ပြည်သူလူထုကို မတရားဖိနှိပ်အုပ်ချုပ်သတ်ဖြတ်တဲ့ စစ်အာဏာရှင်လက်အောက်က ရုန်းထွက်ပြီး ပြည်သူ့ရင်ခွင် ခိုလှုံလာတဲ့ CDM ဗိုလ်ကြီး အောင်ဆန်းဖုန်ဟာ ဩဂုတ် ၁၆ ရက်က အပြင်းဖျားပြီး ရုတ်တရက် ကွယ်လွန်သွားတယ်လို့ မိသားစုနဲ့နီးစပ်သူတယောက်က ပြောပါတယ်။
“ဗိုလ်ကြီးအောင်ဆန်းဖုန်က တပ်မဟာ-၈ ပြည်သူ့ရင်ခွင်စခန်းမှာ နေထိုင်သူဖြစ်ပါတယ်။ ပြည်သူ့စစ်သားပေါ့။ မနေ့က ရုတ်တရက်အဖျားကြီးပြီး ဆုံးသွားတယ်။ အဲ့မှာလည်း CDM ဆရာဝန်ကြီးတွေက သေချာဆေးကုပေးခဲ့ပေမဲ့ ဆုံးသွားတယ်။ သမိုင်းမှတ်တိုင်မှာ ဖော်ပြခြင်းခံရသူဖြစ်တယ်။”
လက်ရှိ ရှေ့တန်းရောက်နေသူ CDM စစ်ဗိုလ်တယောက်က “သူနဲ့ကျနော်က အပတ်စဉ် အတူတူ စစ်သင်တန်းယူခဲ့ကြတယ်။ ရဝမ်လူမျိုး ၂ ယောက် မုန့် ၁ လုံးကို ခွဲစားခဲ့ကြတယ်။ ကျနော်က အရင် CDM ဝင်ခဲ့ပြီးနောက် သူလည်း ပြည်သူ့ဘက်ရပ်တည်လာလို့ အရမ်းဝမ်းသာခဲ့တာပါ။ သူ့သတင်းကြားရတာ စိတ်မကောင်း ဝမ်းနည်းမိတယ်” လို့ ပြောပါတယ်။
ကိုယ်ကျိုးစွန့်ပြီး ပြည်သူ့ဘက်ရပ်တည်ခဲ့သူ ကြည်း/၇၀၄၃၈ ဗိုလ်ကြီး အောင်ဆန်းဖုန်ဟာ စစ်ကောင်စီ အာဏာသိမ်းပြီးကတည်းက CDM ဝင်ခဲ့သူဖြစ်ပြီး စခန်းတနေရာမှာ အပြင်းဖျားကာ သေဆုံးခဲ့တာလို့ သိရပါတယ်။
တနင်္သာရီတိုင်း၊ ထားဝယ်ခရိုင်၊ ရေဖြူမြို့နယ်မှာ ဝဇွမ်းတောရွာကနေ စစ်ရှောင်လာတဲ့ အသက် ၁၁ နှစ်အရွယ် ကလေးတယောက် အပြင်းအထန် နေမကောင်းဖြစ်ပြီး သြဂုတ် ၄ ရက် မွန်းလွဲ ၂ နာရီမှာ ကွယ်လွန်သွားခဲ့တယ်လို့ မိသားစုဝင်တဦးက ပြောပါတယ်။
“ကလေးက နဂိုကတည်းက နှလုံးနဲ့ အဆုတ် အားနည်းသူပါ။ အခုလို မိုးထဲရေထဲ စစ်ရှောင်နေရတော့ အအေးမိလို့ အပြင်းဖျားပြီး အခုလို ဆုံးပါးသွားရတာပါ။ ဆေးဝါးမရတာရော နေရာထိုင်ခင်းရော ဘာတခုမှ အဆင်ပြေမနေပါဘူး။”
ကလေးငယ်ရဲ့ ဈာပနကိုတော့ မိသားစုဝင်တွေကပဲ သြဂုတ် ၄ ရက် ညနေ ၄ နာရီမှာ ပြုလုပ်ပေးခဲ့တယ်လို့ သိရပါတယ်။
ရေဖြူမြို့နယ်မှာ ဇူလိုင် ၃၀ ရက်က စစ်တပ်စစ်ကြောင်း ဝင်ရောက်လာပြီးနောက် ဧကနိ၊ ဝက်ချောင်း၊ ခမောင်းချောင်း၊ ရငဲနဲ့ ဝဇွမ်းတောရွာတွေက ပြည်သူ ၁,၀၀၀ ကျော်ဟာ သူတို့ရဲ့ရွာတွေကို စွန့်ခွာပြီး ဘေးကင်းတဲ့ နီးစပ်ရာကျေးရွာတွေက ဘုန်းကြီးကျောင်းတွေနဲ့ ဥယျာဉ်ခြံတွေအတွင်းမှာ စစ်ဘေးရှောင်နေရပါတယ်။
စစ်ရှောင်တွေကို ကူညီပေးနေသူတဦးက“နီးစပ်ရာ ဘုန်းကြီးကျောင်းတွေမှာ ခိုလှုံနေတဲ့သူတွေက နေရာအတွက် နည်းနည်း အဆင်ပြေတယ်။ ဥယျာဉ်ခြံထဲ ရှောင်နေရတဲ့သူတွေက ခုရက်ပိုင်း မိုးတအားရွာနေတော့ နေရာအတွက် အဆင်မပြေဘူး” လို့ ပြောပြပါတယ်။
ရေဖြူမြို့နယ် ပြည်သူ့အုပ်ချုပ်ရေးအဖွဲ့ကတော့ စစ်ဘေးရှောင်ပြည်သူတွေအတွက် အစားအသောက်၊ ဆေးဝါးစတဲ့ လူသားချင်းစာနာထောက်ထားမှု အကူအညီတွေ ရရှိအောင် စီစဉ်ဆောင်ရွက်ပေးနေပြောပါတယ်။
ဇူလိုင် ၃၀ ရက်ကစပြီး စစ်ကြောင်းထိုးလာတဲ့ စစ်ကောင်စီတပ်တွေဟာ ရေဖြူအရှေ့ဘက်ကမ်းဒေသကနေ ဒီနေ့အထိ ပြန်လည်မထွက်ခွာသေးဘဲ တပ်စွဲပြီး နယ်မြေရှင်းလင်းရေး လုပ်နေပါတယ်။
