ဧရာဝတီတိုင်း၊ အမာမြို့မှာ အောက်တိုဘာ ၃၀ ရက်က ရခိုင်ပြည်နယ်က ထွက်ခွာလာတဲ့ စက်လှေမှောက်ပြီး ရိုဟင်ဂျာ အယောက် ၆၀ ကျော် ဖမ်းဆီးခံရသလို အယောက် ၂၀ ကျော် ပျောက်ဆုံးနေတယ်လို့ ရဲတပ်ဖွဲ့အသိုင်းအဝိုင်းက သိရပါတယ်။

ရဲတပ်ဖွဲ့စစ်ဆေးချက်အရ ရခိုင်ပြည်နယ်က ထွက်ခွာလာတဲ့ ရိုဟင်ဂျာ အယောက် ၈၀ ကျော် ပါလာတဲ့ စက်လှေဟာ ဂတုံးလေးကျေးရွာအနီးမှာ တိမ်းမှောက်ပြီး ရိုဟင်ဂျာ ၂၀ ကျော် ပျောက်ဆုံးခဲ့တာဖြစ်ပြီး အယောက် ၆၀ ကို ဖမ်းမိခဲ့တာလို့ ရဲတပ်ဖွဲ့နဲ့ နီးစပ်သူတွေက ပြောပါတယ်။

ရဲတပ်ဖွဲ့နဲ့ နီးစပ်သူတယောက်က “ဘာစက်လှေမှန်းလဲ မသိဘူး။ တွေ့နေကျစံမျိုး မဟုတ်တော့ ဒေသခံတွေက ဆက်သွယ်လာတာ၊ အဲ့တော့မှ သွားပြီးစစ်ရတာ၊ အဲ့မှာ ကျန်တဲ့ ၆၀ ကိုတွေ့ရတာ။ သူတို့ပြောသလိုဆို ၂၀ ကျော်လောက် ပျောက်နေတယ်” လို့ ပြောပါတယ်။

စက်လှေသောင်တင်ပြီး ဖမ်းဆီးခံရတဲ့ ရိုဟင်ဂျာ အယောက် ၆၀ ထဲမှာ အမျိုးသား ၅၄ ယောက်နဲ့ အမျိုးသမီး ၆ ယောက် ပါဝင်ပြီး ပျောက်ဆုံးနေတဲ့ ၂၀ ကျော်ကိုတော့ သူတို့ကိုယ်တိုင် အတိအကျ မသိသေးတာလို့ ဆိုပါတယ်။

စက်လှေတိမ်းမှောက် သောင်တင်ပြီး ဖမ်းဆီးခံရတဲ့ ရိုဟင်ဂျာ ၆၀ ကို ကဒုံကနိရဲစခန်းမှာ ၁ ရက်ထားကာ အောက်တိုဘာ ၁ ရက်နေ့မှာ ဘိုကလေးမြို့မရဲစခန်းကို ပို့ဆောင်ခဲ့တယ်လို့ သိရပါတယ်။

စစ်အာဏာသိမ်းပြီးနောက်ပိုင်း ဧရာဝတီတိုင်းမှာ ဖမ်းမိတဲ့ ရိုဟင်ဂျာတွေကို စစ်ကောင်စီလက်အောက်ခံ တရားရုံးကနေ လဝက ဥပဒေနဲ့ တရားစွဲပြီး ထောင်ဒဏ်ချမှတ်လေ့ရှိတယ်လို့ သိရပါတယ်။

ဧရာဝတီတိုင်း၊ ဖျာပုံမြို့နယ်၊ အမာမြို့မှာ စစ်ကောင်စီလက်အောက်ခံဝန်ထမ်းတွေက ကင်းစောင့်ဖို့အတွက် တအိမ် ၆၀၀၀ ကောက်ခံတာတွေ ပြုလုပ်နေတယ်လို့ ဒေသခံတွေက ပြောပါတယ်။ 

ကျေးရွာအုပ်ချုပ်ရေးမှူး ဦးဆောင်တဲ့ ကျေးရွာအုပ်ချုပ်ရေးအဖွဲ့နဲ့ တာဝန်ခံတွေက ဇူလိုင် ၁၉ ရက်နေ့ကစပြီး ဒေသခံပြည်သူတွေကို ကင်းကြေးလိုက်လံကောက်ခံနေတာလို့ ဒေသခံတွေက ပြောပါတယ်။ 

“ခုက ကျေးရွာအုပ်ချုပ်ရေးအဖွဲ့က ရှိတဲ့အုပ်အပြင် ကျေးရွာတာဝန်ခံဆိုပြီး ထပ်လုပ်လာတာ၊ ပျူစောထီးတို့ ပြည်သူ့စစ်တို့ အကုန်ပါတယ်။ သူတို့က ကျေးရွာကာကွယ်ရမယ်ဆိုပြီး ကင်းစောင့်ခိုင်းတာ၊ တနေ့ ၃ အိမ်စောင့်ရတယ်၊ စောင့်ဖို့ဆိုပြီး တအိမ် ခြောက်ထောင်တောင်းတာ” လို့ ဒေသခံတဦးက ပြောပါတယ်။ 

ကင်းစောင့်ဖို့ဆိုပြီး ခွဲတမ်းအလိုက် တနေ့ကို ၃ အိမ်သတ်မှတ်ထားပြီး ကင်းကြေး ၆၀၀၀ ကတော့ ကင်းဝင်စောင့်လည်း ပေးရတယ်လို့ ဆိုပါတယ်။ 

ကျေးရွာတွေမှာ ကင်းစောင့်ဖို့အတွက် စစ်ကောင်စီလက်အောက်ခံ မြို့နယ်ထွေအုပ်ရုံးကနေ ညွှန်ကြားထားတာဖြစ်ပြီး အလားတူဖြစ်စဉ်မျိုး မော်ကျွန်းမြို့နယ်မှာလည်း ဖြစ်ပေါ်နေတယ်လို့ သိရပါတယ်။