တနင်္သာရီတိုင်း၊ ကော့သောင်းခရိုင်၊ ဘုတ်ပြင်းမြို့နယ်မှာ စစ်ကောင်စီတပ်က ပြီးခဲ့တဲ့ မတ်လ ၂၅ ရက်နဲ့ ၂၆ ရက်နေ့တွေမှာ အရပ်သား ၁၀ ဦးအပြင် လသားကလေးငယ်တဦးကိုပါ ဖမ်းဆီးခဲ့တယ်လို့ ဒေသခံတွေထံက သိရပါတယ်။

ဘုတ်ပြင်းမြို့နယ်ထဲက စစ်ဆေးရေးဂိတ်တခုမှာ စစ်ကောင်စီတပ်သားတွေက ကော့သောင်းဘက်ကနေ ဘုတ်ပြင်းဘက်ကိုလာတဲ့ အမျိုးသား၂ ဦး၊ အမျိုးသမီး ၂ ဦးနဲ့ ၄၅ ရက်သားအရွယ် ကလေးတဦးတို့ကို မတ်လ ၂၅ ရက်နေ့က ဖမ်းဆီးခဲ့တာလို့ ဆိုပါတယ်။

“၂၅ ရက်နေ့မှာ ဆိုင်ကယ်နှစ်စီး ဖမ်းခံထိတယ်လို့ ကျနော်တို့ကြားတယ်။ ပြီးတော့ ၂၆ ရက်နေ့မှာ ဒေသခံတွေ ထပ်ဖမ်းတယ်။ ဘယ်လိုအကြောင်းအရာတွေကြောင့် ဖမ်းသွားလဲဆိုတာ ကျနော်တို့မသိဘူး။ အခုဖမ်းသွားတဲ့လူတွေက PDF နဲ့ ဘာမှ ဆက်စပ်မှုမရှိဘူး” လို့ ဒေသခံတဦးက ပြောပါတယ်။

စစ်ကောင်စီက မတ်လ ၂၅ ရက် ညပိုင်းမှာ ဘုတ်ပြင်းမြို့ထဲက အမျိုးသားတဦးနဲ့ အမျိုးသမီးတဦးတို့ကို ဖမ်းဆီးခေါ်ဆောင်သွားပြီး မတ်လ ၂၆ ရက်နေ့မှာလည်း ဘုတ်ပြင်းမြို့ထဲက အမျိုးသား ၄ ဦးကိုပါ ဖမ်းဆီးသွားတယ်လို့ ဒေသခံတွေထံက သိရပါတယ်။

ဒေသခံအမျိုးသားတဦးကလည်း “စကစကနေပြီး ဖမ်းဆီးခံရတဲ့သူတွေက PDF တွေနဲ့ ဆက်စပ်မှုမရှိဘူး။ ဖမ်းဆီးခံရသူတွေထဲမှာ လုပ်ငန်းရှင်လည်းပါတယ်။ ဒါကတော့ ကျနော်တို့အတွက် စဉ်းစားစရာတခုဖြစ်နေတယ်” လို့ ပြောပါတယ်။

စရဖ‌တွေက အမျိုးသမီးတဦးကို အကြမ်းဖက် ရိုက်နှက်ပြီး စစ်ဆေးခဲ့ပြီး ဖမ်းဆီးခံရသူတွေကို ဘုတ်ပြင်းရဲစခန်းမှာ ထိန်းသိမ်းထားတယ်လို့  စကစနဲ့ နီးစပ်သူတဦးက ပြောပါတယ်။

နွေဦးတော်လှန်ရေးဟာ အရပ်သားပြည်သူတွေရဲ့ လူ့အခွင့်အရေးကို ဝိုင်းဝန်းကာကွယ် ထိန်းသိမ်းဖို့ ရည်ရွယ်ချက်လည်းပါဝင်ကြောင်းနဲ့ ဒေသဆိုင်ရာ ပြည်သူ့အုပ်ချုပ်ရေးအဖွဲ့တွေအနေနဲ့ အရပ်သားပြည်သူတွေရဲ့ လူ့အခွင့်အရေးကို ကာကွယ်စောင့်ရှောက်ပေးဖို့  အမျိုးသားညီညွတ်ရေးအစိုးရ (NUG)၊ လူ့အခွင့်အရေးဆိုင်ရာဝန်ကြီး ဦးအောင်မျိုးမင်းကတိုက်တွန်း လိုက်ပါတယ်။

ဖက်ဒရယ်ဒီမိုကရေစီ နိုင်ငံတော်သစ်တခု ထူထောင်နိုင်ဖို့အတွက် မြို့နယ်၊ ဒေသအသီးသီးမှာ အစပျိုးပြီး ပြည်သူလူထုရဲ့ လေးစားယုံကြည်မှုနဲ့ ပြည်သူလူထုအားကို ရယူပြီးတော့ ဖော်ဆောင်နိုင်မယ်ဆိုရင် အောင်ပွဲမြန်ဆန်နိုင်မှာဖြစ်လို့ ကြိုးစားလုပ်ဆောင်ကြဖို့လည်း ဝန်ကြီး ဦးအောင်မျိုးမင်းက ပြောပါတယ်။

မတ် ၅ ရက် ဒီကနေ့ ပြုလုပ်တဲ့ NUG အစိုးရ၊ ကြားကာလဒေသန္တရပြည်သူ့အုပ်ချုပ်ရေး ဖော်ဆောင်မှု ဗဟိုကော်မတီနဲ့ တနင်္သာရီတိုင်း၊ ဧရာဝတီတိုင်း၊ ပဲခူးတိုင်း ပြည်သူ့အုပ်ချုပ်ရေး အဖွဲ့ တွေ တွေ့ဆုံဆွေးနွေးပွဲမှာ ခုလိုပြောလိုက်တာပါ။

“နွေဦးတော်လှန်ရေးဟာ အရပ်သားပြည်သူတွေရဲ့ လူ့အခွင့်အရေး၊ လုံခြုံရေး၊ တရားဥပဒေစိုးမိုးရေးကို ဝိုင်းဝန်းကာကွယ်ထိန်းသိမ်းဖို့နဲ့ စစ်အာဏာရှင်ကို တွန်းလှန်နိုင်တဲ့ ရည်ရွယ်ချက်ပါဝင်ကြောင်း၊ အုပ်ချုပ်မှုဒေသအတွင်းက အရပ်သားပြည်သူတွေကို ကာကွယ်စောင့်ရှောက်ကြရမှာဖြစ်ကြောင်း၊ မြေပြင်က ပြောကြားချက်တွေကို သက်ဆိုင်ရာ ဝန်ကြီးဌာနတွေက အကောင်အထည်ဖော်ဖို့ လိုအပ်ကြောင်းနဲ့ ‌တွေဆုံမှုမှာ လိုအပ်ချက်၊ တင်ပြချက်၊ စိန်ခေါ်မှုတွေကို ပူးပေါင်းဆောင်ရွက်ပြီး အကြံပြုချက်တွေနဲ့ ချိတ်ဆက်လုပ်ဆောင်သွားဖို့လည်း မျှော်လင့်တယ်”လို့ ဝန်ကြီးက ပြောပါတယ်။

NUG လူ့အခွင့်အရေးဝန်ကြီးဟာ မတ်လ ၄ ရက်ကလည်း ချက်သမ္မတနိုင်ငံမှာကျင်းပတဲ့ “ဘယ်တော့မှ အရူံးမပေးနဲ့”ဆိုတဲ့  ခေါင်းစဥ်နဲ့ဆွေးနွေးပွဲမှာ ချက်နိုင်ငံရေးဝန်ကြီးဌာနက အာရှရေးရာတာဝန်ခံ မာရတ်ခ်လစ်ဘရစ်ကီနဲ့အတူ ပါဝင်တက်ရောက်ဆွေးနွေးခဲ့ပါတယ်။

ဆွေးနွေးရာမှာ လက်ရှိ ကုလသမဂ္ဂလူ့အခွင့်အရေးကောင်စီရဲ့ ဥက္ကဋ္ဌအဖြစ်တာဝန်ယူထားတဲ့ ချက်နိုင်ငံအနေနဲ့ တနေ့တခြားပိုမိုရက်စက်ယုတ်မာလာနေတဲ့ အကြမ်းဖက်စစ်ကောင်စီကို ထိရောက်တဲ့ အရေးယူဆောင်ရွက်မှုတွေ ထွက်ပေါ်လာအောင် အစွမ်းကုန် ဆက်လက်ကြိုးပမ်းပေးဖို့ လူ့အခွင့်ရေးဝန်ကြီးကတိုက်တွန်းခဲ့ပါတယ်။

မြန်မာနိုင်ငံမှာတော့ အကြမ်းဖက်စစ်အုပ်စုက မတရားအာဏာသိမ်းယူထားခဲ့တဲ့ ကာလဟာ ၂ နှစ်ကျော်ထိ ကြာမြင့်လာခဲ့ပြီဖြစ်ကာ ဒီကာလတွေအတွင်း နိုင်ငံရေးမတည်ငြိမ်မှုတွေနဲ့အတူ စီးပွားရေး၊ လူမှုရေး၊ ကျန်းမာရေး၊ ပညာရေးစတဲ့ ကဏ္ဍတွေအသီးသီးမှာ အဘက်ဘက်က ကျဆင်းလာနေခဲ့တယ်။

လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ် နေမှုတွေကို ပြည်သူတရပ်လုံးက အသက်ရှင်သန်ရေးအတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြတာ ဖြစ်ပါတယ်။

မြန်မာစစ်တပ်ဟာ အာဏာသိမ်းမှုကို ဆန့်ကျင်သူတွေအပေါ် သတ်ဖြတ်၊ နှိပ်စက်ညှဉ်းပန်း၊ ဥပဒေမဲ့စိတ်ထင်တိုင်းဖမ်းဆီး၊ လူမသိအောင်တိတ်တဆိတ်ဖမ်းဆီးတာတွေအပါအဝင် အကြမ်းဖက်မှုတွေ အဆက်မပြတ်ကျူးလွန်ရင်းအဆုံးမရှိတဲ့ လူ့အခွင့်အရေးဆိုင်ရာ ပြဿနာတွေကို ဖန်တီးနေတယ်လို့ ကုလသမဂ္ဂလူ့အခွင့်အရေးဆိုင်ရာရုံးကလည်း မတ်လ ၃ ရက်မှာ အစီရင်ခံစာ ထုတ်ပြန်ထားပါတယ်။