ဆူဒန်တပ်မတော် (SAF)ဟာ သူ့ပြိုင်ဘက်အရန်ကာကွယ်ရေးတပ်ဖွဲ့ (RSF) နဲ့ လက်နက်ကိုင် တိုက်ပွဲတွေကို ယာယီရပ်တန့်ဖို့ အဆိုပြုချက်ကို လက်ခံခဲ့ပေမယ့် RSF နဲ့ တိုက်ရိုက် ဆွေးနွေးမှာ မဟုတ်ဘူးလို့ ဆူဒန်သံတမန်တဦးရဲ့ ပြောကြားချက်ကို ကိုးကားပြီး ပြည်တွင်းမီဒီယာတွေက မေ ၅ ရက်မှာ ဖော်ပြပါတယ်။
သတင်းတွေအရ ဆူဒန်စစ်တပ် (SAF) ဟာ ဆူဒန်မှာ အပစ်အခတ်ရပ်စဲရေးကာလနဲ့ လူသားချင်း စာနာထောက်ထားမှုဆိုင်ရာ ဝင်ရောက်မှုတို့ကို ဆွေးနွေးမယ့် ကိုယ်စားလှယ်အဖွဲ့တဖွဲ့ကို ဆော်ဒီအာရေဗျနိုင်ငံ ဂျဒ်ဒါကို စေလွှတ်မှာဖြစ်ကြောင်း ဆူဒန်ရဲ့အချုပ်အခြာအာဏာကောင်စီ ဥက္ကဋ္ဌရဲ့ အထူးသံတမန် ဒါဖါလာ ဟာ့ဂ်ျအလီက မေ ၅ ရက် ညမှာ ပြောပါတယ်။
အလီဟာ ပြိုင်ဘက် စစ်တပ်အုပ်စု ၂ ရပ်ကြား တိုက်ရိုက်တွေ့ဆုံဆွေးနွေးနိုင်ခြေကို ပယ်ချခဲ့ပါတယ်။
ဆူဒန်စစ်တပ်ကတော့ လက်ရှိ အပစ်အခတ်ရပ်စဲရေးကို တပတ်ကြာ သက်တမ်းတိုးခြင်းနဲ့ အပစ်အခတ်ရပ်စဲရေး ဆွေးနွေးဖို့ နှစ်ဖက်စလုံးမှ ကိုယ်စားလှယ်တဦးကို အမည်တင်သွင်းခြင်း အပါအဝင် အစိုးရအချင်းချင်း ဖွံ့ဖြိုးတိုးတက်ရေးဆိုင်ရာ အာဏာပိုင်အဖွဲ့ (IGAD) က အဆိုပြုတဲ့ ပဏာမခြေလှမ်းကို သဘောတူခဲ့တယ်လို့ မေ ၃ ရက်မှာ ပြောကြားခဲ့ကြောင်း ထုတ်ပြန်ချက်မှာ ဖော်ပြထားပါတယ်။
မေ ၅ ရက်မနက်မှာ RSF ဟာ အမေရိကန်-ဆော်ဒီ ကြားဝင် ဖျန်ဖြေမှုကို တုံ့ပြန်တဲ့အနေနဲ့ လူသားချင်းစာနာထောက်ထားမှု စင်္ကြံတွေ ဖွင့်ပေးဖို့နဲ့ နိုင်ငံသားတွေရဲ့ သွားလာမှု အဆင်ပြေ ချောမွေ့စေရေးအတွက် နောက်ထပ် ၇၂ နာရီကြာ အပစ်အခတ်ရပ်စဲရေးကို ကြေညာခဲ့ကြောင်း အရန်တပ်ဖွဲ့က ဆိုရှယ်မီဒီယာမှာ ပြောပါတယ်။
ဧပြီ ၁၅ ရက် ကတည်းက ခါတွန်မြို့တော်မှာ ဆူဒန်စစ်တပ် SAF နဲ့ အရန်တပ်ဖွဲ့ RSF တို့အကြား တိုက်ပွဲတွေ ဖြစ်ပွားနေပြီး နိုင်ငံကို လူသားချင်းစာနာထောက်ထားမှုဆိုင်ရာ အကျပ်အတည်းဆီ တွန်းပို့ခဲ့တယ်လို့ တဖက်နဲ့တဖက် အပြန်အလှန် အပြစ်တင်နေကြတာပါ။
အကြမ်းဖက်မှုကြောင့် လူ ၅၅၁ ဦး သေဆုံးပြီး လက်နက်ကိုင် အမျိုးသားတွေနဲ့ အရပ်သားတွေ အပါအဝင် နိုင်ငံတဝန်းရှိ ကျန်းမာရေး အဆောက်အအုံတွေမှာ လူပေါင်း ၅,၀၀၀ ကျော် ဒဏ်ရာရခဲ့ကြောင်း စာရင်းသွင်းထားတယ်လို့ ဆူဒန်ကျန်းမာရေးဝန်ကြီးဌာနက မေ ၅ ရက် မွန်းလွဲမှာ ပြောကြားခဲ့ပါတယ်။
ဒါ့အပြင် ဆူဒန်မှာ ကလေးတွေအတွက် ပိုလီယိုကာကွယ်ဆေး ၁ သန်းကျော် လုယက်ခံခဲ့ ရကြောင်း ကုလသမဂ္ဂကလေးများရန်ပုံငွေအဖွဲ့ UNICEF က မေ ၅ ရက်မှာ ပြောကြားခဲ့ပါတယ်။
