နယ်သာလန်နိုင်ငံမှာ ကိုဗစ်-၁၉ ကပ်ဘေးအလွန် King's Day လို့ခေါ်တဲ့ ဘုရင်မွေးနေ့ အထိမ်းအမှတ် နိုင်ငံတော်အားလပ်ရက်ကို ပျော်ပွဲရွှင်ပွဲတွေနဲ့ ကျင်းပနေပါတယ်။

၂၀၁၉ ခုနှစ်ကတည်းက ကိုဗစ်-၁၉ ရောဂါကြောင့် မဆင်နွှဲနိုင်ခဲ့ဘဲ ဒီနှစ်ကျမှ တေးဂီတွေ တီးမှုတ်၊ ရိုးရာဝတ်စုံတွေကို ဝတ်ဆင်ပြီး ပျော်ပျော်ရွှင်ရွှင် ကျင်းပနေကြတာပါ။

နယ်သာလန်ဘုရင် ဝီလျံ အလက်ဇန်းဒါးဟာ ဧပြီ ၂၇ ရက်မှာ အသက် ၅၅ နှစ် ပြည့်မြောက်ပြီး တောင်ပိုင်းမြို့ဖြစ်တဲ့ မာစတက်ချ်မြို့ကို မိသားစုနဲ့အတူ အလည်အပတ် ရောက်နေပါတယ်။ ကပ်ဘေးပြီးရင် မာစတက်ချ်မြို့ကို အလည်သွားမယ်လို့ ကတိပေးထားတဲ့အတိုင်း အခုလို သွားရောက်တာပါ။

အမ်စတာဒမ်မြို့မှာတော့ ဘုရင့်မွေးနေ့ အားလပ်ရပ်ဟာ နယူးရီးယားပွဲတော်၊ မြန်မာပြည်က သင်္ကြန်ပွဲတော်နဲ့ အလားသဏ္ဌာန် တူပါတယ်။

မြို့လယ်ခေါင်မှာ လူထောင်ပေါင်းများစွာဟာ ဧပြီ ၂၆ ရက် နှောင်းပိုင်းကတည်းက စုရုံးပြီး ပျော်ပျော်ရွှင်ရွှင် ပါဝင်ဆင်နွှဲနေကြပါတယ်။ မြို့ကြီး မြို့ငယ်တွေမှာ ဖရီးမားကက်လို့ ခေါ်တဲ့ ဈေးဆိုင်တွေ ဖွင့်ထားပြီး ပြည်သူတွေဟာ သူတို့အတွက် မလိုအပ်တော့တဲ့ ပစ္စည်းတွေကို အလကားနီးပါး ဈေးနှုန်းနဲ့ လိုအပ်တဲ့သူတွေ ဝယ်ယူနိုင်အောင် ရောင်းချနေကြပါတယ်။

နယ်သာလန်နိုင်ငံ၊ အမ်စတာဒမ်မြို့တော်ရဲ့ မြို့လယ်တောင်ပိုင်းက ရင်ပြင်နားမှာရှိတဲ့ Apple ကုန်အမှတ်တံဆိပ် အီလက်ထရောနစ်ပစ္စည်းတွေရောင်းတဲ့ဆိုင်မှာ သေနတ်သမားတယောက်က လူတွေကို ပြန်ပေးဆွဲထားရာက ဖေဖော်ဝါရီ ၂၂ ရက်မှာ လူအတော်များများ ပြန်ထွက်လာနိုင်ခဲ့တယ်လို့ နယ်သာလန်ရဲတွေက ပြောပါတယ်။

အခင်းဖြစ်ရာနေရာကို ရဲတွေက အရံအတားတွေနဲ့ ကာထားပြီး ရင်ပြင်ကိုလည်း ရှင်းလင်းထားပါတယ်။ အိမ်နီးချင်းတွေကိုလည်း အခန်းထဲမှာပဲ နေကြဖို့နဲ့ ကြည့်ဖို့ အပြင်ကို ထွက်မလာဖို့ သတိပေး ထားပါတယ်။

စတိုးဆိုင်အထဲနဲ့ အပြင်ပတ်လည်က အခြေအနေကို လောလောဆယ် အကျယ်တဝင့် ရှင်းမပြချင်သေးဘူးလို့ အမ်စတာဒမ်ရဲတပ်ဖွဲ့က တွစ်တာလူမှုကွန်ရက်ပေါ်မှာ ပြောပါတယ်။

စတိုးဆိုင်ထဲမှာ သေနတ်နဲ့တူတဲ့အရာကို ကိုင်ထားပြီး အနက်ရောင် ခေါင်းစွပ်စွပ်ထားတဲ့ ယောက်ျားတယောက်က နောက်ယောက်ျားတယောက်ကို ဓားစာခံ ဖမ်းထားပုံ ရုပ်ပုံတွေလည်း လူမှုကွန်ရက်မီဒီယာတွေပေါ်မှာ ပျံ့နေပါတယ်။