တောင်ကိုရီးယား၊ အမေရိကန်နဲ့ ဂျပန်နိုင်ငံတို့ဟာ လုံခြုံရေး ပူးပေါင်းဆောင်ရွက်မှု မြှင့်တင်ဖို့နဲ့ မြောက်ကိုရီးယားရဲ့ ပြောင်းလဲလာတဲ့ ဒုံးကျည်ခြိမ်းခြောက်မှုတွေကို ပိုကောင်းကောင်း တုံ့ပြန်ဖို့ ဧပြီ ၁၇ ရက်မှာ ပူးတွဲ ရေတပ်၊ ဒုံးကျည် ကာကွယ်ရေး စစ်ရေးလေ့ကျင့်ခဲ့တယ်လို့ တောင်ကိုရီးယား ရေတပ်က ပြောပါတယ်။
သံတမန်ရေးနဲ့ စစ်ရေးပူးပေါင်းဆောင်ရွက်မှု မြှင့်တင်ဖို့ ကြိုးပမ်းရာမှာ သုံးနိုင်ငံဟာ ဒုံးကျည်ကာကွယ်ရေးနဲ့ ရေငုပ်သင်္ဘော တိုက်ဖျက်ရေး လေ့ကျင့်ခန်းတွေကို ပုံမှန်ကျင်းပဖို့ ဝါရှင်တန်မှာ ဧပြီ ၁၄ ရက်က ကျင်းပခဲ့တဲ့ ဆွေးနွေးပွဲမှာ သဘောတူခဲ့ပါတယ်။
တောင်ကိုရီးယားနဲ့ ဂျပန်ကြား နိုင်ငံတကာ ရေပိုင်နက်ထဲမှာ တနင်္လာနေ့က စစ်ရေးလေ့ကျင့်ရာမှာ တောင်ကိုရီးယားရဲ့ တန်ချိန် ၇,၆၀၀ အလေးချိန်ရှိတဲ့ ကာကွယ်ထောက်ပံ့ရေး ဖျက်သင်္ဘော ယူဂိုယိ-ဝမ်း၊ အမေရိကန်ပဲ့ထိန်းဒုံးကျည်သုံး ဖျက်သင်္ဘော USS ဘန်းဖို့လ်ဒ်နဲ့ အာတာဂို အဆင့်ဖျက်သင်္ဘော အီးဂျက်စ်၊ တိုက်ခိုက်ရေး ရေဒါစနစ်တွေ တပ်ဆင်ထားတဲ့ ဂျပန်ကာကွယ် ထောက်ပံ့ရေး ဖျက်သင်္ဘောတို့လည်း ပါခဲ့ပါတယ်။
မြောက်ကိုရီးယားရဲ့ ပဲ့ထိန်းဒုံးကျည်ကို ရန်စတဲ့ မြင်ကွင်းတစ်ခုမှာ အတုံ့အလှည့်အဖြစ် ပစ်မှတ်တစ်ခုကို ဖန်တီးရင်း ထောက်လှမ်းခြင်းနဲ့ ခြေရာခံခြင်းအထိ တုံ့ပြန်ခြင်း ဆိုင်ရာလုပ်ထုံးလုပ်နည်းတွေကို ကျွမ်းကျင်ပိုင်နိုင်မှု ရှိရှိ အာရုံစိုက်ထားတယ်လို့ တောင်ကိုရီးယား ရေတပ်က ပြောခဲ့ပါတယ်။
မြောက်ကိုရီးယားဟာ မကြာသေးမီ သီတင်းပတ်တွေအတွင်း သူ့ရဲ့ စစ်ရေးလှုပ်ရှားမှုတွေ တိုးလာတာရဲ့ တစ်စိတ်တစ်ပိုင်းအဖြစ် လောင်စာခဲသုံးထားတဲ့ တိုက်ချင်းပစ် ပဲ့ထိန်း ဒုံးကျည်အသစ် (ICBM) ကို စမ်းသပ်ခဲ့တယ်လို့ မြောက်ကိုရီးယားက သောကြာနေ့မှာ ကြေညာခဲ့ပါတယ်။
ဒီဒုံးကျည်ဟာ သတိပေး ချက်နည်းနည်းနဲ့ ပစ်လွှတ်ဖို့ လွယ်ကူစေလိမ့်မယ်လို့ ကျွမ်းကျင်သူတွေက ပြောပါတယ်။
မြန်မာနိုင်ငံမှာ အရပ်သားပြည်သူတွေအပေါ် စစ်တပ်နဲ့ ရဲတွေရဲ့ အကြမ်းဖက်မှုတွေ ချက်ချင်းရပ်တန့်ဖို့အတွက် အာဏာသိမ်းစစ်အုပ်စုကို ဆက်လက်ဖိအားပေးအရေးယူမယ်လို့ အမေရိကန်နဲ့ ဂျပန်ခေါင်းဆောင် ၂ ဦးက ကတိပြုလိုက်ပါတယ်။
ဂျပန်ဝန်ကြီးချုပ် ဆူဂါယိုရှီဟိဒဲနဲ့ အမေရိကန်သမ္မတ ဂျိုးဇက်အာဘိုင်ဒင်တို့ ဝါရှင်တန်ဒီစီမှာ တွေ့ဆုံပြီးနောက် ခေါင်းဆောင် နှစ်ဦးက အမေရိကန်-ဂျပန် မိတ်ဖက်လက်တွဲမှုဆိုင်ရာ ပူးတွဲကြေညာချက်ကို ဧပြီ ၁၆ ရက်က ထုတ်ပြန်ရာမှာ မြန်မာ့အရေးနဲ့ ပတ်သက်လို့လည်း ထည့်သွင်း ဖော်ပြထားတာပါ။
“မြန်မာစစ်တပ်နဲ့ရဲတွေရဲ့ အရပ်သားပြည်သူတွေအပေါ် အကြမ်းဖက်မှုကျူးလွန်တာတွေကို မိမိတို့ ပြင်းပြင်းထန်အထန် ကန့်ကွက်ရှုတ်ချပါတယ်။ အကြမ်းဖက်မှုတွေချက်ချင်းရပ်တန့်ရေး၊ ဖမ်းဆီးထားသူတွေအားလုံးကိုပြန်လွှတ်ပေးရေးနဲ့ ဒီမိုကရေစီအမြန်ဆုံးပြန်လည်အသက်သွင်းရေး ဆက်လက်ဖိအားပေးအရေးယူဖို့အတွက် မိမိတို့ကတိပြုပါတယ်”လို့ ပူးတွဲကြေညာချက်မှာ ဖော်ပြပါတယ်။
ဒါ့အပြင် မြောက်ကိုရီးယား နယူးကလီးယားအစီအစဉ် အပြည့်အဝဖျက်သိမ်းစေရေး လုပ်ဆောင်ဖို့ ကတိကဝတ်ကို နှစ်နိုင်ငံစလုံးက ထပ်လောင်း အတည်ပြုလိုက်ပြီး မြောက်ကိုရီးယား အနေနဲ့ ကုလသမဂ္ဂလုံခြုံရေးကောင်စီဆုံးဖြတ်ချက်နဲ့ နိုင်ငံတကာအသိုက်အဝန်းရဲ့ တောင်းဆိုချက်တွေကို လိုက်နာဖို့ တောင်းဆိုလိုက်ပါတယ်။
အင်ဒို-ပစိဖိတ်ဒေသမှာ လွတ်လပ်မှု၊ ပွင့်လင်းမှု၊ အသုံးပြုခွင့်၊ ကွဲပြားခြားနားခွင့်နဲ့ ရှင်သန်ခွင့်တို့အတွက် အမေရိကန်နဲ့ ဂျပန်တို့အနေနဲ့ Quad အဖွဲ့ကနေတဆင့် ဩစတြေးလျနဲ့ အိန္ဒိယအပါအဝင် မဟာမိတ်တွေ မိတ်ဆွေနိုင်ငံတွေနဲ့ ဆက်လက်ပြီး ဆောင်ရွက်သွားမယ်လို့ ဆိုပါတယ်။
ဒါ့အပြင် အင်ဒို-ပစိဖိတ်ဒေသမှာ အာဆီယံရဲ့ စည်းလုံးညီညွတ်မှုနဲ့ အဓိကကျတဲ့ အနေထားကို အားပေးထောက်ခံသလို အင်ဒို-ပစိဖိတ်ဒေသပေါ် အာဆီယံရဲ့ သဘောထားအမြင်ကို ထောက်ခံတယ်လို့လည်း နှစ်နိုင်ငံ ပူးတွဲကြေညာချက်မှာဖော်ပြထားပါတယ်။
Photo- Japan Gov
