စစ်ကောင်စီက ဖမ်းဆီးတရားစွဲထားတဲ့ သမ္မတဦးဝင်းမြင့်၊ နိုင်ငံတော်အတိုင်ပင်ခံ ပုဂ္ဂိုလ်ဒေါ်အောင်ဆန်းစုကြည်နဲ့ နေပြည်တော်မြို့တော်ဝန် ဒေါက်တာမျိုးအောင်တို့ သုံးဦးရဲ့ ရုံးချိန်းတွေကို ထပ်မံရွှေ့ဆိုင်းလိုက်တယ်လို့ ရှေ့နေက ပြောပါတယ်။
“ရုံးချိန်းက ၁၆၊ ၁၇ ရွှေ့လိုက်တယ်။ လေးမှုက ၁၆ ရက်နေ့၊ နှစ်မှုက ၁၇ ရက်နေ့ပေါ့။ ဒီနေ့က အဲဒါပဲ ရုံးကလှမ်းဆက်ပြီး ပြောတာပဲရှိပါတယ်” လို့ နိုင်ငံခေါင်းဆောင်တွေရဲ့ ရှေ့နေဖြစ်သူ ဒေါ်မင်းမင်းစိုးက ပြောပါတယ်။
နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို သဘာဝဘေးအန္တရာယ်ဆိုင်ရာ စီမံခန့်ခွဲမှု ဥပဒေပုဒ်မ ၂၅ နဲ့ နှစ်မှု၊ ပို့ကုန်သွင်းကုန်ဥပဒေပုဒ်မ ၈၊ ဆက်သွယ်ရေးဥပဒေပုဒ်မ ၆၇၊ နိုင်ငံတော်အကြည်ညိုပျက်စေမှု ပုဒ်မ ၅၀၅(ခ)၊ နိုင်ငံတော်လျှို့ဝှက်အက်ဥပဒေပုဒ်မ ၃၊ အဂတိလိုက်စားမှုပုဒ်မတွေနဲ့ စစ်ကောင်စီက တရားစွဲဆိုထားပါတယ်။
နိုင်ငံတော်သမ္မတ ဦးဝင်းမြင့်ကိုလည်း သဘာဝဘေးအန္တရာယ်ဆိုင်ရာ စီမံခန့်ခွဲမှုဥပဒေပုဒ်မ ၂၅၊ နိုင်ငံတော်အကြည်ညိုပျက်စေမှု ပုဒ်မ ၅၀၅(ခ)တို့ စွဲဆိုထားသလို နေပြည်တော်မြို့တော်ဝန် ဒေါက်တာမျိုးအောင်ကိုလည်း နိုင်ငံတော်အကြည်ညိုပျက်စေမှု ပုဒ် မ ၅၀၅(ခ) နဲ့ စွဲဆိုထားပါတယ်။
