တနင်္သာရီတိုင်း၊ မြိတ်မြို့နယ်မှာ လူ ၅ ဦးထက်ပိုပြီး လူမစုရဘူးလို့ စစ်ကောင်စီ လက်အောက်ခံ မြို့နယ်အထွေထွေအုပ်ချုပ်ရေးဦးစီးဌာနက အမိန့်ထုတ်ပြန်ထားပေမဲ့ ဘားတွေ၊ ကလပ်တွေမှာ ညစဉ် လူစည်းကားနေတယ်လို့ မြို့ခံတွေထံက သိရပါတယ်။
အဲဒီအမိန့်ကို မတ် ၁၄ ရက်က ထုတ်ပြန်ထားတာဖြစ်ပြီး မြိတ်မြို့နယ်ထဲက လူသွားလူလာလမ်း တွေ၊ လမ်းသွယ်၊ လမ်းကြား၊ ဥယျာဥ်နဲ့ အများပြည်သူသက်ဆိုင်တဲ့လမ်းတွေမှာ လူ ၅ ဦးထက် ပိုစုဝေးပြီး မနေကြဖို့နဲ့ ည ၁၂ နာရီကနေ မနက် ၄ နာရီအတွင်း မထွက်ဖို့ကိုလည်း အမိန်ထုတ်ပြန်ထားတယ်လို့ သိရပါတယ်။
ဒေသခံ တဦးက "သူတို့ ထုတ်ပြန်ထားတယ်ဆိုတာ မြိတ်မြို့ထဲကလူတွေ တော်တော်များများ သိတောင် မသိကြဘူး။ ခုထိလည်း အားလုံးလမ်းပေါ်တို့ ဘားတွေ၊ ကလပ်တွေမှာ စုဝေး သွားလာနေကြတာတွေ ရှိနေတာပဲ"လို့ ပြောပါတယ်။
လူ ၅ ဦးထက် ပိုမစုရဆိုတဲ့ အမိန်ထုတ်ပြန်ထားပေမဲ့ မြိတ်က စစ်ကောင်စီနဲ့ ပတ်သက် ဆက်နွှယ်တဲ့ ဘားတွေ၊ ကလပ်တွေမှာတော့ လူငယ်တွေ စုဝေးပြီး ပျော်ပါးနေကြတုန်းပဲလို့ မြို့ခံတစ်ဦးက ပြောပါတယ်။
ဒ့ါအပြင် မြိတ်မြို့ရပ်ကွက်တွေမှာလည်း လုံခြုံရေးတင်းကျပ်ထားပြီး စစ်ကောင်စီလက်အောက်ခံ အဖွဲ့အစည်းတွေကနေ လူစုလူဝေးနဲ့ တအိမ်ဝင်တအိမ်ထွက် စစ်ဆေးနေတာတွေလည်း ရှိတယ်လို့ သိရပါတယ်။
စစ်ကိုင်းတိုင်း၊ နာဂကိုယ်ပိုင်အုပ်ချုပ်ခွင့်ရ လဟယ်မြို့မှာ ဝန်ထမ်းတွေ ရုံးတက်ရောက်ခြင်း ရှိ/မရှိ မှတ်တမ်းလုပ်ပြီး တင်ပြဖို့ ဌာနအသီးသီးက အကြီးအကဲတွေကို လဟယ်မြို့နယ်စီမံအုပ်ချုပ်ရေးအဖွဲ့က ဖေဖော်ဝါရီ ၈ ရက်နေ့က အမိန့်ထုတ်ပြန်ထားပါတယ်။
ဌာနဆိုင်ရာ အကြီးအကဲတွေအနေနဲ့ ဖေဖော်ဝါရီ ၈ ရက်နေ့ကစပြီး မိမိတို့ဌာနရှိ ဝန်ထမ်းတွေ ရုံးတက်ချိန်အတွင်း ရုံးတက်ရောက်မှု ရှိ/မရှိ၊ ပျက်ကွက်ပါက ခွင့်တိုင်ကြားမှုရှိမရှိ မှတ်တမ်းတင်ပြီး နေ့စဉ် မနက် ၁၀ နာရီမှာ တင်ပြဖို့ လဟယ်မြို့နယ်စီမံအုပ်ချုပ်ရေးအဖွဲ့ ဥက္ကဋ္ဌ ဦးညီညီလက်မှတ်နဲ့ ညွှန်ကြားထားပါတယ်။
လဟယ်မြို့မှာ စိုက်ပျိုးရေးနှင့်မွေးမြူရေး ဝန်ကြီးဌာနအောက်ရှိ ကျေးလက်ဒေသဖွံ့ဖြိုးရေး ဝန်ထမ်းအယောက် ၃၀ လောက်က ဖေဖော်ဝါရီ ၈ ရက်နေ့ကစပြီး CDM လှုပ်ရှားမှုမှာ ပူးပေါင်းပါဝင်ခဲ့ကြတယ်လို့ သိရပါတယ်။
နိုင်ငံတဝန်းမှာလည်း အာဏာသိမ်းစစ်အစိုးရ အလိုမကြောင်း ဆန္ဒပြပွဲတွေ ကျင်းပနေသလို ကျန်းမာရေးဝန်ထမ်းတွေ၊ ဆရာ/ဆရာမတွေအပါအဝင် ပြည်သူ့ဝန်ထမ်းတွေလည်း CDM လှုပ်ရှားမှုမှာ ပူးပေါင်းပါဝင်ပြီး ဆန္ဒပြနေကြပါတယ်။
