မြောက်ကိုရီးယားရဲ့ ကြီးထွားလာတဲ့ နျူးကလီးယား ခြိမ်းခြောက်မှုနဲ့ ကမ္ဘာလုံးဆိုင်ရာ အကျပ်အတည်းတွေ အပါအဝင် လုံခြုံရေးအကျပ်အတည်းတွေကို ကျော်လွှားဖို့ အမေရိကန်၊ ဂျပန်တို့နဲ့အတူ ၃ နိုင်ငံ ပူးပေါင်းဆောင်ရွက်မှုဟာ အရင်ကထက် ပိုအရေးကြီးလာပြီ ဖြစ်ကြောင်း တောင်ကိုရီးယားသမ္မတ ယွန်းဆွတ်ခ်ယိုးက မတ် ၁ ရက်နေ့မှာ ပြောပါတယ်။
သမ္မတ ယွန်းဟာ ဂျပန်နိုင်ငံရဲ့ ၁၉၁၀-၁၉၄၅ ခုနှစ် ကိုရီးယားကို သိမ်းပိုက်မှုကို ဆန့်ကျင်တဲ့ သမိုင်းဝင် မတ်လ ၁ ရက် လွတ်လပ်ရေးလှုပ်ရှားမှု အထိမ်းအမှတ် အခမ်းအနားတခုမှာ မိန့်ခွန်းပြောခဲ့တာပါ။
တောင်ကိုရီးယား၊ အမေရိကန်နဲ့ ဂျပန်နိုင်ငံတို့က တာဝန်ရှိသူတွေဟာ ထောက်ပံ့ရေးကွင်းဆက် ခံနိုင်ရည်ကို အားကောင်းစေဖို့နဲ့ နည်းပညာဖွံ့ဖြိုးတိုးတက်ဖို့ ကြိုးပမ်းမှုတွေကြားမှာ သူတို့ရဲ့ ပထမဆုံးသော စီးပွားရေးလုံခြုံမှုဆိုင်ရာ ဆွေးနွေးပွဲကို ကျင်းပခဲ့ကြောင်း တောင်ကိုရီးယားသမ္မတရုံးက ဖေဖော်ဝါရီ ၂၈ ရက်မှာ ထုတ်ပြန်ခဲ့ပါတယ်။
အဲ့ဒီနောက် သမ္မတ ယွန်းက “ဂျပန်ဟာ အတိတ်က စစ်ဘက်ဆိုင်ရာ ရန်လိုသူအဖြစ်ကနေ ကျနော်တို့နဲ့အတူ တူညီတဲ့ စကြဝဠာတန်ဖိုးတွေကို မျှဝေတဲ့ မိတ်ဘက်အဖြစ် ပြောင်းလဲခဲ့ကြောင်းနဲ့ တောင်ကိုရီးယားနဲ့ ဂျပန်တို့ဟာ လုံခြုံရေးနဲ့ စီးပွားရေးဆိုင်ရာ ကိစ္စရပ်တွေမှာ ပူးပေါင်းဆောင်ရွက်နေပြီး ကမ္ဘာလုံးဆိုင်ရာ စိန်ခေါ်မှုတွေကို ရင်ဆိုင်ဖြေရှင်းဖို့လည်း အတူတကွ လုပ်ဆောင်နေကြောင်း” ပြောကြားခဲ့ပါတယ်။
ဂျပန်နဲ့ တောင်ကိုရီးယားတို့ဟာ တခါတလေမှာ အဆင်မပြေကြတဲ့ အိမ်နီးချင်းနိုင်ငံတွေ ဖြစ်ပေမဲ့ ကမ္ဘာလုံးဆိုင်ရာ တင်းမာမှုတွေ၊ ပိုပြီးခိုင်မာအားကောင်းတဲ့ တရုတ်နိုင်ငံနဲ့ မှန်းဆလို့မရနိုင်တဲ့ မြောက်ကိုရီးယားနိုင်ငံတို့ကို ရင်ဆိုင်ရချိန်မှာ ဒီ ၃ နိုင်ငံလုံးဟာ နယ်ပယ်အသီးသီးမှာ ပူးပေါင်းဆောင်ရွက်မှုကို တိုးချဲ့ဖို့ စိတ်အားထက်သန်နေကြပါတယ်။
