မြန်မာစစ်တပ်က အပြစ်မဲ့ပြည်သူတွေကို သတ်ဖြတ်နေတာဟာ ကမ္ဘာကြီးရဲ့ မျက်ကွယ်ပြုမှု ကြောင့်နဲ့ စစ်တပ်ကို လက်နက်ထောက့်ပံ့နေသူတွေကြောင့်ဖြစ်ပြီး ကမ္ဘာ့ခေါင်းဆောင်တွေအနေနဲ့ ကလေးတွေ ဘယ်လောက်များများ သေကျေမှ ဒီလို အစုလိုက်အပြုံလိုက်သတ်ဖြတ်မှုတွေ ရပ်တန့်ဖို့ လုပ်ဆောင်နိုင်မလဲလို့ ကုလသမဂ္ဂရဲ့ မြန်မာ့လူ့အခွင့်အရေးဆိုင်ရာ အထူးကိုယ်စားလှယ် တွမ်အန်ဒရူးစ်ဟာ မေးခွန်းထုတ်လိုက်ပါတယ်။
စစ်ကိုင်းတိုင်း၊ ကန့်ဘလူမြို့နယ်၊ မလည်တိုက်နယ်၊ ပဇီကြီးကျေးရွာမှာ ဧပြီ ၁၁ ရက်မနက်က စစ်ကောင်စီတပ်ရဲ့ လေကြောင်းကနေ အကြမ်းဖက်တိုက်ခိုက်မှုကြောင့် လူပေါင်း ရာချီ သေဆုံးခဲ့ရတာနဲ့ ပတ်သက်လို့ ကုလသမဂ္ဂ လူ့အခွင့်အရေးအထူးကိုစားလှယ်က သူ့ရဲ့ ထွစ်တာလူမှုကွန်ရက်မှာ ရေးသားထားတာဖြစ်ပါတယ်။
“မြန်မာနိုင်ငံမှာ ဒီကနေ့ စစ်ကိုင်းကို လေကြောင်းတိုက်ခိုက်မှုအပါအဝင် အပြစ်မဲ့ပြည်သူတွေကို မြန်မာစစ်တပ်က တိုက်ခိုက်တာတွေက ကမ္ဘာကြီးရဲ့မျက်ကွယ်ပြုမှုကြောင့်၊ စစ်တပ်ကို လက်နက်ထောက့်ပံ့နေသူတွေကြောင့် ဖြစ်တာပါ။ ကမ္ဘာ့ခေါင်းဆောင်တွေအနေနဲ့ ကလေးတွေ ဘယ်လောက်များများ သေကျေမှ ဒီလိုသတ်ဖြတ်မှုတွေ ရပ်တန့်ဖို့ ခိုင်မာအားကောင်းတဲ့ အရေးယူတုံ့ပြန်မှုတွေ ပူးပေါင်းလုပ်ဆောင်ကြတော့မှာလဲ”လို့ တွမ်အန်ဒရူးစ် ကပြောပါတယ်။
ပဇီကြီးကျေးရွာကို စစ်ကောင်စီရဲ့ လေကြောင်းတိုက်ခိုက်မှုနဲ့ ပတ်သက်လို့ ကုလသမဂ္ဂအတွင်းရေးမှူးချုပ် အန်တိုနီယို ဂူတာရပ်စ်ကလည်း အပြင်းအထန် ကန့်ကွက်ရှုတ်ချထားပြီး ဒီလုပ်ရပ်ကို ကျူးလွန်သူတွေအနေနဲ့ တာဝန်ခံဖို့နဲ့ အကြမ်းဖက်မှုတွေရပ်တန့်ဖို့ မြန်မာစစ်တပ်ကို တောင်းဆိုထားပါတယ်။
ပဇီကြီးကျေးရွာမှာ ဧပြီလ ၁၁ ရက်မနက်က ရွာသူရွာသားတွေ စုရုံးနေတဲ့အချိန် စစ်ကောင်စီတပ်က တိုက်လေယာဉ်တွေနဲ့ရော စစ်ရဟတ်ယာဉ်တွေပါ ဗုံးကြဲပစ်ခတ်တိုက်ခိုက်ခဲ့လို့ အမျိုးသမီးနဲ့ ကလေးငယ်တွေအပါအဝင် လူ ၁၀၀ ကျော်သေဆုံးပြီး အများအပြား ဒဏ်ရာရရှိခဲ့တာဖြစ်ပါတယ်။
မနေ့ညနေပိုင်းမှာလည်း ပဇီကြီးကျေးရွာမှာ ကယ်ဆယ်ရေးအဖွဲ့တွေက သေဆုံးသူတွေရဲ့ ရုပ်အလောင်းတွေကို လိုက်လံကောက်ယူ မီးသင်္ဂြိုဟ်ဖို့ ပြင်ဆင်နေချိန် စစ်ကောင်စီလေတပ်က နောက်တကြိမ် လာရောက် ဗုံးကြဲတိုက်ခိုက်ခဲ့ပါတယ်။
လတ်တလော မြန်မာနိုင်ငံအနှံ့ ဖြစ်ပွားနေတဲ့ တိုက်ပွဲတွေအတွင်း အပြစ်မဲ့ပြည်သူတွေအပေါ် ကရင်အမျိုးသားအစည်းအရုံး (ကေအန်ယူ) အနေနဲ့ တတ်နိုင်တဲ့ဘက်က အကူအညီပေးအပ်သွား မယ်လို့ ထုတ်ပြန်ကြေညာပါတယ်။
အကြမ်းဖက် စစ်အုပ်စုက မတရားအာဏာသိမ်းယူပြီးနောက် မြန်မာနိုင်ငံအတွင်း အနယ်နယ်အရပ်ရပ်မှာ အကြမ်းဖက်မှုတွေ မြင့်တက်လာတာတွေ၊ စစ်ကောင်စီက အင် အားအလွန်အကျွံအသုံးပြုတာတွေ၊ နယ်ဘက်မှာသာမက ပြည်မက မြို့တချို့မှာ တိုက်ပွဲ ပုံဖော်မှုတွေ ဖြစ်တာလာကြောင့် အပြစ်မဲ့ပြည်သူတွေ ထိခိုက်ဆုံးရှုံးမှု ဖြစ်ပွားတဲ့အပေါ် လွန်စွာစိုးရိမ်မိကြောင်းလည်း ကြေညာချက်ထဲ ဖော်ပြထားတာကို တွေ့ရပါတယ်။
ပြီးခဲ့တဲ့ ဖေဖော်ဝါရီ ၁ ရက်နေ့ကတည်းက စစ်အုပ်စုက မတရား အာဏာသိမ်းယူခဲ့တဲ့အပေါ် ပြည်သူတရပ်လုံးက ဆန့်ကျင်ဆန္ဒပြခဲ့ကြတဲ့ နွေဦးတော်လှန်ရေးကာလဟာ ၅ လနီးပါး ရှိလာခဲ့ပြီဖြစ်ကာ အကြမ်းဖက်စစ်ကောင်စီတပ်တွေနဲ့ နယ်မြေခံ ပြည်သူ့ကာ ကွယ်ရေးတပ်တွေကြား တိုက်ပွဲတွေဟာလည်း ခပ်စိပ်စိပ် ဖြစ်လာခဲ့တာပါ။
ခုရက်ပိုင်းမှာတော့ မြန်မာနိုင်ငံအလယ်ပိုင်း မန္တလေးမြို့လယ်မှာ ပြည်သူ့ကာကွယ် ရေးတပ်နဲ့ အကြမ်းဖက်စစ်ကောင်စီတပ်တွေကြား တိုက်ပွဲတွေကြောင့် ထိခိုက်သေဆုံးမှုတွေနဲ့ မြို့ပြတိုက်ပွဲအသွင်ဆောင်လာခဲ့တာပါ။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း(အေအေပီပီ)ရဲ့ စာရင်းတွေအရ မြန်မာနိုင်ငံမှာ အကြမ်းဖက်စစ် အုပ်စုရဲ့ ပစ်ခတ်သတ်ဖြတ်မှုကြောင့် အပြစ်မဲ့ ပြည်သူ ၈၇၇ ယောက် ကျဆုံးခဲ့ပြီး ပြည်သူ ၆၂၇၉ ယောက် ဖမ်းဆီးခံခဲ့ရတယ်လို့ ဖော်ပြထားပါတယ်။
