ်။

၂၀၂၆-၂၀၃၄ ဘဏ္ဍာရေးနှစ်ကစပြီး အီးယူဟာ နိုင်ငံခြားပြိုင်ဆိုင်မှုကနေ ကာကွယ်ဖို့ စက်မှုလုပ်ငန်းတွေကို လက်ရှိပေးနေတဲ့ အခမဲ့ CO2 ပါမစ်ကို ဖျက်သိမ်းမှာပါ။

အီးယူဟာ ကာဗွန်နယ်နိမိတ် အကောက်ခွန်စည်းကြပ်မှုမှာ ပြည်တွင်းကုမ္ပဏီတွေကို ပြည်ပက ပြိုင်ဘက်တွေရဲ့ ယှဉ်ပြိုင်မှုကနေ ကာကွယ်ဖို့ ရည်ရွယ်ပြီး ပါမစ်တွေကို လျှော့ချလိုက်တာလည်း ဖြစ်ပါတယ်။

သောကြာနေ့ကစတဲ့ နာရီ ၃၀ ကြာ ဆွေးနွေးပွဲအပြီး အီးယူဟာ ၂၀၂၇ ခုနှစ်မှာ ကားတွေ၊ အဆောက်အဦတွေမှာသုံးတဲ့ CO2 ထုတ်လွှတ်တဲ့ လောင်စာတွေကို ပေးသွင်းသူတွေအတွက် ကာဗွန်စျေးကွက်အသစ်ကို စဖို့ သဘောတူခဲ့ပါတယ်။

အစီအစဉ်မှာ အိမ်ထောင်စုတွေ အပါအဝင် အီးယူ ဥပဒေပြုအမတ်တွေက ကန့်ကွက်ပြီးတဲ့နောက် စေ့စပ်ညှိနှိုင်းသူတွေက နိုင်ငံသားတွေကို CO2 စျေးနှုန်းကြီးမြင့်ခြင်းကနေ ကာကွယ်ဖို့ အစီအမံအများအပြားကို သဘောတူခဲ့ကြပါတယ်။

လောင်စာဆီဈေးဟာ ၂၀၂၇ မှာ ဒီနေ့လိုပဲ မြင့်နေခဲ့ရင် ကာဗွန်စျေးကွက်မိတ်ဆက်မှုက ၂၀၂၈ အထိ နှောင့်နှေးနေမှာ ဖြစ်ပါတယ်။

CO2 စျေးနှုန်းကလည်း ၄၅ ယူရို (ဒေါ်လာ ၄၇ ဒသမ ၆၂) ကို ရောက်လာရင် စျေးနှုန်းထိန်းညှိဖို့ CO2 ပါမစ်တွေကို စျေးကွက်ထဲ ထပ်ထုတ်ပေးမှာ ဖြစ်ပါတယ်။ ယာယီသဘောတူညီချက်ကို ဥရောပပါလီမန်နဲ့ ဥရောပကောင်စီတို့က တရားဝင်အတည်ပြုဖို့ လိုအပ်နေပါတယ်။