ကရင်ပြည်နယ်၊ မြဝတီခရိုင်၊ သေ့ဘော့ဘိုးကျေးရွာအနီးက စစ်ကောင်စီရဲ့တပ်စခန်းကို မေ ၁၈ ရက် မွန်းလွဲပိုင်းမှာ KNLA နဲ့ ပူးပေါင်းတပ်ဖွဲ့တွေကတိုက်ခိုက်သိမ်းပိုက်ခဲ့ရာမှာ စစ်ကောင်စီတပ်သား ၆ ယောက်ကို အရှင်ဖမ်းမိပြီး  လက်နက်မျိုးစုံ ၁၂ လက်နဲ့အတူ လက်နက်ခဲယမ်းတွေ သိမ်းဆည်းရမိခဲ့တယ်လို့  ကော်ဘရာစစ်ကြောင်းက သတင်းထုတ်ပြန်ထားပါတယ်။

မနေ့ မနက် ၉ နာရီက စတင်ပြီး  စစ်ကောင်စီရဲ့ တပ်စခန်းကို ဝင်ရောက်တိုက်ခိုက်ခဲ့ရာ ညနေ ၄ နာရီလောက်အထိ တိုက်ပွဲချိန်ကြာမြင့်ခဲ့ပြီး ရန်သူ့တပ်စခန်းကို ကော်ဘရာစစ်ကြောင်းနဲ့ ပူးပေါင်းတပ်ဖွဲ့တွေက အောင်မြင်စွာ တိုက်ခိုက်သိမ်းပိုက်နိုင်ခဲ့တယ်လို့ဆိုပါတယ်။

အဆိုပါတိုက်ပွဲအတွင်း စစ်ကောင်စီတပ်ဖွဲ့ဝင် တပ်ကြပ်ကြီး နိုင်အောင် ၊တပ်ကြပ်ကြီး တင်စိုး၊ တပ်ကြပ် ကျော်ထွန်း၊ ဒုတပ်ကြပ် မျိုးလင်းဇော်၊ တပ်သားမောင်ထိုက်နဲ့ တပ်သား နိုင်လင်းအောင်တို့ ၆ ဦးကို အရှင်ဖမ်းဆီးရမိခဲ့ရာ စစ်သုံ့ပန်း စည်းမျဉ်း၊ ဥပဒေတွေနဲ့ အညီ ကောင်းမွန်စွာ ထိန်းသိမ်းထားပြီး လိုအပ်တဲ့ဆေးဝါးကုသမှုတွေကို ဆောင်ရွက်ပေးထားတယ်လို့ဆိုပါတယ်။

တိုက်ပွဲမှာ စစ်ကောင်စီဘက်က သေဆုံးသူအနည်းဆုံး ၁၀ ယောက်လောက်ရှိနိုင်ပြီး ဒီနေ့မနက်လည်း သေ့ဘောဘိုးကျေးရွာအနီးကမှာ စစ်ကောင်စီတပ်ဖွဲ့ဝင် နောက်ထပ် ၂ ယောက်ကို ဖမ်းဆီးရမိတယ်လို့ ကေအန်အယ်လ်အေ သတင်းရင်းမြစ်ကပြောပါတယ်။  

မနေ့က တိုက်ပွဲမှာ ကော်ဘရာစစ်ကြောင်းနဲ့ ပူးပေါင်းတပ်ဖွဲ့ဘက်က တော်လှန်ရေးရဲဘော် ၃ ဦး ကျဆုံးပြီး ၄ ဦး မစိုးရိမ်ရဒဏ်ရာ ရရှိခဲ့တယ်လို့ ဆိုပါတယ်။

စခန်းသိမ်းတိုက်ပွဲအတွင်း ၈၁ မမ တာဝေး စိန်ပြောင်း  ၁ လက်၊ ၆၀ မမ တာဝေးစိန်ပြောင်း ၁ လက်၊ MA -10 အမျိုးအစား RPG  ၁ လက်၊ ၆၀ မမကွန်မန်ဒိုစိန်ပြောင်း ၁ လက်၊ MG - 3 စက်လတ် ၁ လက်၊ MA - 2 ၄ လက်၊ MA - 3  ၂  လက်၊ MA - 5  ၁ လက် ၊ ၆၀ မမ ဗုံးသီး  ၁၀ လုံး၊ ၈၁ မမ  ၁၄  လုံး၊ RPG ဗုံးသီး  ၄၆ လုံး ယမ်းတောင့်  ၁၆ တောင့်၊ တိုက်မိုင်း  ၅ လုံး၊ ကျည်ကာ အင်္ကျီ  ၃ ထည်၊ နင်းမိုင်း အကြီး ၃ လုံး၊ နင်းမိုင်းအသေး ၅ လုံး၊ အချက်ပြ သေနတ် ၂ လက်၊ ဒရုန်း ၁ စီး၊ မှန်ဘီလူး၂ လက်၊ ကျည်ကာဦးထုတ် ၄ လုံး သိမ်းဆည်းရမိခဲ့ပါတယ်။

ဒါအပြင် ကျည်ဘောက် ၂၇ ခု၊ ဆက်သွယ်ရေးစက် TS-2000  ၁ ခု၊ သံလိုက်အိမ်မြှောင် ၁ ခု၊ မြေပုံ ၁ ချပ်၊ မိုင်းရှာစက် ၁ ခု၊ လျို့ဝှက်စာရွက်စာတမ်း (အစုံ)၊ ဆက်သွယ်ရေးစက် ဘက်ထရီ ၁ ခု၊ စက်လတ်ကျည်ခါးပတ်တွဲ  ၁ ခု၊ ၅.၅၆ ကျည်  ၃၀၀၀ တောင့် ခန်၊ ၇.၆၂ ကျည်  ၄၀၀၀ တောင့်ခန့်၊ အချက်ပြကျည် ၁၀ တောင့်၊ ဆက်သွယ်ရေးစက် အသေး ၁ လုံး၊ ဂျန်မာစက် ၁ လုံးတို့အား (ကနဦး) သိမ်းဆည်းရမိခဲ့ပါတယ်။

သေ့ဘောဘိုးစခန်းကို တိုက်ခိုက်သိမ်းပိုက်နေစဉ်တလျှောက်လုံး စစ်ကောင်စီက လေကြောင်းကနေ ATR - 42 အမျိုးအစား ကင်းထောက်လေယာဉ် ဝဲပျံခဲ့သလို မှော်ဘီနဲ့ တောင်ငူ လေတပ်စခန်းက အမောင်းသင် တိုက်ခိုက်ရေးလေယာဉ် Yak- 130 အမျိုးအစား ၂  စီး၊ ဗုံးကြဲ‌ လေယာဉ် အမျိုးအစား K-8 လေယာဉ် ၂ စီး၊ ဘက်စုံသုံး တိုက်ခိုက်ရေးလေယာဉ် MiG -29  ၁ စီးဖြစ်ပြီး လေကြောင်း တိုက်ခိုက်မှုပေါင်း  ၃၅  ကြိမ် ပြုလုပ်ခဲ့ပါတယ်။

အဆိုပါ တိုက်ပွဲဖြစ်ပွားရာဒေသကို ကော်ဘရာစစ်ကြောင်းနဲ့ပူးပေါင်းတပ်ဖွဲ့တွေက နယ်မြေရှင်းလင်းရေး ဆက်လက်ဆောင်ရွက်နေကြပြီး တိုက်ပွဲကြောင့် သေ့ဘောဘိုးနဲ့ ပတ်ဝန်းကျင် ကျေးရွာတွေက ရွာသား ၃၀၀ လောက် ထိုင်းနိုင်ငံဘက်ကို စစ်ဘေးရှာင် ထွက်ပြေးခဲ့ကြရပါတယ်။

Photo- Cobra

ပြည်သူ့ခုခံတော်လှန်စစ်အတွင်း ဇန်နဝါရီ ၉ ရက် မနေ့က တရက်တည်းမှာတင် စစ်ကောင်စီ တပ်ဖွဲ့ဝင် ၁၀၂ ယောက် သေဆုံးခဲ့ပြီး အရှင်ဖမ်းမိသူ ၄ ယောက်ရှိခဲ့တယ်လို့ အမျိုးသား ညီညွတ်ရေးအစိုးရ (NUG) က ထုတ်ပြန်ပါတယ်။

ခုထုတ်ပြန်ထားတဲ့ အချက်လက်ဟာ မြေပြင်အခြေအနေမှာ ပိုပြီးတော့ များနိုင်ပြီး တရက်တည်း ထိခိုက်ဒဏ်ရာရရှိတဲ့သူအရေအတွက်ကတော့ ၃၆ ယောက်ရှိခဲ့တယ်လို့ ဆိုပါတယ်။

အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီးတိုက် ခိုက်သတ် ဖြတ်နေမှုတွေကို ပြည်သူလူထုတရပ်လုံးက အသက်ရှင်သန်ရေးအတွက် မိမိ ကိုယ်ကိုမိမိ ခုခံကာကွယ်ပိုင်ခွင့်အရ၊ ပြည်သူ့ခုခံစစ် (Peoples Defensive War) ကို ဆင်နွှဲနေကြတာ ဖြစ်ပါတယ်။

နိုင်ငံတဝန်းမှာတော့ မြန်မာပြည်သူတွေဟာ စစ်အာဏာရှင်စနစ် မြန်မာ့မြေပေါ်မှ အပြီးတိုင်ချုပ်ငြိမ်းရေးနဲ့ ဖက်ဒရယ်ဒီမိုကရေစီတည်ဆောက်ရေးအတွက် ငြိမ်းချမ်းစွာ ဆန္ဒပြတဲ့ လူထုသပိတ်တိုက်ပွဲတွေ တိုင်းဒေသကြီးနဲ့ ပြည်နယ်တွေ အနှံ့အပြား ဖြစ်ပွားနေတာ ဖြစ်ပါတယ်။

လူထုသပိတ်တိုက်ပွဲတွေအနေနဲ့ မနေ့က တရက်တည်းမှာ ပဲခူးတိုင်း၊ တနင်္သာရီတိုင်းနဲ့ ရန်ကုန်တိုင်းတွေမှာ ၁ ကြိမ်စီ၊ မကွေးတိုင်းနဲ့ မန္တလေးတိုင်းတွေမှာ ၂ ကြိမ်စီနဲ့ စစ်ကိုင်းတိုင်းမှာ ၈ ကြိမ်နဲ့ အများဆုံးဖြစ်ပွားခဲ့တယ်လို့လည်း အမျိုးသားညီညွတ်ရေး အစိုးရ (NUG)က ထုတ်ပြန်ထားပါတယ်။

မနေ့ညက ယင်းမာပင်ခရိုင်မှာ စစ်အာဏာရှင်ဆန့်ကျင် လူထုလှုပ်ရှားမှုကို လူအင်အား ထောင်ချီတဲ့ ပြုလုပ်နိုင်ခဲ့ပြီး ဆန္ဒပြပြည်သူတွေကို ပြည်သူ့ကာကွယ်ရေးတပ်တွေကလည်း လုံခြုံရေး ယူပေးနိုင်ခဲ့ပါတယ်။