အသက် ၈၀ အရွယ် ဘောလိဝုဒ် စူပါစတား အမီတာဘဂျမ်းက သိပ္ပံစိတ်ကူးယဉ်ရုပ်ရှင် Project K ကို ဟိုက်ဒရာဘတ်မှာ ရိုက်ကူးနေချိန် နံရိုးဒဏ်ရာရရှိခဲ့ပြီး ကြွက်သားတွေ စုတ်ပြဲခဲ့တယ်လို့ မတ်လ ၅ ရက် ညက သူ့ရဲ့ဘလော့ဂ်မှာ ရေးသားဖော်ပြပါတယ်။

အနားယူဖို့ ဆရာဝန်က အကြံပေးတဲ့အတွက် “ဒီညနေမှာ ဂျယ်လ်ဆာဂိတ်မှာ ကောင်းကောင်း ဆုတောင်းပေးလို့ မရတော့ဘူး။ ဒါကြောင့် မလာပါနဲ့” လို့ မွမ်ဘိုင်းမှာရှိတဲ့ သူ့ရဲ့အိမ်အပြင်မှာ စုဝေးလေ့ရှိတဲ့ ပရိသတ်တွေကို မင်းသားကပြောခဲ့ပြီး “တခြား အားလုံးအဆင်ပြေပါတယ်” လို့ ရေးသားထားပါတယ်။

မင်းသားကြီး ရိုက်ကူးနေတဲ့ ရုပ်ရှင်ကားကို ၂၀၂၄ ခုနှစ်မှာ ထွက်ဖို့ စီစဉ်ထားပေမဲ့ ဒဏ်ရာသက်သာတဲ့အထိ ရုပ်ရှင်ရိုက်ကူးဖို့ ရပ်နားထားတယ်လို့ ဆိုပါတယ်။

ဒီလို ထိခိုက်ဒဏ်ရာရရှိတာဟာ ပထမဆုံးအကြိမ်မဟုတ်ဘဲ ၁၉၈၃ ခုနှစ်က တိုက်ခိုက်ခန်း တခုမှာလည်း ထိခိုက်ဒဏ်ရာရရှိခဲ့ပြီး သေလုနီးပါး ခံစားခဲ့ရတာကြောင့် အိန္ဒိယ ပရိသတ်တွေက ရက်ပေါင်းများစွာ ကြာအောင် ဆုတောင်းပွဲတွေ ကျင်းပပေးခဲ့ပါတယ်။

မင်းသားကြီး အမီတာဘဂျမ်းက အိန္ဒိယရုပ်ရှင် ၂၀၀ ကျော်မှာ သရုပ်ဆောင်ခဲ့ပြီး ပရိသတ်တွေက သူ့ရဲ့ဆံပင်ပုံစံ၊ အဝတ်အစားနဲ့ အသံတွေကို အတုယူရတဲ့အထိ လွှမ်းမိုးမှု ရှိခဲ့တာဖြစ်ပြီး အိန္ဒိယနိုင်ငံမှာရော မြန်မာ အပါအဝင် ကမ္ဘာတဝန်းက ရုပ်ရှင်ကြည့် ပရိသတ်တွေ အကြားမှာပါ ရေပန်းစားတဲ့ မင်းသားကြီးလည်း ဖြစ်ပါတယ်။