ဂျာမနီနဲ့ ကော့စတာရီကာအသင်းတို့ ဒီဇင်ဘာ ၁ ရက်နေ့ကန်မယ့် ကမ္ဘာ့ဖလား အုပ်စုပွဲစဉ်မှာ အမျိုးသမီးဒိုင်လူကြီးတွေ သီးသန့် ကြီးကြပ်သွားမယ့်အကြောင်း ကမ္ဘာ့ဘောလုံးအဖွဲ့ချုပ် (ဖီဖာ) က ထုတ်ပြန်ပါတယ်။
ကွင်းလယ်ဒိုင်အဖြစ် တာဝန်ယူမယ့် ပြင်သစ်အမျိုးသမီး စတက်ဖနီ ဖရာပါ့တ်ဟာ ၉၂ နှစ်တာ သက်တမ်းရှိ အမျိုးသားကမ္ဘာ့ဖလား ဘောလုံးပွဲမှာ တာဝန်ယူမယ့် ပထမဆုံးအမျိုးသမီး အနေနဲ့ မှတ်တမ်းဝင်မှာပါ။
သူနဲ့အတူ ဘရာဇီးအမျိုးသမီး နူဇာဘက်နဲ့ မက္ကဆီကိုအမျိုးသမီး ကာရင် ဒီယေ့ဇ်တို့က စည်းကြပ်ဒိုင်အဖြစ် တာဝန်ယူမှာပါ။ သူတို့ ၂ ယောက်ကလည်း ကမ္ဘာ့ဖလား အမျိုးသားဘောလုံးပြိုင်ပွဲမှာ ပထမဆုံးတာဝန်ယူတဲ့ လက်တင်အမေရိက စည်းကြပ်ဒိုင်တွေအဖြစ် မှတ်တမ်းဝင်မှာ ဖြစ်ပါတယ်။
စတက်ဖ်နီ ဖရာပါ့တ်ဟာ အမျိုးသားဘောလုံးပွဲ Ligue 1 နဲ့ UEFA ဉရောပ ချန်ပီယံလိဂ် ပွဲတွေမှာလည်း ပထမဆုံး အမျိုးသမီးဒိုင်လူကြီးအဖြစ် တာဝန်ယူခဲ့ဖူးပါတယ်။
စည်းကြပ်ဒိုင် မက္ကဆီကိုအမျိုးသမီး ကာရင် ဒီယေ့ဇ်ဟာလည်း ပြီးခဲ့တဲ့နှစ်က အမျိုးသားဘောလုံးပွဲ ကွန်ကာကပ်ဖ် ချန်ပီယံပွဲစဉ်မှာ ပထမဆုံး အမျိုးသမီးဒိုင်လူကြီးအဖြစ် ဆောင်ရွက်ခဲ့ဖူးပါတယ်။
အမျိုးသမီးဒိုင် ၃ ယောက် ကြီးကြပ်မယ့် အဲဒီပွဲစဉ်မှာ ကွင်းပြင်ပ စတုတ္ထဒိုင်ကတော့ ဟွန်ဒူးရပ်စ်အမျိုးသား ဆက်ဒ် မာတီနက်ဇ် ဖြစ်ပါတယ်။
ဖီဖာဘောလုံးအဖွဲ့ချုပ်က ကမ္ဘာ့ဖလားအတွက် အမျိုးသမီးဒိုင်လူကြီး ၆ ယောက် ရွေးချယ်ထားတဲ့အထဲမှာ ကွင်းလယ်ဒိုင်တွေအဖြစ် ပြင်သစ်အမျိုးသမီး စတက်ဖနီ ဖရာပါ့တ်၊ ရဝမ်ဒါက ဆလီမာ မူကန်ဆန်ဂါ၊ ဂျပန်က ယိုရှီမီ ရာမာရှီတာ တို့နဲ့ စည်းကြပ်ဒိုင်တွေအဖြစ် ဘရာဇီးသူ နူဇာဘက်၊ မက္ကဆီကိုက ကာရင် ဒီယေ့ဇ်၊ အမေရိကန်နိုင်ငံက ကက်သရင်း နက်စ်ဘစ်တို့ ဖြစ်ကြပါတယ်။
၂၀၂၂ ခုနှစ် ဖီဖာ ကမ္ဘာ့ဖလား ဘောလုံးပြိုင်ပွဲအတွင်းမှာ အမျိုးသားဒိုင်လူကြီးက အယောက် ၁၀၀ ကျော် တာဝန်ယူကြီးကြပ်တဲ့အထဲမှာ အမျိုးသမီး ၆ ယောက် ပါဝင်လာခဲ့တာလည်း ပထမဆုံးအကြိမ် ဖြစ်ပါတယ်။
