ရုရှားဟာ ယူကရိန်းက သူ့ရဲ့ စစ်ရေးလှုပ်ရှားမှုကို ပံ့ပိုးဖို့အတွက် စစ်တပ်အရန်တပ်ဖွဲ့ဝင် ၃ သိန်းကို ခေါ်ယူမှာဖြစ်ကြောင်း ကာကွယ်ရေးဝန်ကြီး ဆာဂေရွှိုင်ဂူက စက်တင်ဘာ ၂၁ ရက်မှာ ပြောပါတယ်။

ယူကရိန်းကိုသာမက အနောက်နိုင်ငံတွေက ကျောထောက်နောက်ခံ တွေကိုပါ အနိုင်ယူဖို့ နောက်ထပ် အရန်လူအင်အား လိုအပ်တယ်လို့ သမ္မတ ပူတင်က မနက်စောစော ရုပ်မြင်သံကြားမိန့်ခွန်းမှာ ပြောကြားခဲ့ပါတယ်။

ရုရှားမှာ အလားအလာရှိတဲ့ တိုက်ခိုက်ရေးသမား ၂၅ သန်းရှိကြောင်း ရွှိုင်ဂူက ပြောဆိုပါတယ်။ ကရင်မလင်ရဲ့ ဝက်ဘ်ဆိုက်ရှိ အမိန့်ထုတ်ပြန်ချက်က ခေါ်ဆိုမှုဟာ အရင်စစ်မှုထမ်း အတွေ့အကြုံရှိတဲ့ အရန်တပ်ဖွဲ့ဝင်တွေနဲ့သာ သက်ဆိုင်မယ်လို့ ဆိုပါတယ်။ ဒါဟာ အမျိုးသား ၃ သိန်းလောက်ကို ဆိုလိုကြောင်း ပြောပါတယ်။

ယူကရိန်းကို တပ်ချ တာဝန်မပေးခင် သူတို့ကို ထပ်လောင်းလေ့ကျင့်မှုတွေလည်း ပေးသွားမှာဖြစ်ပြီး ကျောင်းသားတွေနဲ့ စစ်မှုထမ်းစာရင်းဝင်ရုံ တာဝန်ထမ်းဆောင်ဖူးသူတွေကို ခေါ်ယူမှာမဟုတ်ကြောင်း သူကဆိုပါတယ်။

အခု အရန်အင်အား စည်းရုံးခေါ်ယူမှုဟာ ယူကရိန်းရှိ ရှေ့တန်း ကီလိုမီတာ ၁,၀၀၀ ရဲ့နောက်မှာ သိမ်းပိုက်ထားတဲ့ ရုရှားနယ်မြေတွေကို စုစည်းနိုင်စေမှာဖြစ်ကြောင်းလည်း ရွှိုင်ဂူက ပြောပါတယ်။

၆ လနီးပါးအတွင်း မော်စကိုရဲ့ အသေအပျောက် ကိန်းဂဏန်းများဆိုင်ရာ ပထမဆုံး ထုတ်ပြန်ချက်မှာ ရွှိုင်ဂူက တိုက်ပွဲတွေ စတင်ချိန်ကတည်းက ရုရှားစစ်သား ၅,၉၃၇ ယောက် သေဆုံးခဲ့ကြောင်း ပြောဆိုပါတယ်။

ရုရှားဟာ သူ့ရဲ့ ၇ လကြာ တိုက်ပွဲအတွင်း ဆုံးရှုံးမှု ကြီးကြီးမားမား ကြုံတွေ့ခဲ့ရကြောင်း ကိယက်ဗ်နဲ့ အနောက်အုပ်စုတို့ရဲ့ ပြောဆိုချက်တွေကို ရွှိုင်ဂူကပယ်ချလိုက်ပြီး ဒဏ်ရာရ ရုရှားစစ်သား ၉၀ ရာခိုင်နှုန်းဟာ ရှေ့တန်းကို ပြန်သွားကြပြီလို့လည်း သူက ဆိုပါတယ်။

ရုရှားအရန်တပ်သား ၃ သိန်းကို စည်းရုံးဖို့ အမိန့်ပေးပြီးတဲ့နောက် ရုရှားသမ္မတ ဗလာဒီမာပူတင်ကို ဆန့်ကျင်ဆန္ဒပြဖို့ ရုရှားအတိုက်အခံတွေက စက်တင်ဘာ ၂၁ ရက်မှာ တောင်းဆိုလိုက်ပါတယ်။

ရုရှားကိုကာကွယ်ဖို့ နျူကလီးယားလက်နက်သုံးဖို့ အသင့်ရှိမယ်လို့ ပြောခဲ့သလို ဟိတ်ဟန်ထုတ် ခြောက်လှန့်နေတာ မဟုတ်ဘူးလို့လည်း အနောက်နိုင်ငံတွေကို သတိပေးခဲ့ပါတယ်။

ဗုဒ္ဓဟူးနေ့က ဆိုရှယ်မီဒီယာမှာ တင်ထားတဲ့  ရုပ်သံဗွီဒီယိုမှာတော့ ရုရှားနိုင်ငံ နိုဗိုစီဗျက်စ်ခ်မြို့မှာ ဆန္ဒပြသူတွေထဲက တယောက်က “ပူတင်အတွက် မသေပေးနိုင်ဘူး” လို့ ရဲတွေကို လှမ်းအော်ပြောခဲ့ပါတယ်။

ဂြိုဟ်တုကနေ ရိုက်ကူးထားတဲ့ လမ်းမြင်ကွင်းဓာတ်ပုံနဲ့ လူမှုကွန်ရက်ပေါ်က ဗီွဒီယိုထဲက ရှုခင်းတွေ ကိုက်ညီနေလို့ အဆောက်အဦတွေနဲ့ တည်နေရာကို ရိုက်တာသတင်းဌာနက အတည်ပြုပေးခဲ့ပါတယ်။

လက်ရှိအကျဉ်းကျခံနေရတဲ့ ရုရှားရဲ့ အထင်ရှားဆုံး အတိုက်အခံခေါင်းဆောင် နာဗယ်လ်ညီက ပူတင်ဟာ စစ်ပွဲမအောင်မြင်လို့ ရုရှားနိုင်ငံသားတွေကို သေတွင်းဆီပို့နေတယ်လို့ ပြောခဲ့ပါတယ်။

ဖေဖော်ဝါရီ ၂၄ ရက်က ယူကရိန်းနိုင်ငံကို ဝင်တိုက်ခိုက်ပြီးကတည်းက ပူတင်ဟာ သဘောထားကွဲလွဲသူတွေနဲ့ မီဒီယာတွေကို နှိမ်နင်းခဲ့ပြီး စစ်ဆန့်ကျင်ရေး ဆန္ဒပြပွဲတွေမှာ ထောင်ချီတဲ့လူတွေကို ဖမ်းခဲ့ပါတယ်။

စစ်တပ်နဲ့ပတ်သက်တဲ့ သတင်းအတု ဖြန့်ဝေသူတွေကို ထောင်ဒဏ် ၁၅ နှစ်အထိ ချမှတ်ဖို့ ဥပဒေသစ်တရပ်ကိုလည်း ပြဋ္ဌာန်းခဲ့ပါတယ်။

စက်တင်ဘာ ၂၁ ရက်က ရုရှားနိုင်ငံတလွှား စစ်ပြင်ဆင်မှုဆန့်ကျင်ရေး ဆန္ဒပြပွဲတွေ တလွှားမှာ လူအယောက် ၇၀၀ ကျော် အဖမ်းခံခဲ့ရတယ်လို့ လူ့အခွင့်အရေး အုပ်စုတစုက ပြောပါတယ်။

မြို့ပေါင်း ၃၆ မြို့ထက်မနည်းမှာ အဖမ်းအဆီးတွေ ရှိခဲ့တယ်လို့ လွတ်လပ်တဲ့ ဆန္ဒပြပွဲ စောင့်ကြည့်ရေးအုပ်စု OVD-Info က ပြောခဲ့တာပါ။

ရုရှားရဲ့ ဆန္ဒပြပွဲဆန့်ကျင်ရေး ဥပဒေတွေအောက်မှာ တားမြစ်ပိတ်ပင်ထားတဲ့ ချီတက်ပွဲတွေဟာ တရားမဝင်ဘူးလို့ သတ်မှတ်ထားပါတယ်။