ဆိုမာလီယာနိုင်ငံ၊ မိုဂါဒစ်ရှူးမြို့တော်မှာ လူအယောက် ၁၀၀ ထက်မနည်း သေဆုံးခဲ့ရတဲ့ ကားဗုံးပေါက်ကွဲမှုနဲ့ ပတ်သက်လို့ သမ္မတ မိုဟာမက်က အယ်လ်ရှာဘတ်အဖွဲ့ကို အပြစ်တင်ခဲ့ပါတယ်။
အောက်တိုဘာ ၂၉ ရက်က မိုဂါဒစ်ရှူးမြို့တော်ရှိ လူစည်ကားတဲ့ ဈေးလမ်းဆုံနားမှာရှိတဲ့ ပညာရေးဝန်ကြီးဌာနမှာ ကားဗုံးနှစ်လုံး ပေါက်ကွဲခဲ့လို့ လူ အယောက် ၁၀၀ထက်မနည်း သေဆုံးပြီး အယောက် ၃၀၀ လောက် ဒဏ်ရာရခဲ့တယ်လို့ သမ္မတ ဟတ်ဆန် ရှိတ်ခ် မိုဟာမက်က ပြောပါတယ်။
ဒဏ်ရာရသူတချို့က ပြင်းထန်တဲ့ အခြေအနေမှာရှိပြီး သေဆုံးသူအရေအတွက် တိုးလာနိုင်တယ်လို့လည်း သမ္မတ မိုဟာမက်က ပြောပါတယ်။
မိုဂါဒစ်ရှူးမြို့တော် K5 လမ်းဆုံမှာ အစားအသောက်၊ အဝတ်အထည်၊ ရေမှသည် နိုင်ငံခြားငွေနဲ့ ကတ်အပျော့စား မူးယစ်ဆေးဝါးအရွက်တွေအထိ ရောင်းဝယ်ဖောက်ကားနေသူတွေနဲ့ ပုံမှန်အားဖြင့် စည်ကားနေပေမဲ့ ဗုံးပေါက်ကွဲမှုကြောင့် အရေးပေါ်ဝန်ထမ်းတွေက လမ်းတွေနဲ့ အဆောက်အအုံတွေက သွေးတွေကို သန့်ရှင်းရေး လုပ်နေဆဲမို့ တိတ်ဆိတ်ငြိမ်သက်နေပါတယ်။
၂၀၁၇ ခုနှစ် အောက်တိုဘာလက ထရပ်ကား ဗုံးပေါက်ကွဲလို့ လူပေါင်း ၅၀၀ ကျော် သေဆုံးခဲ့ပြီးတဲ့နောက်ပိုင်း အောက်တိုဘာ ၂၉ ရက် တိုက်ခိုက်မှုဟာ အသေအပျောက်အများဆုံး တိုက်ခိုက်မှုဖြစ်လာပါတယ်။
အယ်လ်ရှာဘတ် သူပုန်တွေဟာ အစိုးရကိုဖယ်ရှားပြီး အစ္စလာမစ် ဥပဒေကို အခြေခံတဲ့ကိုယ်ပိုင် အုပ်ချုပ်ခွင့် ရဖို့ ကြိုးစားနေတာဖြစ်ပြီး မိုဂါဒစ်ရှူးနဲ့ တခြားနေရာတွေကို မကြာခဏ တိုက်ခိုက်ခဲ့ပါတယ်။
ဒါပေမဲ့ တိုက်ခိုက်မှု အတွက် တာဝန်မယူဘဲ ရှောင်လေ့ရှိပြီး အသေအပျောက်များလေ့ ရှိတယ်လို့ ရိုက်တာက ဖော်ပြပါတယ်။
