close

အရက်ရောင်းချမှု

close

April 27, 2023

ရွေးကောက်ပွဲကာလ အရက်မရောင်းချရန် ထိုင်းအစိုးရထုတ်ပြန်

ရွေးကောက်ပွဲကာလမှာ မဲပေးမှုမှားယွင်းမှာစိုးရိမ်တဲ့အတွက်ကြောင့် ထိုင်းနိုင်ငံတဝန်းမှာ  အရက်ရောင်းချခွင့်ကိုပိတ်ပင်လိုက်တယ်လို့ ထိုင်းနိုင်ငံအခြေစိုက် TheThaiger သတင်းဌာနက ဖော်ပြပါတယ်။

ဒေသစစ်တမ်းတွေအရ ထိုင်းနိုင်ငံတွင်းမှာ အလုပ်နားရက်ဖြစ်တဲ့ စနေနေ့မျိုးတွေမှာ အရက်သေစာသောက်စားမှု ပိုမိုများပြားတဲ့အတွက်ကြောင့် မဲပေးရာမှာ မှားယွင်းမှုတွေ မဖြစ်ပေါ်စေဖို့အတွက်ဒီတားမြစ်ချက်ကို ထုတ်ပြန်လိုက်တာပါ။

မေ ၆ ရက်မှာ ကြိုတင်မဲတွေ စတင်ပေးရမှာဖြစ်ပြီး မေ ၆ ရက် မနက် ၆ နာရီကနေစတင်ကာ မေ ၁၄ ရက် မနက် ၆ နာရီအထိ တနိုင်ငံလုံး အတိုင်းအတာနဲ့ အရက်သောက်သုံးခွင့်နဲ့ ရောင်းချခွင့်ကို တရားဝင် ထိုင်းအစိုးရက တားမြစ်ထားတာ ဖြစ်ပါတယ်။

ထိုင်းနိုင်ငံမှာ နိုင်ငံခြားသား ခရီးသွားတွေနဲ့ ရွှေ့ပြောင်းအလုပ်သမားတွေ ရှိနေတဲ့အတွက် နိုင်ငံခြားသားတွေအနေနဲ့ မဲပေးခွင့်မှာ မပါဝင်ပေမဲ့လည်း အခုထုတ်ပြန်ချက်မှာတော့ နိုင်ငံတွင်းကလူအားလုံး သက်ဆိုင်တယ်လို့ ဖော်ပြထားပါတယ်။

အဆိုပါ ထုတ်ပြန်ချက်ကို ချိုးဖောက်ပါက ထောင်ဒဏ် ၆ လ သို့မဟုတ် ဒဏ်ငွေ ဘတ် ၁၀,၀၀၀ နဲ့ ပြစ်ဒဏ်နှစ်ရပ်လုံး ကျခံရနိုင်တာဖြစ်ပြီး ဒီထုတ်ပြန်ချက်က စတိုးဆိုင်တွေ၊ ဘားတွေ၊ စားသောက်ဆိုင်တွေအပြင် မင်္ဂလာပွဲနဲ့ ပါတီပွဲတွေပါ အကျုံးဝင်နေတာပါ။

ထိုင်းနိုင်ငံမှာ ဒေသန္တရထုတ်ပြန်ချက်တွေဖြစ်တဲ့ အရက်မရောင်းချရတဲ့ ဥပဒေတွေက ရွေးကောက်ပွဲကာလရယ်မဟုတ်ဘဲ ဗုဒ္ဓဘာသာနဲ့သက်ဆိုင်တဲ့ နေ့ထူးနေ့မြတ်တွေကို နှစ်စဥ် ပြက္ခဒိန်အလိုက် ရက်အတိအကျသတ်မှတ်ပြီး တားမြစ်ချက်တွေ ရှိနေတာဖြစ်ပြီး ၁၉၇၂ ခုနှစ်က ထိုင်းအစိုးရက ထုတ်ပြန်ခဲ့တဲ့ နေ့လယ် ၂ နာရီကနေ ညနေ ၅ နာရီအထိ အရက်မရောင်းရ၊ မသောက်သုံးရ ဥပဒေကလည်း ဒီနေ့အထိ တည်မြဲနေပါသေးတယ်။

အရက်နဲ့ပတ်သက်တဲ့ ကြော်ငြာတွေကိုလည်း ထိုင်းနိုင်ငံတွင်းမှာ ဥပဒေအရ ပြဋ္ဌာန်းတားမြစ်ထားပါတယ်။ ပြီးခဲ့တဲ့ ရက်အနည်းငယ်ကပဲ နွန်ထဘူရီခရိုင်တရားရုံးက ၂၀၂၀ ပြည့်နှစ်တုန်းက ဖေ့စ်ဘွတ်ခ်မှာ ကိုယ်တိုင်လုပ်ဘီယာ (Craft Beer) ကြော်ငြာတဲ့ ဓာတ်ပုံတင်ခဲ့သူ ထိုင်းအမျိုးသားကို ထိုင်းဥပဒေအရ ထောင် ၆ လနဲ့ ဒဏ်ငွေ ဘတ် ၁၅၀,၀၀၀ ပေးဆောင်စေရန် အမိန့်ချခဲ့ပြီး နောက်ထပ် ဘတ် ၁၅၀,၀၀၀ ပေးပြီးမှ အာမခံနဲ့ ပြန်လွှတ်ပေးခဲ့ပါတယ်။

15 mins Ago
Up