နိုင်ငံတကာရဲ့ ပိတ်ဆို့ဒဏ်ခတ်တာတွေကြောင့် စီးပွားရေးခက်ခဲပြီး စစ်ရေး ဆုတ်ယုတ်လာနေပေမယ့် ရုရှားသမ္မတ ဗလာဒီမီယာ ပူတင်ဟာ ယူကရိန်းအပေါ် ပိုတိုးပြီး တိုက်ခိုက်လာနိုင်တယ်လို့ အမေရိကန် ထောက်လှမ်းရေး ခေါင်းဆောင်တွေက မတ်လ ၈ ရက်မှာ ပြောလိုက်ပါတယ်။
လာမယ့် သီတင်းပတ်မှာ ပိုဆိုးလာလိမ့်မယ်လို့လည်း အမေရိကန် အမျိုးသားထောက်လှမ်းရေးဌာန ညွှန်မှူး အဗ်ရီလ်အန်းက အောက်လွှတ်တော် ထောက်လှမ်းရေးကော်မတီ ကမ္ဘာလုံးဆိုင်ရာ ခြိမ်းခြောက်မှုများအရေး ကြားနာပွဲမှာ ပြောပါတယ်။
ရုရှားစစ်သည် ၂,၀၀၀ ကနေ ၄,၀၀၀ အထိ သေဆုံးပြီးပြီလို့လည်း အမေရိကန်က ခန့်မှန်းထားပါတယ်။
ရုရှားဟာ ဒဏ်ခတ်မှုတွေကို စတင်ခံစားနေရပေမယ့် အခြေအနေဟာ ယူကရိန်းပြည်သူတွေ အတွက် အများကြီး ပိုဆိုးတယ်၊ မြို့တော် ကိယက်ဗ်အတွက် အစားအစာနဲ့ ရေက ၂ ပတ်အတွင်း ကုန်သွားနိုင်တယ်လို့ သူတို့က ပြောပါတယ်။
ပူတင်က သူ့ရဲ့ နျူကလီးယားတပ်တွေ အသင့်ဖြစ်မှုကို မြှင့်တင်နေကြောင်း ကြေညာချက်က ၁၉၆၀ နောက်ပိုင်းမှာ အလွန်အမင်း မကြုံစဘူး ထူးခြားနေတယ်လို့လည်း သူက ပြောပါတယ်။
ဗဟိုထောက်လှမ်းရေး အေဂျင်စီ ညွှန်မှူး ဝီလျံဘန်းစ်ကလည်း အန်းရဲ့ အကဲဖြတ်ချက်အရ ရုရှားကို ကျောခိုင်းထားဖို့ မဖြစ်နိုင်ဘူးလို့ ပြောပါတယ်။
ပူတင်ဟာ ၂ ဆတိုးမယ့် အလားအလာရှိပြီး အရပ်သား အသေအပျောက်ကို အရေးမစိုက်ဘဲ ယူကရိန်းစစ်တပ်ကို အမှုန့်ချေဖို့ ကြိုးစားနေမယ့်ပုံ ပေါ်တယ်လို့ ဘန်းစ်က ပြောပါတယ်။
ပူတင်က ကိယက်ဗ်မြို့တော်ကို သိမ်းပြီး ယူကရိန်းသမ္မတ ဗိုလိုဒိုမြာ ဇလန်းစကီးရဲ့ အစိုးရကို ရုရှားလိုလားတဲ့ ရုပ်သေးအစိုးရနဲ့ အစားထိုးမယ့် သူ့ပန်းတိုင်ကို ဘယ်လိုရအောင်ယူမလဲ ဆိုတာ စီအိုင်အေ အကဲခတ်တွေ မမြင်နိုင်သေးဘူးလို့ ဘန်းစ်က ပြောပါတယ်။
လွှတ်တော်ကြားနာပွဲမှာ ဒီမိုကရက်နဲ့ ရီပတ်ဘလစ်ကန်ပါတီဝင် ကော်မတီဝင်တွေက ရုရှား ကျူးကျော်မှု မတိုင်ခင် အမေရိကန်ထောက်လှမ်းရေး အသိုင်းအဝိုင်းရဲ့ လုပ်ဆောင်ချက်တွေကို ချီးကျူးခဲ့ကြပါတယ်။
