ရန်ကုန်မြို့ ကားအရောင်းအဝယ်ဈေးကွက်မှာ ကားဈေးတွေတက်နေပေမဲ့ အရောင်းအဝယ်က မဖြစ်သလောက် အေးနေတယ်လို့  ကား ဝယ်ရောင်းလုပ်ကိုင်သူတွေထံက သိရပါတယ်။

စစ်ကောင်စီရဲ့ ကားတင်သွင်းခွင့် မူဝါဒ ကန့်သတ်ချက်တွေကြောင့် ရန်ကုန်ကားဝယ်ရောင်းဈေးကွက်ရှိ  ဂျပန် (used car) ကား တစီးရဲ့ တန်ဖိုးဟာ အရင်ကကျပ် သိန်း ၂၀၀ အောက်သာရှိခဲ့ရာကနေ  လက်ရှိမှာတော့ ကျပ်သိန်း ၅၀ နဲ့ ၁၀၀ ကြား ဈေးမြင့်သွားခဲ့ပြီး ကျပ်သိန်း ၃၀၀ အထက်ရှိတဲ့ ကားတစီးကလည်း ကျပ်သိန်း ၆၀၀ ကျော်အထိရှိလာလို့ နှစ်ဆနီးပါး ဈေးတက်လာပါတယ်။

ကားဝယ်ရောင်းသမားတဦးက “လက်ရှိကတော့ အရောင်းအဝယ်က တော်တော့်ကို အေးတယ်လို့ ပြောလို့ရတယ်။ ဘာလို့လဲဆို အရင်ကဆိုရင် ကားတစီး တင်လိုက်တာနဲ့ ဝုန်းခနဲ ခဏလေးပဲ ဝယ်သွားလိုက်ကြတာနော်။ အခုတော့ အဲ့ဒီ့လိုမျိုး မရှိတော့ဘူး။ ဒါပေမဲ့ ဈေးကတော့ မကျဘူး။ အားလုံးက မာမာချည်းပဲ၊ ဈေးတင်းခံနေတာပေါ့။ ဘာလို့လဲဆို ပေါ်လစီက တချက်ပြောင်းသွားတာနဲ့ ဈေးကလည်း ပါသွားတာ ဆိုတော့ ကားကို လက်မလွှတ်ရဲကြဘူး။ ဒီကာလမှာတော့ အားလုံးက စောင့်ကြည့်နေကြတယ်” လို့ ဆိုပါတယ်။

စစ်ကောင်စီက ပြည်တွင်းမှာ အမေရိကန်ဒေါ်လာ လိုအပ်ချက် ရှိနေတာကြောင့် ကားပါမစ်(ပြည်ပမှ ကားအသစ် တင်သွင်းခွင့်)ကို ၂၀၂၁ ခုနှစ်၊ စက်တင်ဘာလ ကတည်းက ရပ်ဆိုင်းခဲ့တာပါ။ 

ဒီ့နောက် ၂၀၂၂ ခုနှစ်အတွက် ကားတင်သွင်းခွင့် မူဝါဒ ထုတ်ပြန်တဲ့အခါ ကားသစ်တင်သွင်းခွင့်နဲ့ ပတ်သက်ပြီး အရောင်းစင်တာ(showroom)လုပ်ငန်းလိုင်စင်ရရှိထားတဲ့သူတွေကို ချန်လှပ်ထားခဲ့ တဲ့အပြင် brand new car showroom လုပ်ငန်းလိုင်စင်ရှိတဲ့သူတွေကိုလည်း အစီးအရေ အကန့်အသတ်နဲ့သာ တင်သွင်းခွင့်ပေးပါတယ်။

ဒါပေမဲ့ အခွင့်ထူးခံတွေ အပါအဝင် မကြာသေးခင်က ဆီးဂိမ်းပြိုင်ပွဲမှာ ရွှေတံဆိပ်ဆုရရှိခဲ့တဲ့ အားကစားသမားတွေအတွက် အထူးပါမစ်တွေ ထုတ်ပေးပြီး ကားတင်သွင်းခွင့် ပေးထားတဲ့အကြောင်း စစ်ကောင်စီ ပြောရေးဆိုခွင့်ရ ဗိုလ်ချုပ် ဇော်မင်းထွန်းက ဇွန်လ ၁ ရက်နေ့ နေပြည်တော်မှာ ပြုလုပ်တဲ့ သတင်းစာရှင်းလင်းပွဲမှာ ပြောဆိုခဲ့တာပါ။

“အထူးပါမစ်နဲ့ တင်သွင်းခွင့် ပေးထားတာက လွဲရင် ကျန်တဲ့ဟာတွေကို လောလောဆယ် ရပ်ဆိုင်းထားမှာ ဖြစ်ပါတယ်။ အကြောင်းရင်းကတော့ အများပြည်သူနဲ့ သက်ဆိုင်တဲ့ သယ်ယူပို့ဆောင်ရေးနဲ့ဆိုင်ရင် ဆောင်ရွက်ပါမယ်။ အထူး ကိစ္စရပ်အနေနဲ့ ဆောင်ရွက်မှာ ဖြစ်ပါတယ်။ ကျန်တဲ့ဟာတွေကိုတော့ ကန့်သတ်မှုတွေ ဆက်ရှိနေဦးမှာ ဖြစ်ပါတယ်။”

ကားတင်သွင်းမှုအပေါ် အခုလို ကန့်သတ်ထားတဲ့ စစ်ကောင်စီရဲ့ မူဝါဒ အပြောင်းအလဲတွေကြောင့် ရန်ကုန်ကားဝယ်ရောင်း ဈေးကွက်မှာ ကားဈေးနှုန်းတွေဟာ အတက်ဘက်ဆီ ဦးတည်လာပြီး ဈေးကွက်ကလည်း ကမောက်ကမဖြစ်နေတယ်လို့ ကားအရောင်းအဝယ်လုပ်သူတွေက ပြောပါတယ်။

ဝါရင့်ကားဝယ်ရောင်းသမားတဦးက “သူတို့လုပ်နေတဲ့ ပုံစံက အရင်ခေတ်ကလိုမျိုး ပြန်ဖြစ်အောင် လုပ်နေတာ။ ကြားဖူးမှာပေါ့။ တိုယိုတာ ဖင်ကောက် တစီးကို ကျပ်သိန်း ၁၂၀၀ အထိ ရောင်းခဲ့ကြတာလေ။ အဲ့လို ဖြစ်အောင် သူတို့ပဲလုပ်ခဲ့တာနော်။ သူများနိုင်ငံတွေမှာ လွှင့်ပစ်ဖို့အတွက် နေရာမရှိတော့တဲ့ ကားတွေက ဒို့ဆီမှာ အဲ့ဒီ့လိုဈေးတွေ ဖြစ်နေရတယ်။ အဲ့တော့ ဖြစ်နိုင်ခြေရှိတာက မဝင်တော့ဘူးဆိုရင် ဈေးက ထပ်တက်လာမှာပဲ။ ဈေးကွက်ကို သွားပြီး ထိန်းချုပ်လိုက်ရင် အဲ့လိုမျိုး ဖြစ်လာမှာ အသေအချာပဲ” လို့ ဒီဗွီဘီကို ပြောပါတယ်။

တဖက်မှာလည်း ပြည်တွင်းမှာ SKD (Semi Knocked Down) စနစ်နဲ့ ဂျပန်နိုင်ငံက လာရောက်တပ်ဆင်ထုတ်လုပ်တဲ့ ဆူဇူးကီးအမှတ်တံဆိပ် ဆီးရီးယက်အမျိုးအစား Q အက္ခရာတန်းက ဝယ်ဈေး ကျပ် သိန်း ၂၈၀ ဝန်းကျင် သာရှိခဲ့ပေမယ့် လက်ရှိမှာတော့ ကျပ် သိန်း ၃၅၀ အထိ ဈေးပေါက်နေပါတယ်။

ပြည်တွင်းမှာ မြန်မာကျပ်ငွေကြေးတန်ဖိုး ကျဆင်းလာတဲ့အပေါ် ငွေပိုငွေလျှံရှိသူတွေက ဒေါ်လာ၊ ရွှေနဲ့အတူ အိမ်ခြံမြေတွေကိုလည်း ဝယ်ယူစုဆောင်းလာတဲ့အတွက် အချိန် ၅ နှစ်ကျော်ကြာ အရောင်းအဝယ်အေးခဲ့တဲ့ ရန်ကုန်အိမ်ခြံမြေစျေးကွက်က အရောင်းအဝယ်ပြန်ဖြစ်လာလို့ စျေးကွက် စလှုပ်လာတဲ့အကြောင်း အိမ်ခြံမြေဝန်ဆောင်မှုလုပ်ငန်းရှင်တွေက ပြောပါတယ်။

ရန်ကုန်အိမ်ခြံမြေစျေးကွက်ကို အသက်ဝင်လာအောင် တွန်းအားဖြစ်စေခဲ့တဲ့ နောက်ထပ်အခြေခံအချက်တခုက စစ်ကောင်စီက  ၂၀၂၁ ခုနှစ်၊ ဇွန်လ ၁၇ ရက်နေ့က ထုတ်ပြန််ခဲ့တဲ့ အခွန်စည်းကြပ်မှုအောက်က ကင်းလွတ်နေတဲ့ ငွေတွေအပေါ် အခွန်ကောက်ခံမှုနှုန်းထားအား လျှော့ချပေးခဲ့တဲ့ ကြေညာချက်ပဲ ဖြစ်ပါတယ်။

အိမ်ခြံမြေအကျိုးဆောင်လုပ်ငန်းရှင်တဦးက “အခုတလော အိမ်ခြံမြေဘက်ကို လှည့်လာတယ်။ စျေးတန်းအနေနဲ့ သောင်းဂဏန်းကနေ ထောင်ဂဏန်းအထိ အဝယ်ရှိပါတယ်။ အိမ်ခြံမြေစျေးကွက်က တောက်လျှောက်အေးနေတာကနေ အခုစျေးကွက်က စလှုပ်လာတယ့် အခြေအနေပါ။ စျေးကွက်အေးသွားတာက ၅နှစ်ကျော်သွားပြီပေါ့နော်။ ပြီးတော့ အိမ်ခြံမြေက ရွှေလို အလုပ်ရှုပ်ခံပြီး သိမ်းထားစရာမလိုဘူးလေ။ သူက တရားဝင်အခွန်ဆောင်လိုက်ရင် တရားဝင်နေတာပဲ။ ဒီကြောင့်မို့လို့ အိမ်ခြံမြေဘက်ကို လှည့်လာကြတာ။ အိမ်ခြံမြေအခွန်စျေးနှုန်းတွေက စစ်ကောင်စီအစိုးရ လက်ထက်မှာ ထပ်လျှော့ထားတယ်။ လျှော့ထားတဲ့အပေါ်မှာ အများပြည်သူကလည်း အခွန်ဆောင်ချင်စိတ်ရှိတာပေါ့။ ဒီ့ထက်ပိုပြီးတော့ အရောင်းအဝယ်တွေ ပိုဖြစ်လာရင် အခွန်လည်းရမယ်။ အများပြည်သူတွေလည်း ချောင်လည်မယ်” လို့ဆိုပါတယ်။

NLD အစိုးရလက်ထက်မှာ အခွန်စည်းကြပ်မှုနဲ့ ပတ်သက်ပြီး  ကင်းလွတ်နေတဲ့ ဝင်ငွေတွေအပေါ် ၁ ကျပ်မှ သိန်း ၁၀၀၀ အတွင်း ၆ ရာခိုင်နှုန်း၊ သိန်း ၁၀၀၀ မှ သိန်း ၃၀၀၀ အတွင်း ၁၀ ရာခိုင်နှုန်း၊ သိန်း ၃၀၀၀ မှ သိန်း ၃၀၀၀၀ အတွင်း ၂၀ ရာခိုင်နှုန်း၊ သိန်း ၃၀၀၀၀ နှင့်အထက်ကို ၃၀ ရာခိုင်နှုန်း အခွန်စည်းကြပ်ကောက်ခံဖို့ ပြည်ထောင်စု၏ အခွန်အကောက် ဥပဒေကြမ်းကို အတည်ပြုခဲ့တာရှိပါတယ်။

စစ်ကောင်စီရဲ့  ၂၀၂၁ ခုနှစ် ၊ဇွန်လ ၁၇ ရက် ထုတ်ပြန်ချက်အရ စည်းကြပ်မှုမှ ကင်းလွတ်နေတဲ့ ဝင်ငွေအပေါ် ၁ ကျပ်မှ သိန်း ၁၀၀၀ အထိကို ၃ ရာခိုင်နှုန်း၊ သိန်း ၁၀၀၀ မှ သိန်း ၃၀၀၀ အတွင်း ၅ ရာခိုင်နှုန်း၊ သိန်း ၃၀၀၀ မှ သိန်း ၁၀၀၀၀ အတွင်း ၁၀ ရာခိုင်နှုန်း၊ သိန်း ၁၀၀၀၀ မှ သိန်း ၃၀၀၀၀ အတွင်း ၁၅ ရာခိုင်နှုန်း၊ သိန်း ၃၀၀၀၀ နှင့်အထက်ကို ၃၀ ရာခိုင်နှုန်း ကောက်ခံမယ်လို့ ဖော်ပြထားတာကြောင့် အရင်ကကထက် ရာခိုင်နှုန်းလျှော့ပေါ့ပေးထားတာ တွေ့ရပါတယ်။

အိမ်ခြံမြေအကျိုးဆောင်လုပ်ငန်းမှာ အကြံဉာဏ်ပေးနေတဲ့ စျေးကွက်သုတေသီတဦးက “ခေတ်က ဘယ်လိုပဲ ဖြစ်ဖြစ်ပေါ့နော်။ အိမ်ခြံမြေကတော့ ရေရှည်ကြာလာတာနဲ့အမျှ သာသွားတာပဲလေ။ ဒေါ်လာနဲ့ ရွှေ ဆိုတာက အခိုက်အတန့်လေး တခုမှာ ဝုန်းကနဲ တက်သွားပြီး ကျရင်လည်း ဝုန်းကနဲ  ပြန်ကျတာပဲလေ။ အိမ်ခြံမြေကတော့ အဲ့လို ပုံစံမျိုး မဟုတ်ဘူး။ သူက နှစ်နဲ့ချီပြီး အချိန်ကြာတယ်။ ဒါကြောင့် ဒေါ်လာနဲ့ ရွှေ လို စွန့်စားရမှု သိပ်မများဘူးပေါ့” လို့ ပြောပါတယ်။

အိမ်ခြံမြေအရောင်းအဝယ်အတွက် ငွေပေးချေရာမှာလည်း ဘဏ်ကတဆင့် ငွေထုတ်ရတာခက်ခဲလို့ အရင်ကပုံစံမျိုး မဟုတ်တော့ဘဲ အများစုက banking ကတဆင့် ငွေလွှဲတာကို လက်ခံလာကြတဲ့အပြင် ရာခိုင်နှုန်းနဲ့ပတ်သတ်ပြီး တယောက်နဲ့တယောက် ညှိနှိုင်းကာ အရောင်းအဝယ်လုပ်နေကြတာဖြစ်ပါတယ်။