၂၀၂၃ ခုနှစ်အတွက် အမျိုးသမီး ကမ္ဘာ့လက်ဝှေ့ချန်ပီယံရှစ်ပြိုင်ပွဲကို မတ်လ ၁၅ ရက်က အိန္ဒိယနိုင်ငံ နယူးဒေလီမြို့မှာ စတင်ကျင်းပခဲ့ပြီး စုစုပေါင်း ဆုကြေးငွေအဖြစ် ဒေါ်လာ ၂ ဒသမ ၄ သန်းအထိ ချီးမြှင့်သွားမှာဖြစ်ပါတယ်။
နိုင်ငံပေါင်း ၆၅ နိုင်ငံက အားကစားသမား အယောက် ၃၀၀ ကျော် ပါဝင်ယှဉ်ပြိုင်မယ့် ဒီချန်ပီယံရှစ်ပြိုင်ပွဲမှာ ရုရှားနဲ့ ဘီလာရုစ် လက်ဝှေ့ကစားသမားတွေ ပါဝင်နေတာကြောင့် အမေရိကန်၊ ကနေဒါ၊ ဗြိတိန်၊ ယူကရိန်း၊ ချက်၊ ဆွီဒင်၊ နယူးဇီလန်၊ အိုင်ယာလန်၊ ပိုလန်၊ ဆွစ်ဇာလန်၊ နယ်သာလန်နဲ့ နော်ဝေနိုင်ငံတို့က ဒီပြိုင်ပွဲအပေါ် သပိတ်မှောက်ခဲ့ပါတယ်။
ယူကရိန်းအပေါ် ရုရှားကျူးကျော်ပြီးနောက်ပိုင်း နိုင်ငံတကာအိုလံပစ်ကော်မတီ (IOC) ရဲ့ လမ်းညွှန်ချက်ကို ဆန့်ကျင်ကာ နိုင်ငံတကာလက်ဝှေ့အဖွဲ့ချုပ် (IBA) က ရုရှားနဲ့ ဘီလာရုစ် လက်ဝှေ့ကစားသမားတွေအပေါ် ချမှတ်ထားတဲ့ ပြိုင်ပွဲဝင်ခွင့် တားမြစ်ချက်ကို ပြီးခဲ့တဲ့ အောက်တိုဘာလမှာ ရုပ်သိမ်းခဲ့ပါတယ်။
ဒါကြောင့် IOC အနေနဲ့လည်း IBA ကို အုပ်ချုပ်ရေး၊ ဘဏ္ဍာရေး၊ ဒိုင်လူကြီးရေးရာနဲ့ ကျင့်ဝတ်ဆိုင်ရာ ပြဿနာတွေမှာ ၂၀၁၉ ခုနှစ်ကတည်းက ပါဝင်ခွင့် ဆိုင်းငံ့ထားပြီး လာမယ့် တိုကျိုအိုလံပစ်ပြိုင်ပွဲရဲ့ လက်ဝှေ့ပွဲစဉ်တွေမှာလည်း IBA ကို ထည့်သွင်းထားခြင်း မရှိပါဘူး။ ပါရီမြို့မှာပြုလုပ်မယ့် လက်ရည်စစ်ပြိုင်ပွဲကိုပါ IOC ကိုယ်တိုင် ကျင်းပသွားဖို့ စီစဉ်နေပါတယ်။
IBA အနေနဲ့လည်း ဒေလီမြို့က ဒီ အမျိုးသမီးချန်ပီယံရှစ်ပြိုင်ပွဲကို သပိတ်မှောက်ထားတဲ့ နိုင်ငံတွေအပေါ် စည်းကမ်းပိုင်းအရ အရေးယူမှုတွေ လုပ်သွားမှာဖြစ်သလို အမျိုးသားပြိုင်ပွဲကိုတော့ ဥဇဘက်ကစ္စတန်နိုင်ငံမြို့တော် တက်ရှ်ကန့်မှာ လာမယ့် မေလအတွင်း ကျင်းပသွားမှာ ဖြစ်ပါတယ်။
