အင်းတကော်နယ်မြေရဲစခန်းမှာ ပြီးခဲ့တဲ့ ရက်ပိုင်းအတွင်းက ဦးမောင်မောင်ကျော်နဲ့ ရုပ်ရှင်သရုပ်ဆောင် မို့မို့မြင့်အောင်တို့ လင်မယားနှစ်ဦးကို ပုဒ်မ ၄၂၀ နဲ့ အမှုဖွင့်ခဲ့တယ်လို့ ရဲတပ်ဖွဲ့နဲ့နီးစပ်သူတွေဆီက သိရပါတယ်။
ဦးမောင်မောင်ကျော်နဲ့ ဇနီးဖြစ်သူမှာ ထားဝယ်ရေနက်စီမံကိန်းလုပ်ငန်းမှာ ငွေလိုအပ်တာကြောင့် လွန်ခဲ့တဲ့နှစ်တွေက ငွေသိန်းငါးထောင်ကို အင်းတကော်မြို့ ဥယျာဥ်ခြံမြေလုပ်ငန်းလုပ်ကိုင်သူတဦးဆီက ချေးငှားပြီး ပြန်မပေးတဲ့အတွက် အမှုဖွင့်တိုင်ကြားခဲ့တာလို့ အမည်မဖော်လိုသူရဲအရာရှိတဦးက ပြောပါတယ်။
"ဖေဖော်ဝါရီ ၁၂ ရက်က တိုင်ထားတာပါ။ သူယောကျ်ားရော၊ သူ့ကိုရော တိုင်ထားတာ။ လိမ်လည်မှုနဲ့ ထန်းပင်ချောင်ကျေးရွာမှာနေတဲ့ လုပ်ငန်းရှင်တဦးက တိုင်တာပါ။"
တိုင်ကြားခံရသူလင်မယားမှာ ငွေကြေးမပေးဘဲ ရှောင်တိမ်းနေတဲ့အတွက် လိုက်လံရှာဖွေပြီး ညှိနှိုင်းခဲ့ရာ ၂၀၂၂ ခုနှစ် ဒီဇင်ဘာ ၂၂ ရက်မှာ သိန်း ၃၀၀၀ တကြိမ်နဲ့ ၂၀၂၃ ခုနှစ်မှာ သိန်း ၂၀၀၀ တကြိမ်ပြန်ပေးမယ်လို့ ကတိပြုခဲ့ပြီး ပြန်မပေးတဲ့အတွက် အခုလိုတိုင်ကြားခဲ့တာလို့ သိရပါတယ်။
ခင်ပွန်းဖြစ်သူမှာ ငွေကြေးအရှုပ်အရှင်းများရှိတာကြောင့် ပြီးခဲ့တဲ့ ၂၀၂၂ ခုနှစ် နိုဝင်ဘာ ၁၁ ရက် က လသာမြို့နယ် အမှတ် ၂ စည်ပင်သာယာတရားရုံးမှာ တရားဝင်ကွာရှင်းပြတ်စဲထားပြီး ခင်ပွန်းဖြစ်သူနဲ့ပတ်သက်တဲ့ ငွေကြေးအရှုပ်အရှင်းတွေကို မရှင်းနိုင်ကြောင်း နိုင်ငံပိုင်သတင်းစာမှာ နိုဝင်ဘာ ၂၆ ရက်က ကြေညာထားပါတယ်။
လက်တလောမှာ မြောက်ဒဂုံမြို့နယ် တော်ဝင်အိမ်ရာ သဇင်လမ်းနေ ဦးမောင်မောင်ကျော်နဲ့ ဒေါ်မို့မို့မြင့်အောင်တို့ နှစ်ဦးကို အင်းတကော်နယ်မြေရဲစခန်းမှ (ပ)၂၀/၂၀၂၃ ပုဒ်မ ၄၂၀ နဲ့ အမှုဖွင့်ထားတယ်လို့ ရဲတပ်ဖွဲ့မှ သိရပါတယ်။
မွန်ပြည်နယ်၊ ကျိုက်ထိုမြို့နယ်၊ ကော့ထင်းကျေးရွာမှာ ဇန်နဝါရီ ၂၂ ရက် ညနေက စစ်ကောင်စီတပ် ဖမ်းဆီးခဲ့တဲ့ ဖေ့စ်ဘွတ်ခ်ဆယ်လီ အောင်ချမ်းအေးကို ကျိုက်ထို မြို့မရဲစခန်းမှာ ပုဒ်မ ၅၀၅(က) နဲ့ အမှုဖွင့်ထားတယ်လို့ ဒေသခံတွေဆီက သိရပါတယ်။
ထိုင်းကနေ အလုပ်ကိစ္စနဲ့ ပြည်တွင်းကို ဝင်ရောက်လာတဲ့ ဖေ့စ်ဘွတ်ခ်ဆယ်လီ အောင်ချမ်းအေးဟာ မိဘတွေရှိတဲ့ ကော့ထင်းကျေးရွာကို ဝင်ရောက်တဲ့အချိန်မှာ အဖမ်းခံရတာလို့ ဒေသခံတဦးက ပြောပါတယ်။
“အုပ်ချုပ်ရေးက စစ်တပ်ကို ဖုန်းဆက်လိုက်လို့ လာဖမ်းတယ်လို့ ကြားတယ်၊ စစ်တပ်ရော ရဲရော ပါတယ်။”
စစ်တပ်က အာဏာသိမ်းပြီးနောက်ပိုင်း ဆန္ဒပြပွဲတွေမှာ ပါဝင်ခဲ့တဲ့ အောင်ချမ်းအေးကို ကျိုက်ထို မြို့မရဲစခန်းက ပြီးခဲ့တဲ့နှစ်က ပုဒ်မ ၅၀၅(က) နဲ့ အမှုဖွင့်ခဲ့တယ်လို့ အုပ်ချုပ်ရေးနဲ့ နီးစပ်သူတဦးက ပြောပါတယ်။
“၂၀၂၂ ခုနှစ်ထဲမှာ သူ့ကို အမှုဖွင့်ထားတာ၊ အဲဒီအချိန်မှ သူက ထိုင်းဘက်သွားပြီး အလုပ်လုပ်တာ၊ ဘာကြောင့်ပြန်လာတာလဲ မသိဘူး။”
စစ်တပ်က အာဏာသိမ်းပြီးနောက်ပိုင်း ကျိုက်ထိုမြို့နယ်မှာ ဒလန်တွေ သတင်းပေးလို့ စစ်ကောင်စီတပ်က CDM ဝန်ထမ်း၊ နိုင်ငံရေးတက်ကြွလှုပ်ရှားသူတွေနဲ့ NLD ပါတီဝင်တွေကို ဖမ်းဆီးခဲ့တာလည်း ရှိပါတယ်။
