ရန်ကုန်၊ ဒဂုံမြို့သစ်အရှေ့ပိုင်းမြို့နယ်၊ ၁၅ ရပ်ကွက်၊ ကုန်းဘောင်လမ်းနဲ့ နှင်းဆီလမ်းထောင့်မှာ ဧပြီ ၁၉ ရက် ဒီနေ့မနက် ၁၁ နာရီကျော်က အမှိုက်ကောက်သူမိသားစုသုံးဦး တွန်းလာတဲ့ အမှိုက်တွန်းလှည်းအတွင်းမှာ ပေါက်ကွဲမှုဖြစ်ခဲ့ပြီး မိခင်ဖြစ်သူနဲ့ ကလေးငယ်နှစ်ဦး ဒဏ်ရာရရှိခဲ့တယ်လို့ ရပ်ကွက်နေသူတွေဆီက သိရပါတယ်။

အမှိုက်လိုက်ကောက်နေတဲ့ အမျိုးသမီးတဦးနဲ့ ကလေးငယ်နှစ်ဦးဟာ အမှိုက်ကောက်ပြီး တွန်းလှည်းတွန်းလာစဥ် ကုန်းဘောင်လမ်းနဲ့ နှင်းဆီလမ်းထောင့်မှာ ပေါက်ကွဲခဲ့တာ ဖြစ်တယ်လို့ ရပ်ကွက်နေသူတဦးက ဒီဗွီဘီကို ပြောပါတယ်။

“သူတို့ကောက်လာတဲ့ အထုပ်ထဲက ပေါက်တာဖြစ်မှာပေါ့။ အမေဖြစ်သူကလည်း အသက် ၂၀ ကျော်ပဲရှိသေးတယ်။ စိုးရိမ်ရတယ်။ ကလေးက ၄ နှစ်တယောက်၊ တနှစ် တယောက်၊ သူတို့ကတော့ သိပ်မစိုးရိမ်ရဘူး။ အခုဆေးရုံမှာ” လို့ ပြောပါတယ်။

ပေါက်ကွဲမှုဖြစ်ပြီးနောက် ဒဏ်ရာရရှိသူတွေဟာ မစောယုနွယ်၊ မအိသဇင်နဲ့ မောင်နေလင်းအောင် တို့ဖြစ်ပြီး မင်္ဂလာဒုံ အမှတ် ၁ စစ်ဆေးရုံကြီးကို စစ်ကောင်စီတပ်က လူနာတင်ယာဥ်နဲ့ သယ်ဆောင်သွားတယ်လို့ ရပ်မိရပ်ဖတဦးက ဒီဗွီဘီကို ပြောပါတယ်။

ဒဏ်ရာရရှိတဲ့ အမှိုက်ကောက်သူ မိသားစုသုံးဦးမှာ ဒဂုံမြို့သစ်အရှေ့ပိုင်းမြို့နယ်၊ ၁၀၈ ရပ်ကွက် ကျူးကျော်မှာ နေထိုင်သူတွေဖြစ်တယ်လို့ မြို့ခံတွေဆီက သိရပါတယ်။

မကွေးတိုင်းဒေသကြီး ပခုက္ကူမြို့နယ် အမှတ် ၁၅ မြစ်ကိုင်းရပ်ကွက်က နေအိမ်အတွင်း ဗုံးပေါက်ကွဲမှုဖြစ်ပွားပြီး အမှိုက်ကောက်သူတဦး ပေါက်ကွဲသေဆုံးခဲ့တယ်လို့ မြို့ ဒေသခံတွေဆီက သိရပါတယ်။

အမှိုက်ကောက်တဲ့ အလုပ်လုပ်ကိုင်သူ ဦးအေးမြင့်ဟာ ဒီဇင်ဘာ ၂၃ ရက်နေ့ နေ့လယ်ပိုင်းမှာ အမှိုက်ပုံတစ်ခုက ပုံးတစ်ပုံးကို ကောက်ယူလာပြီး နေအိမ်အရောက် ၂ နာရီခွဲအချိန်လောက်မှာ ပေါက်ကွဲမှုဖြစ်ပွားခဲ့တာလို့ သိရပါတယ်။

“အမှိုက်ကောက်လာပြီးတော့ အိမ်အရောက်မှာ ပုံးခွံအတွင်းက ပစ္စည်းတချို့ကို ထုတ်ချိန်မှာ ဗုံးပေါက်ကွဲ သေဆုံးသွားတာ။ အလောင်းက တစ်စစီကို မွကြေသွားတာ၊ လက်တစ်ဖက်လည်း ကြေမွသွားတယ်၊ မျက်နှာလည်း သေချာမမြင်ရတော့ဘူး။ အလောင်းကိုတော့ နာရေးကူညီရေးကားတွေ လာသယ်သွားတယ်” လို့ မျက်မြင်တွေ့သူတစ်ဦးကပြောပါတယ်။

ပေါက်ကွဲမှုဖြစ်စဉ်နဲ့ပတ်သက်ပြီး ဒေသခံ PDF အဖွဲ့တွေက  ပြုလုပ်တာ လုပ်ဝမဟုတ်ကြောင်း၊ အများပြည်သူ စိတ်ဝမ်းကွဲစေဖို့ ပျူစောထီးအဖွဲ့တွေက လုပ်ဆောင်တာလို့ ပြောပါတယ်။

ပျူစောထီးအဖွဲ့ဝင်တွေနဲ့နီးစပ်သူတွေကလည်း ဖြစ်စဉ်နဲ့ပတ်သက်ပြီး  PDF အဖွဲ့တွေ အမှိုက်ကောက် အလုပ်လုပ်သူတွေကို  ငွေကြေးပေးပြီး ရုံး၊ ကျောင်းတွေအနီးမှာ ဗုံးထောင်ခိုင်းတာကြောင့်  အခုလို ပေါက်ကွဲမှုဖြစ်ပြီး သေဆုံးခဲ့ရတာလို့ ပြောပါတယ်။

Pakokku Ranger အဖွဲ့ကလည်း ပြည်သူတွေအနေနဲ့ လမ်းခုလတ်တွေမှာဖြစ်စေ နေအိမ်အနီးနေရာတွေမှာဖြစ်စေ စက္ကူပုံးတွေကို တွေ့ရှိခဲ့ပါက မထိမကိုင် မယူဆောင်ကြဖို့ သတိပေးစာထုတ်ပြန်ထားပါတယ်။

သေဆုံး   ဦးအေးမြင့်အတွက်လည်း ပျူစောထီးအဖွဲ့ဝင်တွေရဲ့ လူမဆန်လုပ်ရပ်ကြောင့် သေဆုံးခဲ့ရတဲ့အတွက် အထူးဝမ်းနည်းကြေကွဲကြောင်း ထုတ်ပြန်ထားပါတယ်။