ရုရှားနိုင်ငံခြားရေးဝန်ကြီး ဆာဂီလာ့ဗရော့ဗ်နဲ့ ဖုန်းခေါ်ဆိုဆွေးနွေးရာမှာ သူလျှိုလုပ်တယ်လို့  ရုရှားအစိုးရက စွပ်စွဲထားတဲ့ Wall Street Journal သတင်းထောက် အီဗန်ဂါ့ရှ်ကိုဗစ်ချ်ကို ဖမ်းထားရာက ပြန်လွှတ်ပေးဖို့ အမေရိကန်နိုင်ငံခြားရေးဝန်ကြီး အန်တိုနီ ဘလင်ကန်က ဧပြီ ၂ ရက်မှာ တိုက်တွန်းခဲ့ပါတယ်။

ရုရှား ပြည်ထောင်စုလုံခြုံရေးဌာန FSB က ဂါ့ရ်ှကိုဗစ်ချ်ကို နိုင်ငံတော်လျှို့ဝှက်ချက်ဖြစ်တဲ့ ရုရှကာကွယ်ရေး ကုမ္ပဏီတခုအကြောင်း သတင်းအချက်အလက်တွေ စုဆောင်းတယ်လို့ စွပ်စွဲပြီး မတ်လ ၃၀ ရက်က ဖမ်းခဲ့တယ်လို့ FSB က ကြာသပတေးနေ့မှာ ပြောခဲ့တာပါ။

Wall Street Journal ကတော့ ဂါ့ရှ်ကိုဗစ်ချ်ဟာ သူလျှိုမဟုတ်ဘူးလို့ ငြင်းဆိုထားပါတယ်။ ထောင်ဒဏ် အနှစ် ၂၀ အထိ ချမှတ်နိုင်တဲ့ သူလျှိုလုပ်တယ်ဆိုတဲ့ စွဲချက်ဟာ ရယ်စရာကောင်းတယ်လို့ အိမ်ဖြူတော်က ပြောပါတယ်။

ဒီအမှုမှာ အမေရိကန်အစိုးရက နိုင်ငံရေးကစားတာကို လက်မခံနိုင်ဘူး၊ ဂါ့ရှ်ကိုဗစ်ချ်ရဲ့ ကံကြမ္မာကို တရားရုံးက ဆုံးဖြတ်မယ်လို့ လာ့ဗရော့ဗ်က ဘလင်ကန်ကို ပြောခဲ့တယ်လို့ ရုရှားနိုင်ငံခြားရေး ဝန်ကြီးဌာနက ဆိုပါတယ်။

သတင်းထောက်ကို ပြီးခဲ့တဲ့သီတင်းပတ်က လက်ပူးလက်ကြပ် ဖမ်းမိတယ်လို့ အထောက်အထား တစုံတရာ မပေးဘဲ ရုရှားအစိုးရက အခိုင်အမာ ပြောဆိုခဲ့တာပါ။

ရုရှားက ၂၀၂၂ ခုနှစ်၊ ဖေဖော်ဝါရီ ၂၄ ရက်မှာ ယူကရိန်းကို ကျူးကျော်ဝင်ရောက်ပြီးနောက် ဘလင်ကန်နဲ့ လာ့ဗရော့ဗ်တို့ကြား တိုက်ရိုက်စကားပြောတာ ရှားပါးလာပါတယ်။

ယူကရိန်းကျူးကျော်စစ်အပြီး သူတို့ ၂ ဦးဟာ နယူးဒေလီမှာ မတ်လ ၂ ရက်က ပထမဆုံးအကြိမ် မျက်နှာချင်းဆိုင် စကားပြောဆိုခဲ့ကြပါတယ်။

ကြာသပတေးနေ့ တံခါးပိတ်ကြားနာရာမှာ ဂါ့ရှ်ကိုဗစ်ချ်ကို မော်စကိုမြို့တော်က လာ့ဖိုးတိုဗို အကျဉ်းထောင်မှာ မေလ ၂၉ ရက်အထိ တရားခွင်အကြိုချုပ်နှောင်ထားဖို့ ဆုံးဖြတ်ခဲ့ပါတယ်။

ဖမ်းဆီးမှုဟာ ရုရှားက အမေရိကန်နဲ့ အလျှော့အတင်းလုပ်ဖို့လို့ အနောက်တိုင်းနဲ့ ရုရှားလေ့လာသုံးသပ်သူတချို့က ပြောပါတယ်။

ပြစ်ဒဏ်ချမှတ်ခံရတဲ့ ရုရှားလက်နက်မှောင်ခိုကုန်သည် ဗစ်တာဘောက်ထ်အတွက် အမေရိကန် ဘတ်စကက်ဘောကြယ်ပွင့် ဘရစ်တ်နေ ဂရင်နာနဲ့ လဲလှယ်ပြီး လေးလအကြာမှာ ခုလို ဖမ်းဆီးမှု ဖြစ်ခဲ့တာပါ။

ဂါ့ရှ်ကိုဗစ်ချ် လွတ်မြောက်ဖို့ ဖြစ်နိုင်သမျှနည်းလမ်းအကုန်သုံးဖို့ အမေရိကန်အစိုးရကို ဂရင်နာက တိုက်တွန်းခဲ့ပါတယ်။

ဝါရှင်တန်အတွက် သူလျှိုလုပ်တယ်ဆိုတဲ့ သံသယနဲ့ အမေရိကန်သတင်းစာ The Wall Street Journal သတင်းထောက်တယောက်ကို မတ်လ ၃၀ ရက်က ဖမ်းဆီးလိုက်ကြောင်း ရုရှားနိုင်ငံရဲ့ ဖက်ဒရယ်လုံခြုံရေးဌာန FSB က ထုတ်ပြန်ပါတယ်။

သူလျှိုသံသယရှိသူ သတင်းထောက် ဂတ်ရှ်ကိုဗစ်ဟာ စစ်ဘက်စက်ရုံတရုံအကြောင်း နိုင်ငံတော်လျှို့ဝှက်ချက်အဖြစ် သတ်မှတ်ထားတဲ့ အချက်အလက်တွေကို စုဆောင်းနေတယ်လို့ စွပ်စွဲပြီးတော့ ရာဇဝတ်မှုနဲ့ အမှုဖွင့်ထားကြောင်း FSB ထုတ်ပြန်ချက်မှာ ဖော်ပြထားပါတယ်။

စက်ရုံရဲ့အမည်နဲ့ တည်နေရာကို မဖော်ပြထားဘဲ ရောလ်စ်တောင်တန်းဒေသရှိ ယေခါတာရင်ဘတ်ဂ်မြို့မှာ လျှို့ဝှက်သတင်းရယူဖို့ ကြိုးပမ်းနေတဲ့ အသက် ၃၁ နှစ်အရွယ် သတင်းထောက်ကို ဖမ်းဆီးထိန်းသိမ်းခဲ့ကြောင်း ပြောထားပြီး သူအပြစ်ရှိကြောင်း မှတ်တမ်း သို့မဟုတ် ဗီဒီယို သက်သေအထောက်အထားလည်း မပြပါဘူး။

The Wall Street Journal ကတော့ အမေရိကန်နိုင်ငံသား အီဗန်ဂတ်ရှ်ကိုဗစ်ကို ဖမ်းဆီးခြင်းဟာ မှားယွင်းတဲ့ စွပ်စွဲချက်တွေအပေါ် အခြေခံထားတာဖြစ်ကြောင်း ပြောကြားခဲ့ပါတယ်။ ဂတ်ရှ်ကိုဗစ်ရဲ့ လုံခြုံရေးအတွက် အလွန်စိုးရိမ်မိကြောင်းနဲ့ FSB မှ စွပ်စွဲချက်များကို ပြင်းပြင်းထန်ထန် ငြင်းဆိုထားပြီး ကျွန်ုပ်တို့ရဲ့ ယုံကြည်စိတ်ချရပြီး တာဝန်ပေးအပ်ထားတဲ့ သတင်းထောက်ကို ချက်ချင်းလွှတ်ပေးရန် တောင်းဆိုပါကြောင်း The Wall Street Journal က ထုတ်ပြန်ကြေညာထားပါတယ်။

ဒီဖြစ်ရပ်အပေါ် မော်စကိုမြို့ရှိ အမေရိကန်သံရုံးကတော့ ချက်ချင်း မှတ်ချက်ပေးဖို့ မရှိကြောင်း ပြောပါတယ်။

မော်စကိုမြို့ Lefortovo ခရိုင်တရားရုံးကတော့ သူလျှိုလုပ်မှုနဲ့ ဖမ်းဆီးခံထားရတဲ့ Wall Street Journal သတင်းထောက် ဂတ်ရှ်ကိုဗစ်ကို မေလ ၂၉ ရက်အထိ ရုံးတင်မစစ်ဆေးခင် အကြိုထိန်းသိမ်းထားဖို့ မတ်လ ၃၀ ရက်မှာ အမိန့်ပေးခဲ့ပါတယ်။

ဂတ်ရှ်ကိုဗစ်က သူ့မှာအပြစ်မရှိကြောင်း မနေ့ကရုံးချိန်းမှာ လျှောက်လဲခဲ့တယ်လို့ နိုင်ငံပိုင်သတင်းအေဂျင်စီ TASS က ဖော်ပြခဲ့ပါတယ်။ သူ့ရဲ့ရှေ့နေဟာလည်း တရားခွင်ကို ဝင်ခွင့်မရဘူးလို့ တရားခွင်အပြင်ဘက်ရှိ သတင်းထောက်တွေကို ပြောကြားခဲ့ပါတယ်။