စစ်ကိုင်းတိုင်း၊ ကသာခရိုင်၊ ဗန်းမောက်မြို့ ရဲစခန်းကို မတ် ၆ ရက် ညဦးပိုင်းမှာ ပြည်သူ့ကာကွယ်ရေးတပ်ဖွဲ့က လက်နက်ကြီး ၃ လုံးနဲ့ ပစ်ခတ်တိုက်ခိုက်ခဲ့ရာ စခန်းထဲကနေ စစ်သားတွေကလည်း ပြန်လည်ပစ်ခတ်ခဲ့တယ်လို့ Banmouk Revolution-BR အဖွဲ့က ထုတ်ပြန်ပြောဆိုပါတယ်။

ဒေသခံအမျိုးသားတဦးက “ပေါက်ကွဲသံလည်း ကြားတယ်၊ သေနတ်ပစ်သံတွေလည်း ကြားတယ်၊ အပြင်တော့ ထွက်မကြည့်ရဲလို့ မကြည့်ဘူး။ ခဏကြာတော့ အသံတိတ်သွားတယ်။ ရဲစခန်းမှာ ဖြစ်တာလို့တော့ သိရတယ်” လို့ ဒီဗွီဘီကို ပြောပါတယ်။

ဗန်းမောက်ရဲစခန်းကို ပစ်ခတ်တိုက်ခိုက်ခဲ့တဲ့ ပြည်သူ့ကာကွယ်ရေးတပ်ဖွဲ့ဝင်‌တွေ အထိအခိုက်မရှိ ပြန်လည်ဆုတ်ခွာနိုင်ခဲ့တယ်လို့ သိရတယ်။

ပြည်သူတွေအနေနဲ့ စစ်ကောင်စီတပ်တွေနဲ့ တတ်နိုင်သမျှ အဝေးမှာနေထိုင်ကြပြီး အစစ်အဆေး တင်းကျပ်လာနိုင်တဲ့အတွက် သတိပြု သွားလာနေထိုင်ကြဖို့နဲ့ ဖုန်းလိုင်း အင်တာနက်လိုင်း အခက်အခဲကြောင့် သတင်းမထုတ်ပြန်နိုင်တာဖြစ်တယ်လို့ Banmouk Revolution-BR အဖွဲ့က ထုတ်ပြန် အသိပေးထားပါတယ်။

စစ်ကိုင်းတိုင်း၊ အရာ‌တော်မြို့နယ်မြောက်ခြမ်းက ကျွဲခြံကျေးရွာအနီးမှာလည်း မတ် ၆ ရက် မနက် ၈ နာရီလောက်က စစ်ကောင်စီတပ် မိုင်းဆွဲတိုက်ခိုက်ခဲ့တယ်လို့ ဒေသခံ ကာကွယ်ရေးတပ်တွေက ပြောပါတယ်။

အဆိုပါ စစ်ကောင်စီတပ်ဟာ အရာတော်မြို့ တကရ ၅၀၀၄ တပ်ရင်းကနေ အင်အား ၅၀ နဲ့ ကျွဲခြံကျေးရွာဘက် ထွက်ခွာလာစဉ် အခုလို မိုင်းဆွဲခဲ့တာလို့ ဆိုပါတယ်။

အရာတော် ဒေသခံကာကွယ်ရေးအဖွဲ့ဝင်တဦးက “သူတို့က PDF စခန်းတခုကို ဝင်စီးတာ။ ဒီဘက်က အဖွဲ့တွေက‌ ကြိုတင်သတင်းရထားတာနဲ့ ဟန်မပျက် စခန်းကိုထားပြီး စခန်းပတ်ပတ်လည် မိုင်းထောင်စောင့်နေတယ်။ သူတို့လာတော့ ကျ‌နော်တို့အဖွဲ့တွေဘက်က အသင့်ထောင်ထားတဲ့ ဆယ်ဝင်ပုံးတလုံးနဲ့ စလစ် ၃ လုံးတွဲထားတဲ့ ပဒေသာမိုင်းတလုံး ဖောက်ခွဲနိုင်ခဲ့ပြီး နောက်ထပ် နင်းမိုင်းတလုံးလည်း မိသွားတယ်ဗျ။ (--)အသေကတော့ နေရာတင် တကောင်သေပြီး ၂ ကောင်ကတော့ ထမ်းစဉ်နဲ့ထမ်းပြီး အရာတော်ဆေးရုံကိုပို့တာ မြင်လိုက်ရသူတွေရှိတယ်။ ဒီကောင်တွေ ထပ်ပြီး နောင်ကြီးအိုင်ဘက် ဆက်ပြီး စစ်‌ကြောင်းထိုးတယ်။ အဲဘက်က အဖွဲ့တွေကလည်း မိုင်းဆွဲတာတွေရှိတယ်။ အသေအပျောက်ကတော့ အခုထိ သတင်းမရသေးဘူး” လို့ ပြောပါတယ်။

ကျွဲခြံကျေးရွာအနီး မိုင်းဆွဲခဲ့တာကို ဒေသခံအဖွဲ့၊ အရာတော်တပ်ရင်း-၁၈၊ တိုက်နယ် ၄ က ပကဖအဖွဲ့တွေ ပူးပေါင်းတိုက်ခိုက်ခဲ့တာလို့လည်း ဒေသခံ ပြည်သူ့ကာကွယ်ရေးအဖွဲ့တွေဆီကနေ သိရပါတယ်။

စစ်ကိုင်းတိုင်း ကလေးမြို့အနောက်ပိုင်း၊ တောင်ဇလပ်ရပ်ကွက် စမ်းမြို့ဘုန်းကြီးကျောင်းအနီး ဗိုလ်ချုပ်လမ်းမပေါ်မှာ ပျူစောထီး လူငယ်တယောက် သေနတ်နဲ့ ပစ်သတ်ခံရတယ်လို့ အနီးဝန်းကျင်နေ ဒေသခံတွေက ပြောပါတယ်။

မတ် ၅ ရက်က ပစ်ခတ်ခံခဲ့ရတာဖြစ်ပြီး သေဆုံးသွားတဲ့လူငယ်ရဲ့ခေါင်းမှာ သေနတ်ဒဏ်ရာ ရပြီး သေဆုံးခဲ့တာလို့ ဒေသခံတွေက ပြောပါတယ်။

ပစ်သတ်ခံရတဲ့လူငယ်ဟာ ပျဉ်သာရွာက ပျူစောထီးခေါင်းဆောင် ချမ်းမြေ့အောင်ဖြစ်ပြီး ဖမ်းဆီးထားချိန်မှာ တပ်ဖွဲ့ဝင်တွေကို ပြန်လည်ခုခံတာကြောင့် လုပ်ဆောင်ခဲ့ရတာလို့ အခင်းဖြစ်ပွားရာမှာ ပါဝင်ခဲ့တဲ့ ‌UGF Kalay အဖွဲ့ဝင်တဦးက ပြောပါတယ်။

“ပျဉ်သာရွာက ကလေးမြို့အရှေ့ဘက်က ပျူစောထီးကျေးရွာပါ။ သူ့ကို စောင့်ကြည့်နေတာ ၇ လလောက်ရှိပါပြီ။ ဇန်နဝါရီလတုန်းက သူ့တပည့်တယောက်ကို အရင် ဖမ်းမိခဲ့တာပါ။ ဖရဲသီးရဲ့ သတင်း‌ပေးချက်အရ သူ့ကို ကျနော်တို့အဖွဲ့က ဖဲဝိုင်းမှာ ဖမ်းမိခဲ့တာပါ။ သူ့ကို ဖမ်းပြီး စစ်ဆေးမေးမြန်းနေချိန် သူက ခုခံလို့ ရှင်းလင်းခဲ့ရတာ။”

သေဆုံးသူ အမျိုးသားရဲ့ ရုပ်အလောင်းကို တာဟန်းမီဇိုးလူငယ်အသင်းက ကလေးမြို့ ပြည်သူ့ဆေးရုံကို ပို့ဆောင်ခဲ့ပြီး ၄၈ နာရီအတွင်း အလောင်းပိုင်ရှင် မတွေ့ပါက ဆေးရုံက သင်္ဂြိုဟ်ပေးမယ်လို့ လူမှုကူညီရေးအသင်း တာဝန်ရှိသူတယောက်က လူမှုကွန်ရက်မှာ ရေးသားထားပါတယ်။

မတ် ၄ ရက်ကလည်း တာဟန်းရပ်ကွက်၊ ဝယ်စလီဆေးရုံ အနောက်ဘက်လမ်းမှာ အသက် ၂၅ နှစ်အရွယ် လူငယ်တယောက်ကို အမည်မသိ လက်နက်ကိုင်အဖွဲ့တခုက ပစ်သတ်ခဲ့ပါသေးတယ်။

အဆိုပါ ပစ်ခတ်တိုက်ခိုက်မှုတွေနဲ့ ပတ်သက်ပြီး စစ်ကောင်စီဘက်ကတော့ သတင်းထုတ်ပြန်တာ မရှိသေးပါဘူး။

စစ်ကိုင်းတိုင်း၊ အရာတော်မြိူ့နယ်၊ မင်းရွာကို ဖေဖော်ဝါရီ ၂၃ ရက် ညနေ နဲ့ ၂၄ ရက် ၂ ရက်အတွင်း စစ်ကောင်စီက အင်အား ၈၀ ကျော်နဲ့ ဝင်ရောက်မီးရှို့တာကြောင့် အိမ်ခြေ ၁၄၀၀ ကျော် မီးလောင်ဆုံးရှုံးခဲ့တယ်လို့  ရွာသားတွေက ပြောပါတယ်။

မင်းကျေးရွာ ဒေသခံအများစုဟာ မိရိုးဖလာတောင်သူလုပ်ငန်းနဲ့ ကွမ်းစိုက်ပျိုးမှုကို အဓိက လုပ်ကိုင်နေကြပြီး အိမ်ခြေ ၁၅၀၀ ကျော်ရှိတဲ့အနက် စစ်တပ်မီးရှို့တာကြောင့် အိမ်ခြေ ၇၀ လောက်ပဲ ကျန်ခဲ့ကြောင်း၊ စစ်ကောင်စီတပ် ကျေးရွာကို မီးရှို့တာကြောင့် ဒေသခံကာကွယ်ရေးတပ်နဲ့ တိုက်ပွဲဖြစ်ပွားခဲ့တယ်လို့  မင်းရွာသားတဦးက ‌ပြောပါတယ်။

“သူတို့က စစ်ကြောင်းထိုးလာပြီဆိုရင် ရွာတွေကို မီးရှို့တယ်။ ဘာကြောင့်မီးရှို့တာတွေ လုပ်လဲဆိုတော့ PDF ကို စိန်ခေါ်တဲ့သဘောနဲ့ကို မီးရှို့တာ။ သူတို့ အဲလိုမီးရှို့တော့ PDF က သူတို့ဝင်တိုက်တယ်ပေါ့၊ အဲမှာတိုက်ပွဲဖြစ်ကုန်ရော။ ကျနော်တို့ ဒေသခံတွေကတော့ လက်နက်ကိုင် ဘယ်သူလာလာ ကြောက်ရတာပဲလေ။ အဲတာကြောင့် စာနာစိတ်တော့ ထားသင့်ကြတယ်။ စစ်ကောင်စီကလည်း PDF တွေ နဲ့ တိုက်ပွဲဖြစ်ခြင်တယ်ဆိုရင်လည်း လွတ်တဲ့နေရာမှာ တိုက်ကြပါလား။ အခုတော့ ရွာထဲကို လက်နက်ကြီးတွေနဲ့ ပစ်ဝင်တယ်။ ရွာ သားတွေ မရှိတော့ဘူးဆိုရင် ရွာထဲက အိမ်တွေထဲဝင်ပြီး ရွှေ၊ ငွေနဲ့ တန်ကြေးရှိတာတွေ ယူတာတွေ လုပ်တယ်ဗျ။ အခုလည်း ကျနော်တို့ရွာကို မီးရှို့ပြီး ရွာမြောက်ဘက်ထွက်သွားကြပြီ။ အခု PDF တွေက မီးငြှိမ်းပေးနေကြတယ်။”

စစ်ကိုင်းတိုင်း၊ အရာတော်မြို့နယ်ကို ဖေဖော်ဝါရီ ၂၂ရက်နေ့မှာ စစ်အုပ်ချုပ်ရေးကြေညာပြီးနောက် မင်းရွာ၊ မလဲသာနဲ့ ကန်ရင်း စတဲ့ ရွာတွေကို စစ်ကောင်စီတပ်က ဖေဖော်ဝါရီ ၂၂ နဲ့ ၂၃ ရက်နေ့တွေမှာ လေကြောင်းကနေလည်း တိုက်ခိုက်ခဲ့တယ်လို့ ဆိုပါတယ်။ 

ဖေဖော်ဝါရီ ၂၅ ရက်နေ့မှာ မင်းရွာကနေ စစ်ကောင်စီတပ်တွေပြန်လည်ထွက်ခွာသွားတယ်လို့ ဒေသခံကာကွယ်ရေးအဖွဲ့ခေါင်းဆောင်က ပြောပါတယ်။

"စစ်ကောင်စီတော့ထွက်သွားပြီ။ အရင်တချီဝင်တုန်းက ၁၃၀ ကျော်ပါပြီးသား။ တော်တော်များများက ပြန်ဆောက်ပြီးနေကြတာ။ အဲ့ပြန်ဆောက်တဲ့သူတွေလည်း အကုန်ပြန်ပါ အဲ့လိုဖြစ်တာ။ တရွာလုံးနီးနီး ပြာဖြစ်နေတာဆိုတော့။ နောက်ထပ် ထူးခြားတာက စာသင်ကျောင်းပေါ့၊ အထက ၁ မင်းရွာ အဲ့ကျောင်းကို ရှို့သွားတယ်။ ကျောင်းဆောင်သစ်ကြီး တဦးတည်း အလှူရှင် လှူထားတာ။"

ဒါ့အပြင် စစ်ကောင်တပ်က ရွာအစပ်မှာ ရွာသားတဦးကိုလည်း ပစ်သတ်သွားတယ်လို့ ဆိုပါတယ်။ 

စစ်ကောင်စီတပ်သားတွေရဲ့ အကြမ်းဖက်မှုကြောင့် အရာတော်မြို့နယ်မှာ ရက်ပိုင်းအတွင်း စစ်ဘေးသင့်ပြည်သူ ၃ သောင်းဝန်းကျင်အထိ ရှိလာပြီး စားနပ်ရိက္ခာ၊ သောက်သုံးရေနဲ့ ဆေးဝါးပြတ်တောက်မှုတွေကြောင့် အခက်အခဲကြုံနေရပါတယ်။

မင်းရွာသားတဦးက "လက်နက်ကြီးတွေနဲ့ ပိတ်ထုတော့ ဘာပစ္စည်းမှလည်း မရပါဘူး။ ကျန်တဲ့ဟာကလည်း သူတို့အကုန်တိုက်သွားကြပါတယ် ပစ္စည်းတွေကတော့။ ကျနော်တို့ ၃ ရက်ရှိပါပြီဗျာ။ ရွာကို (-) တွေက အင်တိုက်အားတိုက်ရှို့သွားပါတယ်။ အိမ်ခြေကလည်း ဘာမှမရှိတော့ပါဘူး။ ကျနော်တို့ ဘယ်လိုနေလို့ နေရမှန်းမသိတော့ပါဘူး။ အခု ကျွန်တော့်နောက်ကျောက စာသင်ကျောင်းကြီးပါ။ အဲ့ဒါကိုလည်း အကုန်ရှို့သွားပါတယ်" လို့ ပြောပါတယ်။

စစ်ကိုင်းတိုင်း အရာတော်၊ ရွှေဘို၊ ဝက်လက် မြို့နယ်တို့ကို စစ်အုပ်ချုပ်ရေး ထပ်တိုးလိုက်တဲ့အတွက် စစ်ကိုင်းတိုင်း ၃၇ မြို့နယ်မှာ ၁၄ မြို့နယ်အထိ စစ်အုပ်ချုပ်ရေးကြေညာခံထားရပါတယ်။ 

စစ်ကောင်စီရဲ့ အကြမ်းဖက်မီးရှို့မှုကြောင့် ၂၀၂၁ မေလကနေ ၂၀၂၃ ဇန်နဝါရီလကုန်အထိ နိုင်ငံတဝန်း အိမ်ခြေပေါင်း ၅၅,၀၀၀ ကျော် မီးလောင်ပျက်စီးခဲ့တယ်လို့ Data for Myanmar အဖွဲ့က ဖေဖော်ဝါရီ ၁၀ ရက်နေ့မှာ ထုတ်ပြန်ထားပါတယ်။ 

စစ်ကိုင်းတိုင်းမှာ အိမ်ခြေ ၄၃,၀၀၀ ကျော်မီးလောင်ပျက်စီးခဲ့ပြီး မကွေးတိုင်းမှာ အိမ်ခြေ ၈,၈၀၀ ကျော်၊ ချင်းပြည်နယ်မှာ အိမ်ခြေ ၁,၄၀၀ ကျော် မီးရှို့ဖျက်ဆီးခံခဲ့ရပါတယ်။