အမျိုးသားညီညွတ်ရေးအစိုးရ (NUG) က ပုံမှန်ကျင်းပနေကျ အစိုးရအဖွဲ့အစည်းအဝေးကို ရပ်နားကာ နိုင်ငံတော် ယာယီသမ္မတ ဒူဝါလရှီးလ၊ ပြည်ထောင်စုဝန်ကြီးချုပ် မန်းဝင်းခိုင်သန်းတို့နဲ့ ပြည်ထောင်စုဝန်ကြီးတွေ ပါဝင်တဲ့ အရေးပေါ်အစည်းအဝေးတစ်ရပ်ကို ကျင်းပခဲ့ပြီး မိတ်ဖက်မဟာမိတ်အင်အားစုတွေအားလုံး ပူးပေါင်းကာ နိုင်ငံရေးနည်းလမ်း၊ သံတမန်နည်းလမ်း၊ စစ်ရေးနည်းလမ်း စတဲ့ နည်းလမ်းပေါင်းစုံသုံးပြီး တော်လှန်ရေးအရှိန်အဟုန်ကို မြှင့်တင်သွားမယ်လို့ ထုတ်ပြန်ပါတယ်။

မြန်မာ့ဒီမိုကရေစီအရေး ဦးဆောင်လှုပ်ရှားသူတွေဖြစ်ကြတဲ့ ဦးကျော်မင်းယု(ခ) ဦးဂျင်မီ၊ ဦးဖြိုးဇေယျာသော်၊ ဦးလှမျိုးအောင်၊ ဦးအောင်သူရဇော်တို့ ၄ ယောက်ကို အကြမ်းဖက်စစ်ကောင်စီက ပြစ်ဒဏ်စီရင်ပြီးနောက်  ဖမ်းဆီးထိန်းသိမ်းခံထားရတဲ့ နိုင်ငံခေါင်းဆောင်တွေ၊ ဒီမိုကရေစီအရေးတက်ကြွလှုပ်ရှားသူတွေအားလုံးရဲ့ အသက်အန္တရာယ် စိုးရိမ်ဖွယ်ရှိနေတဲ့ လက်ရှိ အခြေအနေနဲ့ပတ်သက်ပြီး စုစည်းညီညွတ်စွာနဲ့ စနစ်တကျ တုံ့ပြန်ဆောင်ရွက်သွားမယ့် လုပ်ငန်းစဉ်တွေအကြောင်းကို ဆွေးနွေးခဲ့ကြတာ ဖြစ်ပါတယ်။

NUG အစိုးရ ပြည်ထောင်စုဝန်ကြီးချုပ် မန်းဝင်းခိုင်သန်းကတော့ အစိုးရရဲ့ ကြေညာချက်တွေ၊ အစည်းအဝေးတွေရဲ့ နောက်မှာ တိကျခိုင်မာတဲ့ လုပ်ကိုင်ဆောင်ရွက်မှုတွေ အသေအချာကို တွဲပါလာမှာဖြစ်တယ်လို့ ပြောပါတယ်။

ဒါ့အပြင် ပြည်သူလူထုကို နည်းမျိုးစုံနဲ့ ရက်စက်စွာ နှိပ်စက်သတ်ဖြတ်ရုံသာမကပဲ ဒီမိုကရေစီအရေးတက်ကြွလှုပ်ရှားသူ တော်လှန်ရေးခေါင်းဆောင်တွေကို သွေးအေးစွာ သတ်ဖြတ်ပြခြင်းဖြင့် အဆုံးစွန်ဆုံးသော ရက်စက်မှုကို ပြသခဲ့တဲ့ အကြမ်းဖက်စစ်ခေါင်းဆောင် မင်းအောင်လှိုင်နဲ့ အပေါင်းအပါတွေကို တရားဥပဒေအရ ထိုက်တန်တဲ့ ပြစ်ဒဏ်တွေချမှတ်နိုင်ရေးကိုလည်း NUG အစိုးရက လုပ်ဆောင်သွားမယ်လို့ ဆိုပါ တယ်။

ဇူလိုင်လ ၂၅ ရက်နေ့မှာ စစ်ကောင်စီသတင်းစာတွေကနေ ကွပ်မျက်မှုကို အတည်ပြု သတင်းထုတ်ပြန်လိုက်ပြီးနောက် အမေရိကန်၊ ဗြိတိန်၊ ဥရောပသမဂ္ဂနဲ့ ကုလသမဂ္ဂ အပါအဝင် ကမ္ဘာ့နိုင်ငံတွေက ကန့်ကွက်ရှုတ်ချခဲ့ကြပြီး မြန်မာစစ်တပ်ရဲ့ ရက်စက်ကြမ်းကြုတ်မှုအဖြစ် ထုတ်ပြန်ခဲ့ ကြပါတယ်။ နိုင်ငံတကာရဲ့ ဝေဖန်မှုတွေကို စစ်ကောင်စီက ပြန်လည်တုံ့ပြန်တာမရှိသေးပါဘူး။ 

မြန်မာစစ်တပ်က ရွာတွေကို ဗုံးကြဲတာတွေ၊ အပြစ်မဲ့အရပ်သားတွေကို ဖမ်းဆီးတာတွေကို မြန်မာနိုင်ငံအနှံ့မှာ ဆက်တိုက်လုပ်နေသလို သေဒဏ်ပေးခံထားရသူပေါင်း ၁၀၀ ကျော်ကိုလည်း ဆက်ပြီးကွပ်မျက်သွားမယ့် အလားအလာတွေရှိနေတာကြောင့် စိုးရိမ်မိကြောင်း မြန်မာနိုင်ငံဆိုင်ရာ ကုလသမဂ္ဂလူ့အခွင့်အရေးအထူးကိုယ်စားလှယ် တွမ်အန်ဒရူးစ်က ပြောထားပါတယ်။

မြန်မာနိုင်ငံမှာ မတရားအာဏာသိမ်း ၁ နှစ်ခွဲနီးပါးအကြာ စစ်ကောင်စီတပ်တွေ အကြမ်းဖက် ပစ်ခတ်သတ်ဖြတ်မှုတွေကြောင့် နိုင်ငံတဝန်း အပြစ်မဲ့ကျဆုံးပြည်သူအယောက် ၂,၁၂၀ နဲ့ ဖမ်းဆီးထိန်းသိမ်းခံရသူပေါင်း အယောက် ၁၄,၈၇၀ ထိရှိပြီလို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ) က ထုတ်ပြန်ပါတယ်။ ဒါ့အပြင် အကြမ်းဖက်စစ်ကောင်စီက သေဒဏ်ချမှတ်ခံထားရသူ စုစုပေါင်း ၁၁၇ ယောက်ထိ ရှိနေတယ်လို့လည်း အေအေပီပီထုတ်ပြန်ချက်အရ သိရပါတယ်။

အာဆီယံ နိုင်ငံခြားရေးဝန်ကြီးများ အစည်းအဝေးမှာ မြန်မာနိုင်ငံက စစ်အာဏာသိမ်းမှု အရေးကို ဆွေးနွေးဖို့ ဖြစ်နိုင်ချေကို အင်ဒိုနီးရှားနိုင်ငံက အာဆီယံအဖွဲ့ဝင် နိုင်ငံတွေနဲ့ တိုင်ပင်နေတယ်လို့ ချန်နယ်နယူးစ် အေးရှ သတင်းဌာနမှာ ဖော်ပြပါတယ်။

အင်ဒိုနီးရှား နိုင်ငံခြားရေး ဝန်ကြီး ရဒ်နို မာရ်ဆူဒီဟာ သူ့ရဲ့ ဒေသတွင်း ခရီးစဉ်မှာ ပထမဆုံးအနေနဲ့ လက်ရှိ အာဆီယံ ဥက္ကဋ္ဌ ဖြစ်တဲ့ ဘရူနိုင်းနိုင်ငံက စော်ဘွား ဆူလ်တန် ဟတ်ဆာနယ် ဘိုလ်ကီးယားနဲ့ ဖေဖော်ဝါရီ ၁၇ ရက်မှာ တွေ့ဆုံခဲ့ရာမှာ အာဆီယံ နိုင်ငံခြားရေး ဝန်ကြီးများ ချက်ချင်း အစည်းအဝေးခေါ်ဖို့ အရေးကြီးမှုကို ဘရူနိုင်းစော်ဘွားက အလေးပေး ပြောဆိုခဲ့တယ်လို့ အွန်လိုင်း သတင်းစာရှင်းလင်းပွဲအတွင်း ပြောပါတယ်။

မြန်မာ့အရေး အထူး အစည်းအဝေး ကျင်းပဖို့ ဘရူနိုင်းနိုင်ငံကို ပြောရေး မလေးရှားဝန်ကြီးချုပ် မာယစ်ဒင်ယာဆင်နဲ့ အင်ဒိုနီးရှား သမ္မတ ဂျိုကိုဝီဒိုဒိုတို့က သူတို့ရဲ့ နိုင်ငံခြားရေးဝန်ကြီးတွေကို အသီးသီး ညွှန်ကြားရေး သဘောတူအပြီးမှာ မာရ်ဆူဒီရဲ့ ခရီးစဉ် စတင်ခဲ့တာပါ။

ဖေဖော်ဝါရီ ၁ ရက်က မြန်မာစစ်တပ်ဟာ ရွေးကောက်ခံ အရပ်သားအစိုးရဆီက အာဏာသိမ်းပြီး တနှစ် အရေးပေါ် အခြေအနေ ကြေညာခဲ့ပါတယ်။  ဒါ့ အပြင် သမ္မတဦးဝင်းမြင့်၊  နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့  အမျိုးသား ဒီမိုကရေစီ အဖွဲ့ချုပ်ပါတီက နိုင်ငံရေး ခေါင်းဆောင်တွေ အပါအဝင် မြန်မာ့ နိုင်ငံရေးမှာ ထင်ရှားသူ အတော်များများကိုပါ ဖမ်းဆီးခဲ့ပါတယ်။

စစ်အာဏာစသိမ်းတည်းက မြန်မာနိုင်ငံတွင်းက အခြေအနေကို စိုးရိမ်ကြောင်း အင်ဒိုနီးရှားနိုင်ငံက ဖော်ပြခဲ့ပြီးပြီ လို့ မဒမ် မာရ်ဆူဒီက ပြောပါတယ်။ ဒါပေမဲ့ မြန်မာကို ကူညီဖို့ အာဆီယံ အဖွဲ့ဝင်နိုင်ငံတွေနဲ့ အင်ဒိုနီးရှားက ဘာလုပ်နိုင်မလဲဆိုတာ မေးခွန်းဖြစ်နေဆဲပဲလို့ သူက ဆက်ပြောပါတယ်။

အာဆီယံ ပဋိညာဉ်စာတမ်းထဲမှာ ဖော်ပြထားတဲ့ အချက်တွေကို လေးစားဖို့က အာဆီယံ အဖွဲ့ဝင် နိုင်ငံတိုင်းရဲ့ တာဝန်ပဲလို့လည်း သူက ပြောပါတယ်။

အာဆီယံ ပဋိညာဉ် စာတမ်း ပုဒ်မ ၁/၇ ထဲမှာ ဒီမိုကရေစီကို အားဖြည့်ဖို့ ကောင်းမွန်တဲ့ အုပ်ချုပ်ရေးနဲ့ တရားဥပဒေ စိုးမိုးရေးကို တိုးမြှင့်ဖို့၊ အခြေခံလွတ်လပ်ရေးနဲ့ လူ့အခွင့်အရေးကို ကာကွယ်မြှင့်တင်ဖို့ ပါရှိတယ်လို့ မာရ်ဆူဒီက ဆက်ပြောပါတယ်။

 အင်ဒိုနီးရှားဟာ   တခြားနိုင်ငံရဲ့ ပြည်တွင်းရေးကို မစွက်ဖက်ရေး စည်းမျဉ်းကို ကိုင်စွဲပြီး မြန်မာပြည်သူတွေရဲ့ ဘေးကင်းရေး နဲ့ လူမှုဖူလုံရေး အပြုသဘောဆောင်တဲ့ ထိတွေ့မှုကို ထိပ်တန်းဦးစားပေးအနေနဲ့ ဆောင်ရွက်မယ်လို့ မာရ်ဆူဒီက ဆက်ပြောပါတယ်။

လက်ရှိအခြေအနေကို ကျော်လွှားဖို့ မြန်မာကို ကူညီရေး အသင့်တော်ဆုံး နည်းလမ်းက အာဆီယံလုပ်ငန်းစဉ်ပဲ ဆိုတာ အင်ဒိုနီးရှားနိုင်ငံက ယုံကြည်တယ်။ တခြား အာဆီယံ နိုင်ငံခြားရေးဝန်ကြီးတွေနဲ့လည်း ဆက်ပြီး ဆက်သွယ်သွားမယ်လို့ မာရ်ဆူဒီက ပြောခဲ့ပါတယ်။ 

သူဟာ စင်ကာပူ နိုင်ငံခြားရေးဝန်ကြီး ဗီဗီယန် ဘာလာခရစ်ရှ်နန်နဲ့လည်း  ကြာသပတေးနေ့မှာ တွေ့ဆုံဖို့ စီစဉ်ထားပါတယ်။